Read Maasai Bible – Biblia Sinyati Sirak 3 Bible Online

Sirak 3 - Maasai Bible – Biblia Sinyati bible

Sirak 3

¹Enaishiaakino neitaas inkera intoiwuo Nakera, enining'o inkikoot e paapai linyi, entaas inena naajoki intae pee iserianunu,

²amu eishoo Enkai iloo papaai linyi enkitoria too nkera enye neisho nkera meturia inoo ng'otonye.

³Ore pooki ng'ae oure menye neisho kewan empalakinoto oo ng'ok.

⁴Ore oloure ng'otonye nepikaki kewan karsisisho sapuk.

⁵Ore pee iure paapai lino, ore nabo olong nikintiship inkera inono, nening Enkai enkomono ino.

⁶Ore ilo oure menye netum enkishui naado, ore ilo oitiship ng'otonye naa Enkai eyanyit.

⁷Turia intoiwuo inono anaa ira orrindik lenye.

⁸Iyanyita minyi too ntokitin pooki nias o nijo pee itum emayian enye.

⁹Ore emayianata e papaai lino neun enkang oo nkerai enyena, kake ore oldeket le ng'utunyi near olkitamanyunoto le nkang.

¹⁰Milepunye aikata kewan nintadoyio papaai lino, amu mikiyaki ina dupoto e hoo nyoo,

¹¹amu ore euriata o ltung'ani neimu euriata e menye naa olkuaak otua tinimiure ng'utunyi.

¹²Nakerai, ng'ura papaai lino tenemoruau, mintanyamal ake ninye te nkata pooki e nkishui enye.

¹³Mimenaa ake hoo duoo neiturrayie indamunot enyena, te nkaraki nira iyie biyoto nigol.

¹⁴Merikino Enkai olng'ur lintodol papaai lino, ekiretu iyie mikitapalakini ing'ok inono.

¹⁵Ore inyamal, nedamu Enkai olng'ur lino nikiretu, nesholi ing'ok inono anaa enkurriny e nkirobi nailang'a enkolong.

¹⁶Ore pooki ng'ae ooilany intoiwuo enyena aashu eitagor naa Enkai etamoro naa kediaa sii ninye te Nkai. Enkitadoyioroto e kewan

¹⁷Enkerai ai, ntadoi kewan too ntokitin pooki nias naa keshilaa iltung'ana aalang inkishoorot.

¹⁸Ore anaa enira kitok oleng, neishiaa pee intadoyio kewan naa itum omom te dukuya Enkai,

²⁰amu aisapuk enkitoo o Laitoriani, keyaki enkitoo lelo ooborr.

²¹Ming'oru ayiolou nena naagol te yie, nimijurr ayiolou inena naalus engolon ino.

²²Mbirribirra nena nikinchiaakino nias, meishiaa pee kintanyamal nena naaisudoro.

²³Mijing'aki imbaa nemeeta enipor amu kintoduaaki imbaa kumok naalus eng'eno o ltung'ani.

²⁴Aikumok ilooimina elej ate ajo aing'eni, eiminie indamunot enye e modai.

²⁶Ekipik engolon e lukunya enyamali sapuk te siadi, ore tininyor batisho nikimut.

²⁷Ore oltung'ani ogol lukunya naa kegoliki oleng, neponiki kewan olaing'okoni kulie ng'ok kumok.

²⁸Meetae enkishiunoto oo ntabo natum oltung'ani owuasa amu etijing'a entorroni atua ninye nebulaki ntona.

²⁹Ore ilng'eni naa keiteng'en ate indung'eta e rashe o nkitanyaanyukot, neinining'isho oleng eyieu neng'enu. Eretoto oo laisinak

³⁰Ore eretoto oo laisinak naa keyau empalakino oo ng'ok anaa enaar enkare enkima nayupuyup.

³¹Ore pooki ng'ae oing'urrie olikae naa dukuya eing'or, ore nabo olong tenenyamalu naa kereti.