Read Maasai Bible – Biblia Sinyati Sirak 6 Bible Online

Sirak 6 - Maasai Bible – Biblia Sinyati bible

Sirak 6

¹Nimiaku ake olmang'atinta lo ltung'ani, te nkata nanare niaku olchore. Ore enkarna torrono nikiyaki enkurruna naishiaa ilaing'okok.

²Mincho ake kirikoo ing'uarrat inono pee mikintaa ake isiapird anaa oloing'oni.

³Eking'uari anaa olchani otua lemeeta imbenek aashu ilng'anayio.

⁴Ore olng'uarra loo ntorrok naa aikimut nikinko mikitakueniyie ilmang'ati linono. Shoruetisho

⁵Tenira supat nibor naa iaku olchore loo lkumok.

⁶Nchoo eaku kumok lelo lining'ore kake nchoo eaku kuti lelo likiutaa.

⁷Ore pee iyieu nitum olchore, tang'asa tetema nimisioki apik osiligi.

⁸Ketii iltung'ana laa ilchoreta linono eeta entoki nayieu nedupore kake mikiboitare te nkata e nyamali.

⁹Keetae ilkulikae ooing'oru enkiti shankar pee kiarare neitoki amanaa aaliki pooki ng'ae ina.

¹⁰Keetae sii olchore linyikaka oleng kake mikiboitare enkolong ninyamal.

¹¹Tinidupoyu, neitaakuno ekining'ore neibung'are ilaasak linono le siaai,

¹²kake ore pee imenayu nikimbayu nikiluarie.

¹³Talama ilmang'ati linono nintang'enuo iboitare ilchoreta linono.

¹⁴Ore olchore oisiligayu netiu anaa ewueji neshurieki, ore pee itum obo ninoto entoki nadupa.

¹⁵Meetae entoki nadupa anaa olchore oisiligayu, meetae entemet naaidim atayiolo esidano enye.

¹⁶Ore olchore oisiligayu netiu anaa olchani likibak osesen, lelo ake ooisilig Olaitoriani ootum olchore laaijo ilo.

¹⁷Ore ilo oure Olaitoriani naa ketum ilchoreta oodupa amu keing'or ilchoreta lenyena anaa kewan. Nteng'enuoyu te ng'eno nagut

¹⁸Enkerai ai, tetema ng'oru eng'eno nagut ira oti naa keaku iyata ninye o tinimoruau.

¹⁹Tonyuaa oleng ing'oru eng'eno anaa enanyok olairemoni atur neun enkurma enye nitum aisiligu enkikesare sidai. Iasisho oleng te nkata naado kake ishipakino ina nitaasua.

²⁰Ore ilmoda nejo ninche kegol entumoto e ng'eno nemetem aaing'oru ninye.

²¹Kegol tumoto enye te ninche ometapalari ninche nepal ninye ka tukul.

²²Ore eng'eno anaa enatiu enkarna enye nemeitayiolo kewan lkumok.

²³Nining'oki enkerai ai ninyorraa enkikoo ai.

²⁴Teeniki ilpisia le ng'eno inkejek inono o emurt.

²⁵Tanapa ilolan lenyena nimincho kintanaur ienat enyena.

²⁶Tusuja eng'eno nisuj ninye too nkoitoi inono pooki.

²⁷Ing'oru ninye naa aikimbalakinye ninye kewan, mbung'a ninye nimincho elo,

²⁸ore te siadi nitum enkiyeng'iyeng te ninye neaku enchipai te yie.

²⁹Ore ilpisia lenyena nikirrip ninche iyie oleng, ore osaei lenye neaku emasaai nadupa te yie.

³⁰Ore enchata enye e sinkaisho naa emasaai nadupa, ore nkeenta enyena naa ijo enkirina pus.

³¹Inchopo eng'eno anaa enkila e nkitoo, nipika ninye anaa olkila le nchipai elukunya ino.

³²Enkerai ai indim anoto eng'eno tiniyieu, indim sii ataa ng'en tiniyeu to ltau lino.

³³Teninyor ainining'isho naa itum eng'eno, teninining'isho naa iaku ng'en.

³⁴Taboitare iltasati moruak, tenetii oltung'ani ng'en tusuja ninye.

³⁵Tang'uarra nining'o pooki atini nimincho ndung'eta e rashe naadupa kiim.

³⁶Tenidol oltung'ani ng'en, tayooki ninye tadekenya, nchoo emutakino enamuke ino kutuk aji enye.

³⁷Tipika erishata ino pooki enkisumata oo nkitanapat e Nkai, nimbirribir niche, aikincho ninche eng'eno ning'oru.