Read Maasai Bible – Biblia Sinyati Sirak 33 Bible Online

Sirak 33 - Maasai Bible – Biblia Sinyati bible

Sirak 33

¹Meetae entorroni natum ilo oure Olaitoriani, ore te rishata oo ntemat naa kekordu ninye Olaitoriani.

²Ore oltung'ani ng'en naa kenyor inkitanapat kake ore osunkuroi nenyanyukie emeli natii empolos olkutati le naiposha.

³Ore oloata ening'unoto naa keisilig inkitanapat; ore te ninye na keisiligayu inkitanapat anaa enayieu Enkai.

⁴Terretena enijo pee ijo naa aikinining'i, Terretena tenebo iniyiolo niwal.

⁵Etiu oltau omoda anaa enkeju e ngari ore indamunot netiu anaa osankolinkol.

⁶Kenyaanyukie olchore likikweniyie embarta, keishir embarta tiabori pooki ng'ae oked ninye. Menyaanyukoro iltung'ana

⁷Kainyioo pee eikash enkolong nabo alang ae olong naa ketum pooki ewang'an naing'uaa enkolong?

⁸Olaitoriani otonyorra aitapaash neitaa irishat napaasha o nkolong'i o siruai,

⁹eiteng'ela neitisiny inkulie olong'i neitaa inkulie olong'i ineme netipat.

¹⁰Te nterit eitayioki ltung'ana pooki anaa sii ninye Adam.

¹¹Ore te ng'eno pooki o Laitoriani netirisha ninche neibalie inkoitoi enye napaashipaasha,

¹²etamayiana ilkulikae neilepunye, ore ilkulikae neitisiny neitinyikaki kewan, nedek ilkulikae neitadoyio, neara ninche te wueji enye.

¹³Ore anaa enatiu inkulupuok te nkaina o laitobirani, neijia etiu oltung'ani te nkaina o loitobiriua, eitobirua ninye anaa enayieu.

¹⁴Esidano nalusoo te ntorroni, nelusoo enkishui te keeya neijia etiu eetae ake olaing'okoni neetae oloure Enkai.

¹⁵Ing'ura isiaaitin pooki eilo otii shumata aisul, era ninche maare.

¹⁶Ataa nanu olobayie aing'or nena, anaa oltung'ani oiturrurru isabibu eidipa ilaikesak aikesaa kake naamayian Olaitoriani nadupoyu naiput enkironyet ai oo sabibu anaa ilo oikesishe.

¹⁷Tayiolo ajo eitu asaaki kewan ai esiaai, kake aatasaka lelo pooki osuj enkikoo.

¹⁸Entoning'oki intae oora kituaak too ltung'ana, entoning'oki sii ilarikok. Talakunye ntarasi

¹⁹Minchoyo engolon ino eton inchu; aisho enkerai aashu entomononi, olalashe aashu olchore, nimincho masaa inono likae, mimbelekeny ake indamunot inono nikitoki ainosu.

²⁰Ore eton inchu niata enkishui tiatua iyie, mincho naa likae tung'ani eya erishata ino.

²¹Enaikash pee kisilig inkera inono alang tinianyu inkera inono mikitaramata.

²²Tonyuaa te pooki nias; minyorraa ake olduruk pooki tialo enkanyit ino.

²³Ore te rishata naaiting enkishui ino, te nkata e keeya, tooro enjung'ore ino. Eramatata oo rrindiki

²⁴Ore inkujit e ng'udi o lolan naa ino sikiria ore endaa o enkanyit o esiaai naa ino rrindik.

²⁵Inchoo orrindik lino esiaai naa ilo ayeng'iyeng'a, tung'uai inkaik enyena meena na ketum elakunoto.

²⁶Indim aitoborro eng'ues te nchata oo murto, keeta sii ninye orindik enkoitoi naitameyieki.

²⁷Inchoo easisho pee meton ake pesho, amu keiteng'enisho entonata e pesho imbaa torrok.

²⁸Inchoo ninye easisho, anaa enanarikino ninye, naa te nemeiruk, intirrisha esiaai enye.

²⁹Mias ake ae toki metii eng'eno nimintaas oltung'ani enemeishiaa.

³⁰Tiniata orrindik inchoo ninye etiu anaa iyie, amu inyang'ua ninye te nkinyinyiret.

³¹Tiniata orrindik, taramata anaa olalashe lino linyor amu iyieu ninye anaa eniyeu oltau lino. Teninyal ninye neisik alo, kaji isujaki ninye atumie?