Read Maasai Bible – Biblia Sinyati Sirak 32 Bible Online

Sirak 32 - Maasai Bible – Biblia Sinyati bible

Sirak 32

¹Tinikigeluni torikoi osirua, milepie kewan, kake totiwuo anaa ilkulikae tung'ana. Ing'ura ilomon intobiraki eton eitu ilo aton.

²Ore pee indip ataasa esiaai ino nindim atotona.

³Tenira moruo te mbata oo lomon, naa indim airoro; naa esipata ino ina. Kake keishakino niyiolo enijoito pee minyal osinkolio.

⁴Ore te neokishoi nimintoodor inkirorot inono. Mintoduaaya eng'eno ino eng'or enkata enye.

⁵Ore osinkolio to sirua loo naishi netiu anaa olmishire le rubi te saabu.

⁶Ore osinkolio omelok o enaisho netiu anaa olmishire le emarad te saabu.

⁷Ore te nira olbarnoti miro ake meteleku te rishata nanarikino, kake mme katitin are, naa tenaa ake ekitiaakaki iroro.

⁸Iroro esipata, tejo inkumok too rorei kuti; taa naa oloyiolo kake taa oloibooyo olng'ejep.

⁹Te niboitare ilkituaak nimintorisioki keon; ore eirorita nipal endala.

¹⁰Ore anaa enaiturruku enkiwang'ata te ndarata, eituruku enkanyit to ltung'ani oyanyit kewan.

¹¹Impang'a te wueji o sirua te rishata naishaakino, miaku ole siadi, isarisara shomo ang mintoki airang'irang.

¹²Taasa iniyieu nintiship kewan, kake mias eng'oki to rorei lo lwuasa.

¹³Ore te nkaraki kuna baa, isisa Enkai, ilo likintobirua nikincho enkishooroto enye sidai. Aibalunye inkitanapat

¹⁴Ore oloure Enkai naa kenyorraa enkitamioto, ore lelo oodumunye aayooki aaing'oru Enkai naa ketum omom.

¹⁵Ore ilo oing'oru inkitanapat naa keiputakini inkitanapat, kake ore isunkuro naa kebatata.

¹⁶Ore lelo oure Olaitoriani naa keeta enkiguana nasipa, naa kewang inkiasin enye.

¹⁷Keany olaing'okoni eutaroto, neing'oru inaas te yieunoto enye.

¹⁸Keshilaa oltung'ani ng'en inkirorot kake ore olarruoni o lowuasa nemeure aitoki.

¹⁹Mias ai toki eitu ing'as adamisho, ore ake pee indip ataasa toki, ming'or siadi ajo keyieu naaji naa ai toki ataasa.

²⁰Misuj inkoitoi naata ilkobi kumok, mibatatakino ake osoit.

²¹Misilig oleng enkoitoi naitoriori,

²²kake teng'ena oleng too nkoitoi inono.

²³Irrita kewan te nkias pooki nias, tinias neijia naa inkitanapat imbung'ita.

²⁴Ore oloiruk inkitanapat naa keibung inkitanapat Olaitoriani. Ore ilo oisilig Enkai nemetum entorroni.