Read Maasai Bible – Biblia Sinyati Sirak 43 Bible Online

Sirak 43 - Maasai Bible – Biblia Sinyati bible

Sirak 43

¹Kebaa esidano o long'ang'e owang otii shumata iyiook! Kejaa enkitoo e sidano enye!

²Ore teneilepu enkolong neibalie esidano eina toki naitobirua olotii shumata aisul.

³Ore dama neitoi enkop, meetae hoo obo ong'iriakino ina kirowuaj.

⁴Ore edoyio enkolong nepej shumata oo ldonyio anaa esekenkei napejo te nkima. Neitayu iltiil, neitamodok nkonyek te nkaraki ewang'an.

⁵Ore Olaitoriani oitayio ninye naa aikitok, neitasiooyo te nkitanapata enye.

⁶Netii sii olapa anaa olmonekie le rishata nagiroo, olmonekie loo ntarasi oo rishat naibelekenya.

⁷Ore olapa naa ninye oiken neyiolou nkolong'i sinyat. Ore ewang'an enye naa keibulaa neitoki ailiilaa.

⁸Ore “olapa” naa keishori enkarna anaa olapa, enking'asia tinidol ebulu aaku sapuk kewarie, olmonekie le wang'an enjore e keper, naitawang shumata.

⁹Ore ilakir oowang neitaa sidai oleng shumata te nkewarie, masaa naawang o Laitoriani le shumata.

¹⁰Netoni ninche too wuejitin naatipika Osinyati, neitu eyeng'iyeng'ie ninche erripoto enye.

¹¹Ing'ura olokirrai, nisis ilo Oitobirua! Kebaa ina sidano e wang'an enye!

¹²Keitaman olong'ang'e te nkitoo e wang'an enye, eitorioyie Enkai inkaik enyena.

¹³Keitanapisho ninye neiteru aadou anaa isooito le nchan, neilang'ilang enkiwuang'ata tenejo ninye.

¹⁴Nebolo ilgilat le shumata, ore nkatampo nepuku anaa motonyi naapuo tiaai.

¹⁵Ore te ngolon enye neitobir nkatampo kumok, nebel ilo soit le nkare neaku enchan oo soito.

¹⁶Teneipang'u ninye neikirrikira oldoinyo, ore te yieunoto enye nelotu osiwuo sapuk.

¹⁷Ore oltoilo lenye le nkikurukurr neisikong enkop, ore osiwuo le moikuape o lkutati neidapash ilo soit le nkare anaa motonyi naapuo tiaai aadou, ore edounoto enye netiu anaa lmaat edou.

¹⁸Neing'asiakino nkonyek esidano e nkiborra enye, Neing'asia oltau te ndoyoroto enye.

¹⁹Neidapashaki enkinuku enkop anaa emunyan, nemuguta aaku ilkiku loo ntapuka osoit le nkare.

²⁰Neirriwa olkutati le nkijape nairobi e moikupe, neibung'a enkare aaku osoit le nkare, nemuguta enaiposha o silanke[3], neaku anaa enkila o lgoo.

²¹Nemut ildonyio nepejoo ong'ata too lameyu, neibelekenya nkujit aaiborru te nkaraki enkirowuaj.

²²Kake neshukoki enkishui enkinuku e nkatampoi, ore teniteru airopiju neliooyu enkoleelio.

²³Ore te ng'eno enye nagut neitigir enaiposha, nepik enkop natoyio ine.

²⁴Nelimu lelo arewak le meli batisho e naiposha, niking'asiakino nena nikitoning'o.

²⁵Ore enaiposha naa ketii ingu'esi e nking'asia, ingu'esi sapuki o mpukunot pooki oo ingu'esi naishu.

²⁶Ore pooki kiliku loo Laitoriani neishur te siaai enye. Eibung'ate pooki toki aaku nabo te nkaraki ororei lenye.

²⁷Aikiindim aatejo nkumok nemeishunye, kake ore eneikununo naa ena: Ore Olaitoriani naa ninye pooki toki.

²⁸Kaji sa kitumie engolon nikisisie ninye? Aikitok ninye alang iasat enyena pooki.

²⁹Ore Olaitoriani naa keitureisho te nkitoo enye sapuk, ore ngolon enye naa ene nking'asia.

³⁰Hoo nitaasa iyie enaishiakino peyie isis ninye, Aikitok ninye alang nena pooki. Minauru ake ianyit ninye o te ngolon ino pooki, eton ake misis ninye aitabaya.

³¹Meetai olotoduaa ninye, nemeetai oloidim atolikioi ninye, nemeeta olooidim aisisa ninye anaa enashiakino.

³²Ore mbaa kumok kituaak e nking'asia naalang kuna neton meyioloi, amu kitodua nkuti ake oo iasat enyena.

³³Eitobirua Olaitoriani pooki toki, neisho enkanyit lelo tung'ana aseremak le Nkai.