Read Maasai Bible – Biblia Sinyati Sirak 30 Bible Online

Sirak 30 - Maasai Bible – Biblia Sinyati bible

Sirak 30

¹Enkitubulunoto oo nkera Ore ilo onyor enkerai enye naa keosh, pee eshipakino irrekiei lenyena te siadi.

²Ore ilo oitame enkerai enye naa ketum dupoto te ninye, naa keng'idakino ninye.

³Ore ilo oiteng'en enkerai enye, netum ilmang'ati olom tialo ninye neng'idakino ninye te dukuya ilchoreta.

⁴Keidim atua menye, kake metiu anaa ketua, amu etung'uayie olotiu anaa ninye;

⁵ore eishu netoduaa neshipakino, ore pee eye neitu eisinanuo;

⁶amu etung'uayie oloitalaku elap too lmang'ati lenyena, olorrinyoki esupatisho too lchoreta.

⁷Ore ilo oitapong'oo enkerai enye neitanyamal inkiporo enyena, nenyamalu enkorrok enye te pooki kiyioi.

⁸Ore ina barta neitu eiteng'eni na keeku ng'arrng'arri, ore enkerai neitu eiteng'eni naa kegolong'u.

⁹Ore tininting'id enkerai ino naa aikitukurru, aashu intololoiki ninye naa aikiyaki osina.

¹⁰Mikueni tenebo o ninye, pee mitumutumu osina tenebo, ore te siadi niony ilala.

¹¹Mincho ninye enkitoo te kitisho enye, nimipalaa inkitadiat enyena.

¹²Inteng'ena menoto ening'unoto eton aa kiti, nitame eton aa kiti pee meg'olong'u ake nikiany kining nitum osina to ltau lino tialo ninye.

¹³Inteng'ena enkerai ino menoto enkanyit o eng'iriata pee mikurru ake too mbaa enyena e nkurruna. Biyotisho

¹⁴Enaikash oltung'ani aisinani negol naa biyoto alang oltung'ani karsis onyamal to sesen.

¹⁵Enaikash biyotisho o engolon alang saabu; ore osesen oata engolon neikash alang karsisisho.

¹⁶Meetae karsisisho sidai alang biyotisho o sesen nemeetae enchipai sidai nalang enchipai o ltau.

¹⁷Enaikash keeya alang enkishui o sina, o enkiyeng'iyeng oo ntarasi alang emuoyian nabik.

¹⁸Ore tinincho endaa sidai oltung'ani lemeidim ainosa netiu anaa endaa naitelekiaki enkurare.

¹⁹Kainyoo dupoto naishorieki inkitanyaanyukot inkishoorot? Amu menya nemeing'uaya, neijia ake sii etiu ilo otum enyamali to Laitoriani;

²⁰kedolisho too nkonyek enyena nenyamal anaa osunash neigor emuataki inkaik eselenkei. Enchipai o sina

²¹Mintanyamal kewan to sina, nimiyaki kewan enyamali te yieunoto ino makewan.

²²Ore enchipai o ltau naa enkishui oltung'ani, enchipai naisho oltung'ani enkishui naado.

²³Intishipa enkishui ino nilejilej oltau, nintalamaa osina amu etumuta ilkumok osina, nemetii dupoto atua sina.

²⁴Keitodorop olom o engoro enkishui, tinintanyamaluo nelotu emoruao asieku.

²⁵Ore ilo oata oltau le nchipai o ltau sidai nenarikino endaa enye.