Read Maasai Bible – Biblia Sinyati Sirak 7 Bible Online

Sirak 7 - Maasai Bible – Biblia Sinyati bible

Sirak 7

¹Kulie utarot Mias ake ntorrok pee mikitum aikata sii yie intorrok.

²Talama intorrok naa aikilam sii ninche.

³Enkerai ai, miun ake ilanterera le nkitorogonyare minkesu ake esapuk aitoki oleng.

⁴Miomonu ake to Laitoriani Olorika kitok aashu enkitoo sapuk to laiguanani.

⁵Mijo ake aitodol Enkai esupatisho ino, aashu intoduaaya eng'eno ino te dukuya olaiguanani.

⁶Ming'oru ake ajo pee iaku olarishani pee melo ake nilaikino atirisha entorroni aashu iaku oloata enchoto to lkarsis ninyal enkarna ino.

⁷Mintagor ake eumata niminturraa enkanyit too ltung'ana.

⁸Mias ake eng'oki kat are, ore teina nabo nias naa ekintamei ake.

⁹Mijo ake “Keshilaa Enkai enkumoi oo nkishoorot aainei, naa ore tenaitayu inkishoorot te nkaraki Enkai natii shumata aisul naa keng'amu ninye.”

¹⁰Mishalu ake te nkomono aashu ipal eitu incho ilaisinak inkishoorot.

¹¹Mikweniyie ake oltung'ani oata emion to ltau amu Olaitoriani odumu oltung'ani aashu eitadoyio.

¹²Midung'u ake emonkoi tialo olalashe lino aashu olchore lino.

¹³Milejisho ake amu meeta imonko dupoto e hoo nyoo.

¹⁴Miyiang'iyiang ake te ntumo oo lpayiani aashu ingiligil kewan te nkomono ino.

¹⁵Mimbayu ake esiaai nagol aashu esiaai e nkurma ino naa Enkai naitayio pooki.

¹⁶Mijing ake eumata oo laing'okok, tadamu nchere mebik enkitamioto eitu elotu.

¹⁷Toborro oleng amu meeta oltung'ani lemeanyita keeya. Emboita o lkulikae

¹⁸Midung ake olchore lino te siadi te nkaraki mpisai aashu olchore lino odupa te nkaraki saabu pooki ena kop.

¹⁹Mintumutiki kewan eitu iiyam enkitok ng'en nedupa amu ore enkitok ng'en naa kedupa alang saabu.

²⁰Misomit ake osinka oas esiaai enye aitobiraki aashu osinka oigero likiaasaki esiaai aitobiraki.

²¹Tonyorra osinka oata eng'eno to ltau lino pooki, mimitiki ninye eas enayieu.

²²Ng'ura imasaa inono o sarge oleng eisul teneata dupoto te yie.

²³Tiniata inkera, nteng'ena ninche pee etum enkanyit eton aa kutiti.

²⁴Tiniata intoyie, nteng'ena ninche pee meaku kerereni niminting'id sii oleng.

²⁵Tininchooyo eselenkei ino meyami nitaasa esiaai sidai kake nchoo olee odupa.

²⁶Tiniata enkitok sidai miorore ninye kake misilig ake oltung'ani liminyor.

²⁷Iyanyita papaai lino to ltau lino pooki kake mincho ake kirikino enyamali nanoto ng'utunyi eton eitu kiiu.

²⁸Tadamu nchere intoiwuo inono pee inchu, kaji sa inko pee ilaaki aikata ninche?

²⁹Turia Olaitoriani to ltau lino pooki nincho enkanyit ilapolosak lenyena.

³⁰Tonyorra ilo likintobirua te ngolon ino pooki nimbung oleng ilaisiaayiak lenyena.

³¹Tonyorra Olaitoriani, nincho enkanyit ilapolosak, nincho ninche erubata enye anaa enikintanapaki: ilng'anayio, inkishoorot o lpela, inkishoorot o rony le ng'ues natopolosaki, inkishoorot e nkitisinyata o lng'anayio le dukuya le ntoki nasinya.

³²Tareto lelo aisinak naa ekincho Enkai emayianata enye nadupa.

³³Nchoo pooki ng'ae oishu, nidamu sii ninche lelo ootuata.

³⁴Ing'urrie lelo ooiturraitie olenye obo ninchir tenebo o ninche.

³⁵Mipal ake eitu ilo abaiki iltamuoyia, ekinyorruni too mbaa naaijo kuna.

³⁶Ore te pooki nias tadamu nchere iye nabo olong. Ore tinipik indamunot inono kuna, nimias aikata eng'oki.