Read Maasai Bible – Biblia Sinyati Sirak 40 Bible Online

Sirak 40 - Maasai Bible – Biblia Sinyati bible

Sirak 40

¹Enyamali e Nkishui o ltung'ani Eitobiruaki isiaitin naagol too ltung'ana pooki, keeta iltung'ana ilolan oiroshi anaaa pee eini ometab anaa neshukokino nkulupuok naa ng'oto iltung'ana pooki.

²Ore olng'ash lenye e nkuretisho oo ltauja o nkuretisho enye naa enkolong e keeya

³eiteru to laiguanani etii enkitoo enye o ltolut oshal otonita too nkuruon,

⁴eiteru to lkarsis o nkilani enyena mugiein o enkopiyia e nkitoo te lukunya enye o metabaiki olaisinani oishop ilkuniyiani.

⁵Ore pooki toki naa eng'oro, olom, enyamali o lng'ash o enkuretisho e keeya, mang'atisho o enchankar. Ometaba anaa ore pee eirura te rruat enye neitanyamal indamunot injo enyena.

⁶Ketum injo kuti aashu eirura pi; naa ore eirura, nebolu inkonyek. Neitanyamal induaat te nkidetidet enye, netiu anaa oltung'ani oilanya olarrabal etii olkereri le dukuya

⁷ore te rishata naitajeuni nenig'ishoyu, neing'asia enkuretisho enye ajo enepesho.

⁸Neijia etiu to nkitobirunot pooki, to ltung'ani o to ng'uesi ore to laing'okoni katitin napishana,

⁹ore too rishat kumok keeya o enkibukoroto o sarge, ilarrabali, keeya, esumash, olosilisili o lmeita.

¹⁰Ore kuna pooki neitobirakaki ilaing'okok, naa te ntoroni eewuo oloirag le nkare.

¹¹Ore intokitin pooki naing'uaa enkop naa kerrinyokino enkop, ore enaing'uaa enkare nerrinyokino enaiposha.

¹²Kejuti eropare pooki o enkironya, kake ore enkirukoto sidai nebikoo intarasi.

¹³Ketoyu masaa olarruok anaa olkeju otoyio, kepurdpurda anaa enkikurukur te nkata e nchan sapuk.

¹⁴Ore oltung'ani oleng netum enchipai, kake ore iloitarruo neidaaya pii.

¹⁵Ore inkera e lelo lemeure Enkai nemetum oltung'ani oneneng, etiu ninche anaa intona nashali te ndapidapoi.

¹⁶Kedotuni iseyia otii enkiyopata olkeju eton eitu edotuni inkujit.

¹⁷Etiu emborron anaa enkurma oo mayianat nebikoo inkishoorot intarasi.

¹⁸Kemelok enkishui to ltung'ani oitasheiki kewan o laisiayiani kake keikash ilo oing'oru olchumati.

¹⁹Entumoto oo nkera o nchetata enkanasa naisho oltung'ani enkarna, kake keikash enkitok nemeeta entiyoto alang pokira are.

²⁰Keitiship enaisho o sinkolio oltau, kake asidai enyorrata e ng'eno alang kuna pokira are.

²¹Keitayu enkinanta e ranyare osinkolio omelok kake oltoilo oitishipisho osidai oleng.

²²Keshipakino inkonyek esidano oltung'ani, kake inkaitubulu naanyori o lanterera isidain aisul.

²³Kenarikino olchore o lalashe oleng kake tenetumo olee e nkitok esidai oleng.

²⁴Ore eretoto oo lalashera naa inerishata enyamali, kake kekordu eretoto oo laisinak aisul kuna pooki.

²⁵Keitasheyie saabu o nkosholai oltung'ani kake keng'uarrayu enkikoo sidai alang kuna pooki.

²⁶Kedumu eng'olon o karsisisho oltau, kake euriata Olaitoriani esidai alang pokira are, meeta entoki nilau te uriata Olaitoriani, naa tiniata ina kishooroto nimiyieu eretoto.

²⁷Etiu euriata Olaitoriani anaa enkurma oo mayianat nerrip oltung'ani alang dupoto ake pooki.

²⁸Enkerai ai, ming'uarr enkishui olaisinani omonisho; enaikash te niye alang te niomonisho.

²⁹Ore oltung'ani oton aing'or oilikae meishoo endaa, nebikito te nkishui torrono nemenarikino neji oltung'ani. Tiniton aisilig endaa e likae tung'ani nintukuru keon; ore oltung'ani oata eng'eno oiteng'enaki aitobiraki naa kebik.

³⁰Kemelok enkomono to ltung'ani lemeeta enkurruna, kake ore tiatua ninye netii enkima napejito.