Read Maasai Bible – Biblia Sinyati Sirak 37 Bible Online

Sirak 37 - Maasai Bible – Biblia Sinyati bible

Sirak 37

¹Shoruetisho nemesipa Keidim oltung'ani atejo kara olchore lino, kake ore ilkulikae tung'ana naa ilchoreta ake too nkarn.

²Aitorrono osina oyau olchore odede te neibelekenya, kenyanyuk o keeya.

³Entoroni nikiata! Kaji eikuna pee eiputa e nkop lejare?

⁴Ore embata oo lalashera neshipakino enchipai olchore, kake ore te nkata e nyamali neing'uaa.

⁵Keretu ilkulikae olchore te nkaraki endaa, kake ore te nkata olarrabal, nelony maate.

⁶Mirrikino olchore lino osipa; naa tiniaaku karsis mijutoo to ltau lino. Enjurrore e nkikoo naishiaakino

⁷Keikokisho olaaikoni, kake eikokisho kulikae te nkaraki dupoto enye maate.

⁸Teng'ena to laikooni, tang'asa tujurru enayieu, amu ebaiki naa kewan ake edamu. Keidimayu pee eidipa aterretena embaye tialo iyie.

⁹Aikisiligie iyie aajo aisidain imbaa pooki te iyie neitashe te nelakua pee edol imbaa nikipuo aatumore.

¹⁰Minkilikuanu enkikoo to ltung'ani limikisilig, nimincho enkikoo oltung'ani likiduaaki olom.

¹¹Ming'oru enkikoo te nkitok too naipirta inag'ilunore ninye, ming'oru enkikoo to ltung'ani kuret too naipirta olarrabal, to lainyangani too mbaa naipirta enkinyanga, to lainyangani too naipirta emirare o masaa, to ltung'ani ogol lukuny too naipirta emboron, to ltung'ani turuai too naipirta esiaai, to laisiyiayani too mbaa naipirta enkidipata esiaai aashu to rrindik oshal too naipirta esiaai nagol. Mishila iltung'ana le ina pukunoto, te ntumoto e nkikoo.

¹²Ore to rishat pooki taboitare oltung'ani le Nkai liyiolo ajo olasujani lo nkitanapat nening'o oltau lenye o lino nemeisinanuo te nilaikino ai toki pooki.

¹³Isiliga oleng enkikoo oltau lino amu meeta oloisilig'ayu olang oltau lino.

¹⁴Ore too rishat kumok oltau lo ltung'ani naa keisho enkikoo sidai alang ilairritak opishana orripisho too ltaleta.

¹⁵Ore te pooki toomono Enkai kitok pee etum atorikoi enkoitoi ino te sipata. Eng'eno nagut o nkitieunoto

¹⁶Neaku eng'eno olkitamanyunoto le pooki kias, nemurutoo enkikoo enkias pooki.

¹⁷Etii ndamunot pooki oltau, ore to ltau nelioyu mpukunot ong'uan:

¹⁸esidano o enkairuoisho, enkishui o keeya naa olng'ejep Olaitoriani le pooki.

¹⁹Keidim oltung'ani anoto eng'eno neaku alaiteng'enani lo lkumok, kake meeta tipat te ninye makewan.

²⁰Keidimi aibai oltung'ani arriyia te nkiroroto ometaba anaa nelau endaa,

²¹amu eitu eisho Olaitoriani empiris, amu meeta eng'eno.

²²Eeta likae eng'eno te dupoto enye makewan neirrita ilomon lenyena te sipata.

²³Ore oltung'ani ng'en neiteng'en iltung'ana lenyena, naa keibalayu enkarriyiano enye.

²⁴Keisisi oltung'ani ng'en te nkumoi, ore pooki odol neipot ajo oloshipa.

²⁵Keikena inkolong'i enkishui oltung'ani, kake ore inkolong'i oo Siraeli nemeikenayu.

²⁶Ketum oltung'ani ng'en enkanyit too ltung'ana lenyena, nebikoo enkarna enye intarasi. Enkinosata e ndaa sidai

²⁷Enkerai ai nenenga enkorok ino eton inchu todua ajo kainyoo entorrono te iyie pee ipashare.

²⁸Mesidai pooki toki te pooki tung'ani, nemee pooki tung'ani oshipakino pooki toki.

²⁹Miata yieuna e pooki arrueisho, nimiaaku orrindik le ndaa.

³⁰Ore enkinosata e ndaa sapuk neyau emwoyian, neyau enkisepe entiroto enkoshoke.

³¹Etuata ilkumok te nkaraki enkisepe, ore olopashare enkisepe neitoodor enkishui enye.