Read Maasai Bible – Biblia Sinyati Sirak 34 Bible Online

Sirak 34 - Maasai Bible – Biblia Sinyati bible

Sirak 34

¹Ine pesho nkidetidetat Ore oltung'ani lemeeta ening'unoto neeta inkisiligat e pesho, keisho enkidetidet olmodai inaipuko naalotie.

²Ore anaa oloibung oloip nemirare osiwuo, neijia etiu oloiruk enkidetidet.

³Etiu inidol te nkidetidet anaa inidol te inking'uret te nkomom ino.

⁴Kaa toki eidimi aaisuja to loirerio? Keidimi aanoto esipata te lejare?

⁵Ore nkidetidet, enaibon, ilmonek naa emodai pooki; netiu anaa ndamunot nemewang enkitok nasaisai[2].

⁶Mishilaa ake nena tokitin neme Olotii Shumata Aisul eing'uaa makewan.

⁷Eteleja iltung'ana kumok enkidetidet, ore lelo opik osiligi netukurrutua.

⁸Aibayarot inkitanapat metii elejare naa bayaroti eng'eno to ltung'ani asipani. Elototo

⁹Ore enkong naipanga naa aingen, naa arriya te nkiroroto.

¹⁰Ore oltung'ani leitu etum inyamalaritin nemeyiolo inkumok,

¹¹Atodua ntokitin kumok alotoo, naa kaning'u alang enaidim atolimu.

¹²Atijing'a erishata e batisho e keeya, kake eitu aye te nkaraki ena yiolounoto. Turia Olaitoriani

¹³Ore enkiyanget e lelo oure Olaitoriani naa kebikoo, amu Olaitoriani osiligi lenye.

¹⁴Ore ilo oure Olaitoriani nemekuret, aashu edalare ilkureti, amu Olaitoriani osiligi lenye.

¹⁵Emayiana oltau le ilo oure Olaitoriani! Aing'ae eing'or ninye? Naa aing'ae eretoto enye?

¹⁶Etii inkonyek Olaitoriani shumata lelo oonyor ninye e rripoto kitok o eretoto nagol, oloip te ndama naa osempewuet to siwuo kitok, erripoto tialo embatatata nemitu pee mebatata.

¹⁷Kedumu oltau neisho ewangan inkonyek; keisho enkishui o enkishiunoto o mayianat. Enkishooroto o lasarri

¹⁸Tinintayu olasar teina ninoto te nkoitoi torrono, nemesinya ilo asar; menyorraroyu too nkitanapat e nkishooroto.

¹⁹Meshipakino olotii shumata aisul inkishoorot entorroni nemenyorraa ing'ok te nkumoi oo lasarri.

²⁰Ore pooki oyau masaa olaisinani aitaa nkishoorot, netiu anaa olosesekuan enkerai te dukuya menye.

²¹Ore endaa o ltung'ani onyamal naa enkishui olaisinani; ore oloisimaa endaa olaisinani naa olarani.

²²Tinimitiki olaisiaayiani ole koisiaayio lenye netiu anaa osarge imbukoyie, tinioru ole latia ino enkinyinyiret enye nitasesekuana ninye.

²³Amaa teneshetisho likae neng'er likae, kainyoo dupoto enye aime esiaai e pesho?

²⁴Te neomon oltung'ani obo, nedekisho olikae, kalo ening Olaitoriani?

²⁵Te neitukuo oltung'ani eibung'a osesen otua, neitoki aibung kainyoo dupoto enkitukuoto o nkaik?

²⁶Teneen oltung'ani te nkaraki ing'ok enyena, neitoki alo aas ina ng'oki, aing'ae oning enkomono enye?