Read Maasai Bible – Biblia Sinyati Sirak 50 Bible Online

Sirak 50 - Maasai Bible – Biblia Sinyati bible

Sirak 50

¹Simon enkerai e Onia Ore olkitok loo lalashera o lwuasa loo ltung'ana lenyena naa Simon olapolosani kitok enkerai e Onia, laa ninye oitobira enkaji e Nkai

²nepik ninye olkitamanyunoto oo sunta are o sempewuet le nkaji e Nkai.

³Ore te rishata enye etii enkitoria neiturr olkesumet le nkare naba anaa olchumati le nkare e naiposha.

⁴Etujurruo ninye enaiko peyie eitajeu ltung'ana lenyena eitu edoikini, neshet sunta te nkanasa peyie eibooyo emanata.

⁵Kebaa apa enkitoo enye peyie eipang'u eing'uaa ine wueji sinyati oleng!

⁶Etiu apa ninye anaa olakira owang le nkakenya too nkatampo, anaa olapa,

⁷anaa enkolong nailangilangita enkaji e Nkai natii shumata aisul, etiu anaa olokirrai enkimerlel te nkitoo too nkatampo,

⁸etiu anaa ntapuka te nkata oo lkanayio le dukuya, ntapuka te mbata enkare anaa ltarakua le Lebanon te nkata enkirowuaj,

⁹anaa apejoo enkorropil, anaa ntokitin naidong'uno te saabu neikodo too soito sidain,

¹⁰anaa iloirienito oitayu ilng'anayio anaa lkeek onyaanyukie iltarakua opor nkatampo te nkadori.

¹¹Ore teneishop Simon lkilani lenyena le nkitoo nelo olperere lo lasar sinyati eishope aitobiraki neitobir ninye enkaji e Nkai menoto enkisisa.

¹²Ore peyie eng'amu rubat too nkaik oo lapolosak eitashe ninye te mbata olperere loo lasar o laretok lenye emanita anaa olmarisian, etiu ninye anaa ltarakua le Lebanon omanita oltukai.

¹³Ore lelo naa eishoi e Aron eishopo ninche nkilani enye enkitoo, eitashe te dukuya olturrur pooki loo Siraeli eibung'ita ninche nkishoorot enye naitobirakita Olaitoriani.

¹⁴Ore peyie eidip esiaai pooki to lperere loo lasar neiturrurru nkishoorot eilo otii shumata aisul, olmagilani,

¹⁵neitarasaa enkaina aibung enkikompe neibukoo enaishoo o sabibu namelok aibukoki entonata olperer lo lasar anaa nkishoorot te nkaraki olotii shumata aisul, Olaiguanani le pooki.

¹⁶Nebuak lapolosak nekut sekekuani naidong'uno te nkosholai. Nebuak ninche oleng peyie ening olotii shumata aisul.

¹⁷Neirugo ltung'ana pooki aabaiki enkop too nkomomi enye aaserem Olaitoriani lenye magilani, Enkai e shumata aisul.

¹⁸Neiteru ilaranyak aarany enkisisa enye too sinkoliotin sidain o lkerempe.

¹⁹Neomon ltung'ana Olaitoriani loo lng'ur le shumata aisul omeishunye esiaai e seremare.

²⁰Nelotu Simon eing'uaa olperere lo lasar, neilepie nkaik enyena shumata olturrur pooki loo Siraeli aibalie imayianat o Laitoriani,

²¹neirung'o ltung'ana enkata e aare peyie eng'amu imayianat Olaitoriani otii shumata aisul. Emayianata o Laitoriani

²²Neaku esisa Enkai e pooki, olotaasa mbaa sapuki te pooki wueji, oitubulua iyiook anaa peyie eini iyiook neing'urie iyiook.

²³Inchoo eishoo iyiook enchipai o seriani te Israel ntarasi.

²⁴Inchoo elo ninye dukuya aduaki iyiook olng'ur lenye neitajeu iyiook enkata e nyamali. Loshon okuni oibai

²⁵Etii loshon aare laiba, ore oliokuni nimeshiaakino peyie eji olosho.

²⁶Naa lelo omanya Oldoinyo le Seir o Lfilisti o lelo moda omanya Shekem. Eng'eno nagut e Yoshua enkerai e Sirak

²⁷Ore nanu Yoshua enkerai e Sirak Eleazar le Yerusalem atipika eng'eno nagut ai aiger ena buku peyie eishoru endung'oto enkiguana o ng'eno too lkulikae.

²⁸Inchoo emayian Enkai pooki ng'ae oibung kuna nkiteng'enat. Ore pooki ng'ae opik oltau lenye kuna nkiteng'enat naa keaku ng'en.

²⁹Ore pooki ng'ae oas anaa enejo nkiteng'enat naa keitagol kewan te nkaraki rishat pooki, amu keaku keloito ninye te nkoitoi e wangan Olaitoriani.