Read Maasai Bible – Biblia Sinyati Sirak 45 Bible Online

Sirak 45 - Maasai Bible – Biblia Sinyati bible

Sirak 45

¹Musa Eing'uaa eishoi e Yakobo neilepunye Olaitoriani oltung'ani aseremani otonyorra pooki ng'ae, Enkai o ltung'ana. Keji ele tung'ani Musa, laa ore tenedamuni ninye naa emayian.

²Eitaa Olaitoriani ninye kitok anaa lmalaika neishoo lmang'ati lenyena meturia ninye.

³Ore rorei le Musa neitasheyie Olaitoriani nena mbaa enking'asia, neiko peyie eanyiti ninye te dukuya laiguanak. Eishoo Olaitoriani Musa engolon te nkaraki ltung'ana lenyena, neitodol ninche enkoitoi enkitoo.

⁴Etegelua Olaitoriani Musa tiatua tung'anisho neitisiny ninye te nkaraki esupatisho o mborron.

⁵Neidimie ninye metoning'o oltoilo lenye, nerikoo ninye teina atampoi narok (enaimin sapuk) neisho nkitanapat te nkomom enye, nkitanapat e nkishui o ng'eno, peyie eiteng'en ltung'ana le Yakobo osotua lenye o Siraeli nkitanapat enyena. Aron

⁶Eilepunye Olaitoriani Aron oltung'ani sinyati leijo Musa olalashe, lo losho le Lawi.

⁷Neitayu osotua loo ntarasi oninye, neisho ninye metaa olapolosani too ltung'ana lo Laitoriani, neanyit ninye aisho inkilani sidain o lkila le nkisisa,

⁸bayaroti te sikar enye. Eishoo ninye nkitanyaanyukot e nkitoria, nkilani e atua e kitani o nkilani naado o lkila lo lapolosani kitok, ore olkila neripakini ilonyek oopurupurana aitaman.

⁹Le saabu oo ltualan aitaman peyie ore eloito nening'o ltualan te nkaji e Nkai, naa kedamu Olaitoriani ltung'ana lenyena.

¹⁰Eishoo Olaitoriani Aron nkilani sinyat e saabu naa pusi o sinteti naitobiruno te kitani napuyiapui napiyaya, ore ina kila o lgoo e nkiguana nepik Urimu o Sumimu,[4]

¹¹olkila onyokie esiaai olaguetani loo nkeek o soito sidain oo guetikino nkarna anaa ilmishiren naimulmuli te saabu te nkarriyiano olaguetani nepik nkiguana aitadamu Olaitoriani loshon tomon aare le Israel.

¹²Neisho ninye enkarasha naenieki endukuya masaa e saabu naigero “Naitisinyaki Olaitoriani.” Eitobiruaki apa te nkarriano esiai sidai enkarriyiano, naa enkanyit sapuk oleng tininchop.

¹³Ore te dukuya Aron melio apa nena tokitin sidain. Meetii likae leme Aron o eishoi enye oishopo ntarasi.

¹⁴Ore nkishoorot e ntapa naa katitin aare te nkolong nepejoori aamut.

¹⁵Etuputo Musa Aron abukoki eilata sinyati elukunya enye. Neitayu ninye osotua ntarasi o eishoi enye ajo kesiai Olaitoriani anaa lapolosak nemayian ltung'ana te nkarna Olaitoriani.

¹⁶Etegelua Olaitoriani Aron tiatua tung'ani peyie eitaiki ninye olasar, orropili o lbani aitadamu Olaitoriani ltung'ana lenyena neyau sii olning'o lo sotua.

¹⁷Neisho Aroni inkitanapat peyie eshum neisho sii enkitoria edung mbaa neiteng'en Israel too nkitanapat.

¹⁸Ore etii ltung'ana ong'ata, nenya olturur loo ltung'ana liaulo oo tagorote olom enkiguana te nkaraki Musa. Naa Dathan, Abiram o Kora o ltururr lenye.

¹⁹Nedol Olaitoriani nena naasita negoro oleng, neitaas ninche mbaa enking'asia neidakie ninche te nkima.

²⁰Neponiki Aron enkitoo neisho ninye enjung'ore enye, esipata oo nkishoorot o lng'anayio le dukuya, peyie etum lapolosak endaa nabaiki ninche.

²¹Ore endaa enye naa olasar oitaikini Olaitoriani, eishoo Olaitoriani ina Aron o eishoi enye.

²²Kake ore Aron nemetiu anaa kulikae tung'ana, mejung ninye enkop, meeta ninye enkop enye. Olaitoriani ninye enjungore enye. Finehas

²³Musa ake o Aron oning'o te nkaraki eseremata to Laitoriani alang Finehas enkerai e Eleazar. Eyautua ninche empalakinoto oo ng'ok e Israel te nkitashoto enye nauno o mpijan ina kata peyie etekepari pooki ng'ae.

²⁴Neaku neitayu Olaitoriani osotua o ninye, inchere keaku olarikoni le wueji nesinya o ltung'ana, ore ninye o eishoi enye naa keaku lapolosak kituaak ntarasi.

²⁵Metiu anaa osotua oitayio o Daudi enkerai e Yese lo losho le Yuda, ore enjung'ore olaiguanani naa menye o enkerai, ore epolosare e Aron naa ene eishoi enye pooki.

²⁶Neaku eisisa Olaitoriani laa ninye osidai, laa ninye likinchopoko enkitoo! Inchoo kincho ninye eng'eno nagut peyie eing'uen ltung'ana lenye te sipata, peyie ore dupoto enye o enkitoria ino nelo dukuya too rishat pooki napuonu.