Read Maasai Bible – Biblia Sinyati Sirak 35 Bible Online

Sirak 35 - Maasai Bible – Biblia Sinyati bible

Sirak 35

¹Ore oloibung inkitanapat neitayu inkishoorot kumok; ore olosuj inkitanapat neitayio olasar le seriani.

²Ore oloshuku esidano neishorua enkishooroto e ntapa sidai, ore oloishoru inkishoorot aisho laisinak neishorua enkishooroto enashe.

³Ore oloing'uaa intorok naa keitiship Olaitoriani, neitayu olasar le mpalakinoto oo ngok.

⁴Milo ake dukuya Olaitoriani too nkaik naa narok,

⁵amu keasi kuna tokitin pooki te nkaraki nkitanapat.

⁶Ore pee eitayu oltung'ani supat olasarr, nedou eilata to lperere neilepaki esong'ouna narropil olotii shumata aisul.

⁷Keng'amaa Olaitoriani olasar lo ltung'ani supat, nemerikinisho aikata.

⁸Eisisa Olaitoriani te nkitoo enye, nintayu te leng'on ilng'anayio le dukuya loo nkaik inono.

⁹Ore te nkishooroto pooki intodolu enkomom enchipai, nintayu ematua e tomon ino te nchipai.

¹⁰Inchoo olotii shumata aisul anaa enikichoo, inchoo te nchipai o te leng'on anaa enanoto enkaina ino.

¹¹Amu Olaitoriani olakisho naa aikilaaki katitin napishana.

¹²Mirop Olaitoriani, amu menyorraa; neimisilig olasar lemesinya: olaiguanani Olaitoriani nemeeta ninye olkep. Esipata e Nkai

¹³Meitodolu Olaitoriani olkep to laisinani; naa kening enkomono e ilo oitarruoyie.

¹⁴Memenaa enkomono eilo lemeeta menye, aashu e nkoliai te nelimu osina lenye.

¹⁵Keitang'or ilkiyio le nkoliai ilo oitang'or ninye metabatatayu.

¹⁶Keng'amaa, Olaitoriani ilo oitiship ninye naa kebaya enkomono enye keper.

¹⁷Kepolos enkomono oltung'ani oborr inkatampo, negiroo inkatampo o metabaiki Olaitoriani; nemeitirring'a o metaparana olotii shumata aisul, neitaas esipata lelo supati nedung enkiguana.

¹⁸Meimutie Olaitoriani, nemeng'iriakino ninche ometaba anaa nepurd lelo lemeeta olng'ur neitalaku elap too nkuapi; o metaba anaa negil enkitoria oo lemesinya;

¹⁹ometaba anaa nelaaki pooki tung'ani te risoroto oo nkiasin enyena o inkikoot enye; neiguanare iltung'ana lenyena neitiship ninche to lng'ur lenye.

²⁰Ore te rishata e nyamali neitoomon olng'ur lenye anaa enchan nasha etulusoyie olameyu oodo.