Read Maasai Bible – Biblia Sinyati Sirak 42 Bible Online

Sirak 42 - Maasai Bible – Biblia Sinyati bible

Sirak 42

¹Olwuasa Ore te nkae shoto, naa kebaiki nikiaas eng'oki tinikincho kulikai tung'ana kumok aitulus. Noona kulie mbaa nimikurru te nkaraki ninche:

²nkitanapat olotii Shumata Aisul osotua lenye, aiguanare lelo tung'ana lemeure Enkai too nkiririkinot,

³aaorokino elaata oo mpisai o encholiek aashu lelo ooirimari, eoroto e njung'ore o lchoreta,

⁴itabaraka ayiolou soito ootemieki enkiroishi o mboreitin,

⁵intobira dupoto aa sapuk aashu kiti, eroro oo lamirak, enchoo inkera inyi enkanyit, entamio irrindiki lemeeta enkanyit omeibukori osarge.

⁶Isudoi ntokitin inono tenemesilagayu enkitok ino aashu te netii iltung'ana kumok.

⁷Ore pooki toki nintayu tayiolo esiana enye ninger pooki toki nichooyo aashu nitum.

⁸Emiureyu pooki tung'ani oitaalan neas mbaa anaa olmodai aashu oltung'ani moruo olo o mulayoni. Ore kuna pooki naa nkoon sidain, ore tinisuj naa kenyoraa pooki ng'ae olkuaak lino. Intoyie o loo menye

⁹Hoo nemeisho entito enye eyiolou, meirura menye kewarie te nkaraki entito enye. Ore tenaa kiti, keure ajo ebaiki nemetum olpayian. Ore teneyamaki, keure te nkaraki enchipai enye.

¹⁰Ore tenaa eselenkei nemeyiolo olee naa keure ajo ebaiki naa keirorie lewa neaku entuaa eton emanya enkaji enye. Ore tenaa keyama, keure ajo ebaiki neaku meisiligayu aashu koolupi.

¹¹Torripo entito ino te naa keyieu neas mbaa enyena. Te neme neijia naa ekintukurru te dukuya lmang'ati linono. Neaku enkuenia te pooki ng'ae too nkanas o eumata oo ltung'ana. Toduaa nchere meeta olgilata lenye elusie aashu ewueji naaidim atodolishore naipang'iaki te nkaji.

¹²Mincho ake eitoduaya esidano enye te dukuya ltung'ana aashu eya erishata enye airo o nkituaak.

¹³Ore nkituaak naa keitame nkulie anaa enaainyal olasai inkilani.

¹⁴Ore entoroni o ltung'ani naa keikash alang esidano enkitok, ore nkituaak naa keyau enkurruna o esulare. Enkitoo e Nkai te nkop

¹⁵Ore taata kaaitadamu esiaai o Laitoriani naibalie nena tokitin natoduaa. Eyawua ororei loo Laitoriani esiaai metaasayu, neanyit enkitobirunoto pooki e Nkai nkitanapat enyena.

¹⁶Ore ewangan e nkolong neitawang'aki pooki toki natii abori, ore pooki toki nebore enkitoo o Laitoriani.

¹⁷Eitu ninye eisho Olaitoriani lmalaika lenyena sinyat engolon neibalunye iasat enyena magil, hoo neishoo ninche engolon meitasho eserian te dukuya enkitoo enye.

¹⁸Kedol ninye enaiposha o atua oltau lo ltung'ani, neyiolo nkisudorot e pokira. Keyiolo ilo otii shumata aisul pooki toki nayiolounoyu, eyiolo sii lmonek loo lporori pooki.

¹⁹Keyiolo ninye nena pooki natii apa, o nena pooki naapuonu aasayu, kebolu ninye nkisudorot naagut.

²⁰Meeti hoo endamunoto nagiroo ninye, nemetii ororei oisudoro te ninye.

²¹Ore enkitobirunoto enye e nkop te nkarriyiano naa keitodolu engolon e ng'eno nagut enye nagut, nemeibelekenya ninye ntarasi o ntarasi. Meetae hoo toki naponikini, nemeetae toki nayai, meyieu ninye oltung'ani ooikok ninye.

²²Ore iasat enyena pooki naa aisidain, ometabaiki enkiti tiili e wang'an.

²³Ore kuna baa naa kepuo dukuya ntarasi, ore pooki naa keeta enaayieu neitabaya.

²⁴Ore pooki toki neibung'ieki maare, kake meetae hoo toki naitobira Olaitoriani neitu ebaya.

²⁵Ore pooki toki neitabaya esidano e aitoki ake. Keetae oltung'ani onauru eing'or ina kishiaa enye?