Read Maasai Bible – Biblia Sinyati Sirak 39 Bible Online

Sirak 39 - Maasai Bible – Biblia Sinyati bible

Sirak 39

¹Kake ore olorretena pee eiteng'ena inkitanap Enkai kitok, neing'oru eng'eno o ltung'ana li apa, neyiolou enatejo iloibonok.

²Kerrip inkirorot oo ltung'ana yiolot, neibalunye mbaa naagoli oo nkitanyaanyukot.

³Keing'oru iwaleta o nkisudorot o ndung'eta e rashe, ore indung'eta erashe naitanyamalisho nemenyamali te ninye.

⁴Kelo aasisho tenebo o ltung'ana kituaak netumore ilaitoriak; kelo ninye inkuapi e iking'a, amu keishamisham isidain o ntorok too ltung'ana.

⁵Ore tedekenya neinyototo to ltau pooki o te nkisosion neomon Enkai olaitobirani lenye; neomon Enkai kitok, nebol enkutuk enye aserem, neomonu empalikino o ng'ok enyena.

⁶Ore te neyieu Enkai natii shumata neiput ilo tung'ani eng'eno, neiro ilomon le ng'eno neisho Enkai enashe te nkomono.

⁷Ketum eng'eno o nkikoot naidim aishooi o mbolokinot naaisudoro Olaitoriani.

⁸Keitodolu enkarriyiano nanoto o esidano o nkitanapat osotua lo Laitoriani.

⁹Kepuo iltung'ana kumok aisis enkarriyiano enye, nemerikinisho aikata. Kebikoo endamunoto enye, nedamuni enkarna enye too ishooritin pooki.

¹⁰Kelikioo inkuapi eng'eno enye, nelikioo eumata oltung'ana enkisisa enye.

¹¹Kebik inkolong'i kumok neing'uaa ekarna sidai aisul ilkulikae tung'ana; naa te neye te nkang enye netanareyia. Osinkolio oisisieki e Nkai

¹²Kaata inkumok natadamwua najo naaiputa anaa olapa obore.

¹³Entoning'oki nakera sinyat nabulu anaa inkaitubulu nabulu te mbata e nkare;

¹⁴entaa esong'ouna sidai, entapuka anaa intapuka olchani sidai endapasha to loing'ang'e esong'ouna inyi niranyiranya osinkolio le nkisisa; esisa Olaitoriani te nkaraki inkiasin enyena pooki.

¹⁵Entolikioi enkitoo enkarna enye, enchoo enashe to sinkoliotin le nkisisa, entaranyaki too nkutukie inyi o too masaa eranyare. Ore inchosho enashe entaranyaki inji:

¹⁶“Ore ntokitin pooki naa esiaai Olaitoriani, amu aisidain, naa ore pooki naitanapisho neesayu te nkata enye.”

¹⁷Meetai oloidim atejo “kainyoo ena?” “Kainyo paa neijia?” Amu keesayu intokitin pooki te nkata e Nkai. Eitashe e nkare to rorei lenye, neitirring'a nkariak to rorei lenye.

¹⁸Ore pooki naitiship ninye naa keesayu te nkitanapata enye, nemeetai oloidim aiboi eng'olon enye naitajeusho.

¹⁹Keibala inkiasin enena naitobirua, meetae enaidim aisudori te dukuya ninye.

²⁰Meetae entoki enking'asia te Nkai intarasi o ntarasi.

²¹Meetae oloidim aikilikuanu ajo kainyoo ena? “Kainyoo paa nejia?” Eitobiruaki pooki te nkisiayiare enye.

²²Eimulumul imayianat enyenak enkop natoyio anaa olkeju le nkare, neitashal enkop anaa oloirrag le nkare.

²³Kemira eng'oro Enkai iloshon anaa enawal inkariak sidain aitaa emunyan.

²⁴Ore too sinyat naa keitoriori inkotoi enye, ore too ltung'ana arruok neeta inkoitoi enye ilkobi.

²⁵Ore te nkiterunoto neitobirakaki intokitin sidain iltung'ana sidain, neijia etiu intokitin torok too laing'okok.

²⁶Ore iyieunot e tipat te nkishui o ltung'ani naa enkare, enkima, esekenkei o emunyan, e ntapa o kule e naisho o lotorok e naisho oo sabibu o eilata o nkilani.

²⁷Aisidain kuna pooki te lelo oure Enkai, kake keibelekenya aaku intorok to laing'okok.

²⁸Eetae isiwoishi oitobiruaki pee eitalaku elap, ore te ng'oro enye naa keitameisho oleng; keitodolu eng'olon enye te nkata enkiguana, neitigir eng'oro Enkai naitobirua ninche.

²⁹Ore enkima e nchan o soito e sumash o mwoyaritin neitobiruaki pooki pee eitame iltung'ana

³⁰ilala lo ng'uesi torok e ndenkel o lasurai neitame iltung'ana lemeure e Nkai te mutata.

³¹Keshipa pooki eitabaya inkitanapat Olaitoriani; eterretenate te nkop pee eisiai, ore pee ebau erishata nemeg'olong'aki inkitanapat enyena.

³²Neaku kaata enkitisipata e kuna baa eiteru apa te nkiterunoto; aibirribira naiger.

³³Asidain inkiasin Olaitoriani, naa keishoyo pooki yieunoto te saa eyieunoto.

³⁴Nemeetae oloidim atejo, “Aitorrono ena alang enda,” amu kesidanu pooki toki te rishata enye.

³⁵Neaku entaranyaki enkisisa to ltauja oo too ltoiloishi linyi, nimayianana enkarna Olaitoriani.