Read Maasai Bible – Biblia Sinyati Sirak 49 Bible Online

Sirak 49 - Maasai Bible – Biblia Sinyati bible

Sirak 49

¹Yosia Ore indamunot e Yosia netiu anaa enkitobirata e nkorropil, naitobira oltung'ani arriya, nemelok anaa enaisho oo lotorok netiu sii anaa osinkolio to sirua le naisho oo sabibu.

²Etusuja ninye enkoitoi naishiakino aibelekeny ltung'ana, neitayu enyamili e eseremata oo nkitanyaanyukot oo nkaaitin.

³Naa oloisiligayu apa ninye to Laitoriani, te rishata oo ltung'ana torrok neitagol ninye eseremata nasipa. Yeremia

⁴Ore Ilaiguanak pooki meteleku ake Daudi o Hezekia o Yosia naa aing'okok apa ninche oleng, amu etung'uaitie ninche nkitanapat Enkai natii shumata aisul laiguanak le Yuda ometabaiki enkiting'oto e nkitoria.

⁵Amu eishoitie ninche engolon enye o nkanyit aisho loreren,

⁶nepejoo enkanas sinyati neaku mijooni nkoitoi, anaa enatejo lomon le Yeremia.

⁷Amu enosie Yeremia osina, hoo neng'eluno apa ninye anaa oloiboni le Enkai eton meino, “Nidotu nnisulaa ninyal,” Pee eshet neun. Ezekiel

⁸Ezekiel apa otodua nduaat e nkitoo Enkai te shumata ngarrin oo mbartan o ilkerub.

⁹Amu etadamua Enkai lmang'ati lenye to lkutati, neas sidain too lelo oshomo too nkoitoi sidain. Loibonok tomon aare

¹⁰Inchoo loik loo loibonok tomon aare epiu, amu eilejileja ltung'ana le Yakobo neitajeu ninche te keisiligata. Zerubabel o Yoshua

¹¹Kaji kinko tinikisis Zerubabel? Amu etiu apa ninye anaa olgisoi oomishira te nkaina e tatene,

¹²anaa enatiu apa Yoshua enkerai e Yozadaki. Oteshetakita Olaitoriani enkaji neitaanyi enkitoo enye ntarasi. Nehemia

¹³Ore indamunot e Nehemia naa kebikoo. Enyaaka ninye ashet nena sunta, nepik inchomito o sekenke. Neitoki ashetu nkang'itie. Iloo nkakuyiaa

¹⁴Metii hoo likae anaa Enok oitobiruaki te nkop, amu ewaki ninye te nkop.

¹⁵Metii hoo likae anaa Yosef otoiwoki, ore loik lenye naa keing'uri oleng.

¹⁶Ore Shemu o Seth o ltung'ana lenye naa keanyiti ninche kake ore enkitoo e Adamu netii shumata alang kulie ng'uesi pooki enkop.