Read Maasai Bible – Biblia Sinyati Sirak 29 Bible Online

Sirak 29 - Maasai Bible – Biblia Sinyati bible

Sirak 29

¹Elaata oo mpisai e sile Ore ilo oata olng'ur naa keisho esile ole latia enye, ore ilo oitagol ole latia enye too nkaik enyena na kesujita inkitanapat.

²Inchoo esile ole latia te rishata e yieunoto, naa ore te siadi nilaaki sii yie esile ole latia ino.

³Intabai irorei linono nimbung enkirukoto o ninye, naa ore too rishat pooki nitum ina niyieu.

⁴Eitaa iltung'ana kumok mpisai e sile ana osiwuo obatatisho neyau enyamali te lelo ootareto ninche.

⁵Keilejilej oltung'ani o likae omenoto impisai e sile, neitadoyio oltoilo lenye teneiro eing'oru impisai ole latia enye, kake ore te rishata e laata neimutie eitu elak naa tenelak, nelak meeti e yeunoto neimutiyie sii.

⁶Ore te neitanyamal olopeny impisai, nelak erubata oo mpisai te ngoloto neikenaa anaa osiwuo o batatisho. Teneitu elak neikonyaa impisai neeku olmang'atinta; nelak to ldeket o te nkurruna nelak sii metii enkanyit.

⁷Ore te nkaraki entorroni natiu inji, netanyaita ilkumok eishooyo esile; eure elejare naleji neikonyarieki impisai enye. Eleng'on

⁸Ore eyia neijia, ting'iriakinoyu oltung'ani obor nimintaanyu ninye inkishoorot inono olng'ur.

⁹Tareto oltung'ani aisinani te nkaraki inkitanapat, ore te nkaraki iyieunot enyena mincho elo meeta toki.

¹⁰Mincho erruoyo enkosholai tiabori osoit nenya endoron neiturrarri kake tung'ueiki olalashe aashu olchore.

¹¹Tushuma imaasa inono anaa enajo inkitanapat eilo otii Shumata Aisul, naa aikiyaki dupoto alang saabu.

¹²Tushuma inkishoorot tenishumishore, naa aikiretu iyie te rishata e nyamali.

¹³Kelang elong'o kitok nelang empere kitok, kejing olarrabal te rishata ino tialo ilmang'ati linono. Enkitasheikinoto e sile

¹⁴Ore oltung'ani supat naa keitasheiki esile ole latia enye, kake ore ilo lemedol enkurruna nemeshilaa ninye.

¹⁵Mincho kirikino esupatisho eilo likintasheikio te sile, amu kinchoo enkishui enye.

¹⁶Keinyal olaing'okoni karsisisho o laitashekinoni lenye,

¹⁷nemeeta enashe nemeshilaa olalakunoni lenye.

¹⁸Ore enkitaisheikinoto e sile neikuna ilkumok yiolot naa karsisi, meilanya inkuapi enye nepuo aku ilomon to nkuapi.

¹⁹Ore olaing'okoni onyorraa aitasheiki mpisai e sile eing'oru dupoto nepik keon enyamali.

²⁰Taretu ole latia lino te nkidimata niata, kake ing'ura ake kewan mibatatakino entoroni. Enkitoomono oo lomon ti ang

²¹Kuna mbaa e tipat te nkishui, enkare o endaa, nkilani o enkaji nitonie.

²²Enaikash enkishui o laisinani omanya enkaji enye alang endaa natii enkaji e likae tung'ani.

²³Inchoo kindip inkuti niata aashu inkumok pee miaku ake olonyor noo ltung'ana.

²⁴Kemakua oleng tiniruk inkajijik, ore enkaji nira omoni neidimayu nimibol enkutuk ino;

²⁵ilo iyie arreten emisa nintarasaa ntokitin naoki nimikinchori enashe, naa ilo aning irorei likintame.

²⁶“Wou ene, lo omoni terretena emisa naa tenelo niata toki te nkaina ino, inchooki mainosa.”

²⁷“Inchoo erishata oltung'ani oyanyiti, lo omoni, eewuo olalashe lai aaku tenebo nanu, kayieu enkaji ai.”

²⁸Ore kuna baa naa kegol oleng to ltung'ani oata endamunoto: aa mbaa naipirta eneirragi o enkurruna nayau enkishooroto o mpisai te sile.