Read Maasai Bible – Biblia Sinyati Sirak 26 Bible Online

Sirak 26 - Maasai Bible – Biblia Sinyati bible

Sirak 26

¹Enaikash olpayian oata enkitok sidai, keponari inkolong'i e nkishui enye.

²Ore enkitok naning olpayian lenye naa keitiship ninye nebik olpayian ilarin kumok te seriani.

³Ore enkitok sidai naa emayianata nabo naishori lelo ooure Olaitoriani.

⁴Ore tenaa aisinak aashu aa karsisi lelo payiani keaku keshipa netoni ekweni.

⁵Etii ntokitin uni naure nanu ore eni ong'uan naa kaaiture: olmarenke loo monko te nkanasa, empikas oo larruok, enkiteenikinoto, aitorok kuna alang ninye keeya.

⁶Ore enkitok naata olom te nkae neyau enyamali sapuk o sina, nekwetiki olng'ejep lenye pooki ng'ae.

⁷Etiu enkitok torrono anaa enchata e murt narrish. Ore tenitem ajo aibooyo netiu anaa enkolupa imbung'a.

⁸Ore enkitok namera neyau engoro sapuk, meisudoo ninye olkuaak lenye torrono.

⁹Indim atayiolo enkitok naibor onyek te nking'urata niking'or meirriapie enkong'u.

¹⁰Tipija oleng te ntito ino nawuara, pee melo ake netum erishata nerrorrie kewan.

¹¹Todolu oleng ina anyit nemeeta, niming'asia tenikinyal.

¹²Keboloki pooki ng'ae inkejek oyieu anaa olalotoni ook enkare pooki nayia eneyia te wueji neinepua.

¹³Ore enkitok sidai naa keitiship olpayian lenye naa keiko inaaidim ataasa metagolo.

¹⁴Ore enkitok nabor oleng naa enkishooroto naing'uaa enetii Enkai. Ore ina kibooroto e kewan naa aisidai oleng.

¹⁵Ore enkitok nemeeta mbaa kumok naa keeta dupoto sapuk nemeidimi aatayiolo.

¹⁶Ore anaa enayia esidano e nkakenya eilepu enkolong o Olaitoriani, neijia etiu esidano e nkitok supat o nkaji enye nemeeta oloirerio.

¹⁷Etiu esidano enye anaa ewang'an o lkilang'ilang'et le nkaji e Nkai sinyati.

¹⁸Netiu inkejek enyena anaa ng'apeta e saabu. Mbaa o sina

²⁸Etii mbaa are nemaaitiship o enkae e uni naaitagor: osikari otaa aisinani, iltung'ana ng'eni lemeyanyiti, o ltung'ani ooshukokino aas ing'ok. Keitame Enkai oltung'ani laaijo ilo te keeya

²⁹Melelek pee eilany olbiasharai entorroni, neijia etiu olomirisho meeidim ailanya eng'oki.