Read Maasai Bible – Biblia Sinyati Sirak 36 Bible Online

Sirak 36 - Maasai Bible – Biblia Sinyati bible

Sirak 36

¹Enkomono e Israel Ing'urie iyiook, iyie Olaitoriani, Enkai e pooki, ning'or iyiook,

²nincho pooki osho meitasho te nkuretisho te nkaraki iyie.

³Tudumu inkaik inono tialo inkuapi eiking'a nincho ninche metodua enkidimata ino.

⁴Ore te iyiook nikintisinyaki te dukuya ninche, ore te ninche mikilepunyieki te dukuya iyiook;

⁵nincho ninche mikitayoloito, anaa enikitayioloito meetae ae Ai nemee iyie, Olaitoriani.

⁶Intodolu olmonokie ng'ejuk, niaas imbaa e nking'asia; imputa enkitoo enkaina ino e tatene.

⁷Tuputu eng'oro nibuku eng'oro ino; tumuta olianyalani nijutoo olmang'atinta.

⁸Terretena enkolong nidamu erishata naishoruno ninken inkiaasin inono kituaak.

⁹Inchoo ololo anyoku emuti te ngoro napi ore lelo oitaruoo iltung'ana linono netumore enkidaata.

¹⁰Tumuta ilukuny o laitoriaak mang'ati, lelo oojo, “Meetae kulikae lemee iyiook maate.”

¹¹Inturrurro olosho pooki le Yakobo, nincho ninche enjungore enye anaa enatiu te nkiterunoto.

¹²Ing'urie iltung'ana oipotieki enkarna ino iyie Olaitoriani, ing'urie Israel naitanyanyukieki olayioni kikau.

¹³Ing'urie enkanasa ewueji ino sinyati, Yerusalem ewueji ino enkiyeng'iyeng.

¹⁴Imputa Sion osirua lo mbaa inono e nking'asia, imputa enkitoo enkaji ino.

¹⁵Inchakenoki lelo lintobirua te nkiterunoto, nintabaya enaibon nairoroki te nkarna ino.

¹⁶Talaaki lelo likianyu iyie, nincho iloibonok linono etumi aa sipak.

¹⁷Toningo, iyie Olaitoriani enkomono osinka lino, anaa enatiu too mayianat e Aron too ltung'ana linono ore ilootii enkop neyiolou aajo ira Olaitoriani, Enkai e apa moitie. Enking'orunoto e nkitok

¹⁸Keidimi aainosa endaa pooki, kake keikash kulie daiki alang kulie.

¹⁹Ore anaa enaidim olng'ejep aishamishama inkiri oo mpukunot naapaasha, neijia ake etiu endukuya ng'en, keidim atayiolo irorei le lejare.

²⁰Ore endamunoto napaashari neyau osina, kake ore oltung'ani oata enkarriyiano netum elaakinoto sidai.

²¹Kenyorra enkitok olee pooki aitaa olapayian, kake keeta enkitok nabo olkuaak sidai alang enkae.

²²Keitiship olee esidano e nkitok; neitulus eyeunoto e pooki tung'ani.

²³Ore pee edede emborron o esidano too nkirorot enyena nemetiu olee lenye anaa ilkulikae lewa.

²⁴Ore olonoto enkitok nenoto entoki sidai, enkitok naitagol neret ninye.

²⁵Ore enemetii olpaashe naa keeim olapurroni nepurrisho, ore enemetii enkitok netii enkurruna.

²⁶Kaing'ae naisilig olapuroni oruk nkanas o nkanas, enyanyukie olee lemeeta ang oirrag wuejitin nepaasha inkewaritin pooki.