Read Maasai Bible – Biblia Sinyati Sirak 27 Bible Online

Sirak 27 - Maasai Bible – Biblia Sinyati bible

Sirak 27

¹Etaasa iltung'ana kumok ing'ok eing'oru dupoto, ore pooki ng'ae oyieu neaku karsis neishiaa pee eing'or inkonyek enyena.

²Ore anaa enaibung'a ing'apeta e nkaji, neijia etiu ing'ok, ketii atua enkinyanga o mirare.

³Ore pooki tung'ani lemeshilaa Enkai naa kemuti enkaji enye. Inkirorot

⁴Ore pee isil toki te silet naa keing'uari olmong'o, neijia etiu oltung'ani, keing'uari ilo oirerio te lukunya enye.

⁵Ketem olaironyani le sarng'ab esiaai enye to lkokuet, neijia etiu entemata o ltung'ani eng'eno enye etii.

⁶Keitodolu ilng'anayio eramatata o lchani, neijia etiu ilomon lo ltung'ani kelimu eniyia.

⁷Misis ake oltung'ani eitu ining eiro amu ena entemata o ltung'ani. Esipata

⁸Tiniyieu niaku asipani naa iaku asipani ninchop esipata anaa olkila lino lo sirua.

⁹Keiriamari imotonyi e mua nabo neijia etiu esipata keirimariyie lelo ooitabaya ninye.

¹⁰Ore anaa enarreshisho olng'atuny neijia etiu ing'ok erreshu ilaing'okok.

¹¹Ore inkirorot oo looure Enkai naa ine ng'eno kake keibelekenya ino lmodai anaa olapa.

¹²Ore iboitare ilmoda, ng'oru erishata nisikie kake ore iboitare lang'eni totona.

¹³Keitagorisho inkirorot oo lmoda naa ore enkwuenia enye naa eng'oki.

¹⁴Keitureisho inkirorot oo ltung'ana laaijo lelo, ore enchankar enye neisho oltung'ani metunuka inkiyiaa.

¹⁵Ore enchankar oo loong'ida neyau keeya, ore emorot enye naa keyau isura tinining. Emboloroto oo nkurrat

¹⁶Ore oloboloo inkurrat nemeitokini aaisilig, nemetum aikata olchore oyieu.

¹⁷Tonyorra olchore nitum enkisiligata te ninye, kake tenitaboloyie inkurrat enyena mintoki aikata airimariyie

¹⁸amu ore anaa enaishu oltung'ani olmang'atinta lenye, iishua sii yie shoruetisho ino o le latia.

¹⁹Ore anaa ening'ueiki emotonyi metupuku te nkaina ino, neijia etiu te ning'ueiki olchore lino, mintoki aikata atum.

²⁰Misuj ake amu eshomo enelakua oleng, ekweta anaa entarakwet natudung'o orreshet.

²¹Keidimi ateen ilbaa, nerrikinisho ildeketa kake tininyal enkisiligata nikisiligi naa aitorrono. Esunkuroisho

²²Ore ilo oiraprapie enkonyek naa kejo peyie eisa intorrok, kake metii hoo ltung'ani oidim atorishie.

²³Ore kiboitare ilo tung'ani naa aisidai enkiroroto enyena, aikisis te pooki kiroroto nijo, kake ore te siadi iyie naa kepaashaa enajo, keya ina nijo nikimbelekenyaki aitang'orie.

²⁴Meetae entoki naiba anaa oltung'ani laaijo ilo naa keiba sii ninye Olaitoriani.

²⁵Ore olonang'aa osoit shumata naa elukunya enye enang'aki, ore oloosh esuntai te nkaina naa kewan eitame.

²⁶Ore lelo ooresh irresheta nedoiki ninche maate lelo rresheta.

²⁷Ore iltung'ana ooinyal ilkulikae aaitame naa keitame ninche inkiasin enye maate, nemeyiolou aajo kainyoo.

²⁸Ore ilo ong'ida naa kemorisho nemenisho kake kerreshito enkitamioto anaa olng'atuny. Enkiba

²⁹Ore lelo ooshipakino embatatata e lelo ooisilig Enkai naa keibung'i to rreshet naa keibung emion eton eitu eye.

³⁰Ore engoro o ltung'ani osieku goro naa aitorrono oleng kake keeta ilaing'okok pooki.