Read Maasai Bible – Biblia Sinyati Sirak 51 Bible Online

Sirak 51 - Maasai Bible – Biblia Sinyati bible

Sirak 51

¹Irorei le nkiting'oto Osinkolio le Nashe Aisho enashe Olaitoriani o laiguanani. Kaaisis iyie anaa Enkai ai o laitajeunoni lai. Kaashukoki iyie enashe,

²amu kitaretuo nanu nikirrip. Kitokordua nanu te keeya o too rresheta loo ltung'ana alejak o laakurr aitong'u.

³Kitaretuo nanu metii likae laa retu, ore too lng'ur lino nikintajeu nanu, too nyamalaritin kumok nayiolo nanu, te nkiba oo lmang'ati laainei, ooyieou apa neiting'ie enkishui ai,

⁴eing'uaa enkima natii nchot pooki, enkima neitu ainok nanu,

⁵te keeya kewan, aitung'uaa lelo alejak o laakur aitong'u to laiguanani.

⁶Atinyikaka apa nanu keeya,

⁷atamana nanu lmang'ati pooki alo. Naing'oru olaretu, kake metii hoo tung'ani.

⁸Kake nadamu, olng'ur lino Olaitoriani, o nitaasa apa. Nadamu nchere itokordua lelo likisiling iyie, ntajeuo ninche too lmang'ati lenye.

⁹Neaku naomon iyie tena nkop, peyie kikordu nanu te keeya.

¹⁰Aatoomono “Iyie Olaitoriani, ira iyie Papa lai, miking'uaa erishata oo isinaitin, metii eretoto te nkaraki lmang'ati.

¹¹Kaaisis iyie, naaranyaki iyie osinkolio le nashe. Newal enkomon ai,

¹²amu kintajeu eitu aidakieki. Neaku kashukoki enashe naisis iyie. Olaitoriani, kaisis iyie!” Enking'orunoto e ng'eno nagut

¹³Ore apa eton ara kiti, eton eitu aiteru alotoo, atoomon te nkaraki eng'eno nagut.

¹⁴Ashomo enkaji e Nkai naomonu ninye naa kaing'oru ninye nkolong'i pooki naishu nanu.

¹⁵Ore eiteru aabulua aaku ilng'anayio atonyorra nanu ninye. Aiterua nanu asujaa enkoitoi enyena eton ara olbarnoti.

¹⁶Anoto nanu e ng'eno nagut ina rishata ake peyie aiteru aning ninye, natum nkishoorot e ng'eno sapuk.

¹⁷Ashomo dukuya nanu te ng'eno nagut, naa ore pooki ng'ae laishoo eng'eno nagut kaisho enkitoo.

¹⁸Atumuta nanu abikoo te nkipirta eng'eno nagut nang'uar sidain, maitukurruni nanu.

¹⁹Aing'orua nanu eng'eno nagut, nalo too nkoitoi aainei too lkuaak le ng'eno, nailepie nkaik aainei shumata aomon naishiraki amu eitu nanu ayiolou eng'eno nagut.

²⁰Aipirie oltau lai enetii ninye, ore te nkipooto oo ng'ok natum ninye. Natum nanu eng'eno te nkiterunoto neaku maing'uari nanu.

²¹Ore amu eterewaki oltau lai peyie aing'oru eng'eno nagut, ina peyie anoto nanu karsisisho sapuk.

²²Aishoo nanu Olaitoriani enkishooroto ororei neaku karsis ninye.

²³Wootu ntae enatii, lemeyiolo toki entijing enkiteng'enare ai.

²⁴Ainyoo peyie ijojo miatata kuna tokitin, ainyoo peyie etirr ltauja linyi enkure?

²⁵Nabol nanu enkutuk ai ajo, “Enchoo aate eng'eno nagut miatata mpisai.”

²⁶Entipik murto inyi enchata oo lmong'i, enchoo ltauja linyi eiteng'eni. Ketaana oleng eng'eno nagut.

²⁷Entoduaki aate! Nchere ataasa ake enkiti siaai kake anoto eseriani sapuk naleng.

²⁸Enchoo aate enkiteng'enare too mpisai kumok, nitumutumu sii ntae saabu sapuk.

²⁹Enchoo eshipakino ltauja linyi olng'ur lo Laitoriani, peyie meitukurruni intae ing'irara aisis ninye.

³⁰Etaas esiaai inyi te rishata nashiakino, ore ninye Olaitoriani te rishata enye neishoru nkishoorot naaisho ntae.