Read Maasai Bible – Biblia Sinyati Sirak 38 Bible Online

Sirak 38 - Maasai Bible – Biblia Sinyati bible

Sirak 38

¹Emwoyian o lchani Inchoo olabaani enkanyit naishakino, te nkaraki embaare enye amu Olaitoriani oitobirua.

²Ore enkishooroto enye o enkishiunoto neing'uaa Enkai kitok; netum ninye enkishooroto naing'uaa olaiguanani.

³Eyanyiti olabaani te nkarriyiano enye neyanyiti tenebo iloora kituaak neaku ninye yioloti.

⁴Enkai naitobirua olchani te nkop, ore oltung'ani ng'en nememenaa.

⁵Aime enkare eitamelononoki to lchani pee eyiolouni eng'olon enye kitok?

⁶Neisho iltung'ana enkarriyiano pee eisisi ninye to nkiaasin e nking'asia.

⁷To lchani eishiunye iltung'ana neiwangie emion;

⁸Eitushul olaitushulani lo lkeek olchani, ore isiaatin Olaitoriani nemeeta enkiting'oto; ore biotisho pooki te nkop neing'uaa Enkai.

⁹Enkerai ai ore tenimwoyu mig'olong'u ake kake tomono Olaitoriani naa aikinchiunye.

¹⁰Tung'uai inkitaruorot inono, tumuta taasa isidaain, nintisiny oltau lino too ng'ok pooki.

¹¹Intaiki Enkai enkishooroto naata esong'ouna sidai, enkishooroto endamunoto entapa sidai. Isirisiraki enkishooroto ino eilata naba anaa enindim anoto.

¹²Ore inkulie ning'uieki olabaani amu Olaitoriani oitobirua ninye, mincho king'uaa amu iyieu ninye.

¹³Etae enkata naa ore enkishiunoto naa olabaani eingua.

¹⁴Keomon sii ilabaak pee eisho Enkai dupoto te njurrore enye o te nkishiunoto pee eidim aitajeu enkishui.

¹⁵Ore oloas eng'oki te dukuya olaitobirani lenye, tung'uai metabatatayu to nkaik oo labaak. Olkiyoiyi too lotuata

¹⁶Enkerai ai inchiraki oltung'ani otua; inchira te mion, intoduai olkiyoi lino. Tunukai osesen lenye te nkanyit anaa enaishakino, nimimenaa enukaroto enye.

¹⁷Inchira to ltau le mion, shomo eneturorieki olotua anaa enaishakino, inchira inkolong'i are uni pee melo ake nikiji mitumoki ailejilejayu to sina lino.

¹⁸Keidim ayau olkiyoi keeya, ore osina lo ltau naa keishu engolon osesen.

¹⁹Ore pee eiwang'ieki oltung'ani te nkop eishunye osina, kake ore osina lo laisinani neitashal oltau.

²⁰Minyoraa oltau lino meitoria olkiyioi; taarai ninye idamu enkiting'oto e nkishui.

²¹Mincho kirikino ajo meetae enchukunoto; miretu oltau ti ae toki naa kewan ake igira aitanyamal.

²²“Tadamu ajo iye anaa enatua ng'ole ninye ore taisere naa iyie.”

²³Ore etii ilotuata enkiyeng'iyeng, inchoo endamunoto enye eitiringa, elejilejata te ninye anaa pee elo enkiyang'et enye.

²⁴Keidimie enkorrok olaisumani meiteng'enayu eng'eno, ore oloata mbaa kuti neidim anoto enkarriayiano.

²⁵Kaji eiko pee etum enkarriyiano oltung'ani oitanyamalwuo ake to lchempe? Ore engida enye naa pee eponaa nkishu, neisho meteyatai olchempe, ore inkirorot enyena pooki naa inaipirta nkishu!

²⁶Ore indamunot enyena naa pee easisho too nkurman, neitoti ilasho lenyena.

²⁷Neijia etiu te pooki aisiayiani o ilo oas esiaai dama o kewarie; ore iloiger ilmishiren neitobiru te nkarriyiano; nenyok aitayu isidain, nenyok aidip esiaai enye.

²⁸Neijia ake etiu to lkunoni te neitobirishore; kedamu enas te sekenkei enye amu keitashal ilng'ejepa le nkima osesen lenye, eng'iriakino enkirowuaj olkokwet o ltoilo eosh esekenkei nenuk inkiyia enyena, nekurakino inkonyek enyena esekenkei enye. Ore to ltau lenye neteretene pee eidip esiaai enye.

²⁹Neijia ake etiu to laitobirani loo motiok oo nkulupuok, eitamana enkeju engari naitobirishore te nkeju enye, nerretena anaake neshololo pee eidip esiana nayieuni.

³⁰Neitobir esarg'ab too nkaik enyena neipurj too nkejek enyena. Nenyok oleng aidip esiaai enye, neing'or oleng pee eituku ina naitobirishore.

³¹Ore kuna pooki naa inkaik enyena etii, naa kaarriyia pooki te siaai enye.

³²Ore meetae ninche nemeidimi aitasheyie olkerenket nemeidim iltung'ana ataaparan aashu emany ine.

³³Ore eyia, mebaya ninye pee eaku olturur loo ltung'ana, nemeidim aitabai eumata oo ltung'ana nemeidim atayiolo enkig'uana naitayuni.

³⁴Nemeidim atolimu inkiteng'enat aashu inkiteng'enat oo nkitanapat, neitu edoli esishore intepen.