Read Maasai Bible – Biblia Sinyati Sirak 9 Bible Online

Sirak 9 - Maasai Bible – Biblia Sinyati bible

Sirak 9

¹Inkituaak Miduaaki olom enkitok ino ninyor amu keaku intoduaaka eneiko tenikiar.

²Mincho ake enkitok kirikoo.

³Milo ake aboitare enkitok torrono olkuaak pee mikimbung ake irresheta lenyena.

⁴Mimbung'are ake enkitok aranyani amu ekindim atipika entemata to losek lenye.

⁵Ming'or ake oleng asipu eselenkei nemeyiolo olee pee mikintalaki ake.

⁶Minyorru ake imulayoni pee minturraa ake pooki toki niata.

⁷Mimanaa ake too nkoitoi e nkanasa aashu imanaa too wuejitin nemetiiki.

⁸Ming'or ake enkitok sidai enkitayunoto oleng neme enino, eteleja lkumok esidano e nkitok neisho menoto olng'uarra torrono.

⁹Milo ake anya endaa tenebo o enkitok e likae aashu iokishore, indim atijing'a atua entemata nilaikino aibooi kewan nimuta. Shoruetisho o kulikae lewa

¹⁰Ming'uaa aikata olchore lino liapa, mitum aikata likae olang ilo. Ore shoruetisho naa ijo enaisho oo sabibu, kesidanu tenebik.

¹¹Miduaaki olom olaing'okoni tenepok, miyiolo ajo kainyoo natum ninye.

¹²Ming'uar nena tokitin naaitiship ilemeyiolo Enkai, tayiolo ajo keyae ninche anaa ilemeitoriori nkolong'i pooki naaishu.

¹³Talama oltung'ani ooidim atara likae metua pee mintoki aata olturiaki le keeya kake tininyikaki nilo te ng'eno aashu kiar tua. Tayiolo nchere igira alo te wueji netii irresheta ooisudoro nelelek kitum.

¹⁴Tonyuaa oleng tayiolo ile latia ino ninkilikuanishore.

¹⁵Nchoo metaa ore lelo lirorie naa ilooata ening'unoto naa choo metaa ore iniimakiki naa inaaipirta Inkitanapat Eilo otii shumata aisul.

¹⁶Nchoo metaa iltung'ana ooure Enkai isiritore te ndaa e teipa naa nchoo enkisisa ino metaa eurita Olaitoriani. Ilaitoriak

¹⁷Ore esiaai o laguetani arriyia naa kenyorruni, ore olarikoni ng'en neyiolouni too nkirorot enyena.

¹⁸Ore oltung'ani oiyiang'iyiang too nkirorot naa keurei neibae sii te nkanasa.