Read Maasai Bible – Biblia Sinyati Sirak 44 Bible Online

Sirak 44 - Maasai Bible – Biblia Sinyati bible

Sirak 44

¹Enkitoo e Nkai te nkatini Neaku emaisisa lelo tung'ana aseremak, loo nkakuyia lang o ishoritin naa tulusoitie,

²ltung'ana oishoo Olaitoriani nkirririkinot o enkitoo kitok, naa te ninye etoduaki enkitoo enye, te nkiterunoto e rishata.

³Etii apa kulikae oitoria enkitoo, neyiolouni kulikae te nkaraki engolon enye. Ore kulikae naa ilaikook ng'eni naa ore kulikae neiro enaibon.

⁴Etii apa ltung'ana bayarot le nkop laa ore enkikoo enye neutaa ltung'ana, larikok oishooyo nkitanapat, lang'eni oiro rorei le ng'eno, o lelo oasishore ndung'eta e rashe,

⁵ore laranyak o lelo oiger sinkoliotin,

⁶lkarsisi o ltung'ana oogoli oo manya nkang'itie te seriani.

⁷Ore kuna pooki naa keyioloi apa te rishata enye, neanyit ltung'ana leina olong.

⁸Etii kulikae tung'ana ootung'uatie enkarna sidai, neisisita ltung'ana o taata.

⁹Netii kulikae lemedamuni, etiu anaa eitu aakata eishu, etuata nerikinisho ninche o nkera enye etulusoitie ninche.

¹⁰Kake keisis iyiook lelo tung'ana aseremak, laa ore iasat neitashe too sipat nemerikinisho.

¹¹Ore enkarna enye sidai neleku te eishoi enye, naa keaku ina enjung'ore enye.

¹²Ore eishoi naa kelo dukuya aibung ilo sotua, naa keibung amu neijia etaasa loo nkakuyia lenye.

¹³Ore lkererin loo lmareita nelpuo dukuya ntarasi, ore olning'o lenye nemejutoyu.

¹⁴Ore seseni lenye neiragieki, ore nkarn enye neishu ntarasi.

¹⁵Kelimu loshon eng'eno e kulo tung'ana, neisis ltung'ana le Nkai ninche. Enok

¹⁶Eitishipa Enok Olaitoriani neyae keper. Neaku ninye enkitanyaanyukoto e nkirridunoto too ishoritin pooki. Noa

¹⁷Ore apa Noa naa oltung'ani oitashe too sipat. Neaku ninye enkiterunoto ng'ejuk te tung'ani peyie elusoo enkidaaroto. Te nkaraki ninye peyie etii apa ltung'ana ootung'uayoki te nkop peyie eishunye Oloirrag le nkare.

¹⁸Neitayu Olaitoriani osotua loo ntarasi o ninye, esilingie ninye inchere meitoki oloirrag le nkare aidaikie e nkishui. Abraham

¹⁹Ore Abraham naa nkakuyiaa kitok loo loshon kumok, naa aiyioloti apa oleng.

²⁰Eibung'a ninye nkitanapat eilo otii shumata aisul neitayu osotua o ninye, neitabaya too sesen lenye esirata eilo sotua, ore peyie etemi ninye nedoli ajo kaasipani.

²¹Neaku esiligie ninye Olaitariani inchere ore eishoi enye naa keaku emayianata te nkop pooki, ore esiana enye nemeikenayu anaa enterit e nkop, naa keaku ninche kumok anaa lakir, naa keanyiti ninche alang kulikae tung'ana te nkop, naa ore nkop enye nebaya enaiposha o enaiposha eiteru to lkeju le Frati ometabaiki enkiting'oto e nkop. Isak o Yakobo

²²Ore sii te Isak neishoo Olaitoriani ina yiolounoto, te nkaraki mpapa lenye Abraham. Emayian too ltung'ana pooki osotua lenye.

²³Nepik ina mayian shumata Yakobo, neitagol Yakobo too mayianat enyena, neisho ina enkop pooki metaa enenye openy, neoriki loshon tomon aare.