Read Maasai Bible – Biblia Sinyati Isaya 14 Bible Online

Isaya 14 - Maasai Bible – Biblia Sinyati bible

Isaya 14

¹Keing'urrie Olaitoriani Yakobo naa keitoki ninye agelu Israel, nepik ninche atua enkop enye. Naa kepuonu iltung'ana loo loreren aashulare ninche neidikidikore enkaji e Yakobo.

²Naa kepuonu iltung'ana aaya ninche neriku ninche ewueji enye. Ore ina aji e Israel neng'amaa ninche te nkaina o Laitoriani aaitaa irrindiki. Neya ninche aaraya lelo apa ootaaraitie ninche, neitore ninche lelo apa ooibooki ninche enkop.

³Ore kenya teina kata nikilo Olaitoriani aisho enkiyagata teina mion o to sina lino, o teina kisiaayiare nikitipikaki isiaaisho,

⁴teyietai olaiguanani le Babilon. Tejo: “Eng'ura eiting'ieki ilo apa aitorogonyani, eng'ura eiting'ieki enkisikong'are!

⁵Etigila Olaitoriani eng'udi eilo torrono, ina ng'udi e nkitoo oo looitoreisho,

⁶ilo apa otoosho iltung'ana te ngoro te nena oshot nemeish, ilo apa oitoria iloshon te ngoro o to losilisili metii olng'ur.

⁷Eitirring'e enkop pooki neyagaa; neranyisho ninche.

⁸Kiting'idakinote iyie ilkeek laaijo iltarakua, ore lelo tarakua le Lebanon, nejo, ‘Ore ebaiki ina kata apa nikirragieki aaitadou, meetae oladung'oni loo lkeek olotu adung.’

⁹Etudumunye enemeneng'a to lodo le nkop pee kinang'are te nilotu, etudumua ninye iloipi pee kiroroki iyie, ee, lelo pooki oora ilarikok le nkop; etudumunye too lorikan lenye le nkitoo le lelo apa oora ilaiguanak loo loshon.

¹⁰Eikirorie ninche pooki iyie aajoki, ‘Itashala sii iyie anaa iyiook! Itanyaanyukie sii iyie iyiook!’

¹¹Eitadoyioki enkishiaa ino aaya enemeneng'a, ina orui oo nkinantani inono; eisalaashaki aaitadoyio abori iyie, ore ilkuru nikimulumul iyie.

¹²“Kaji iyie inkuna pee itusulunye te keper iyie lo Akira le Nkakenya, enkerai e Nkakenya! Ng'ura ajo kitudung'oki aapudaki enkop, iyie olapa oitadowuo iloreren kop!

¹³Itejo apa iyie to ltau lino, ‘Kailep alo keper; teidia alo ilakir le Nkai kapik olorika lai le nkitoo shumata oleng; katon nanu to ldoinyo le umata te nelakua te nkalo e moikuape.

¹⁴Kailep nanu alo teidia alo nkatampo, kaitotiu nanu kewan anaa Ilo Otii Shumata aisul.’

¹⁵Kake kintadowuoki aayau enemeneng'a, nenen neegut e nemeneng'a eululu.

¹⁶Ore lelo likidol iyie nikishumaki nkonyek, nikiimaki iyie, ejo: ‘Kele tung'ani apa oikirikirie enkop, neigusugusie nkitoriat,

¹⁷oitaa enkop olpurkel neibelekeny nkanas enyena, neitu eisho lelo ooena meshomo ang?’

¹⁸Ore lelo aiguanak pooki loo loreren neirrag te nkitoo, olaiguanani ake tiatua enkurare enye.

¹⁹Kake kitanang'ayioki iyie aaiturraa, aaitalam enkurare ino, anaa enkaitubului nemeyieuni, neitemori too mpopoki e lelo ootuata, te lelo ootaaraki to lalem, lelo oosulakino isoito le ululu, anaa empopok naitunyi too nkejek.

²⁰Mikinukari iyie aaitaboitaki ninche te nkaraki nindaikie enkop ino, itara iyie iltung'ana linono metuata. “Ore eishoi e lelo aasak loo ntorrok, nchoo eaku meigili ai kata aaipot!

²¹Entobira esesekuanata oo layiok lenyena te nkaraki entorroni oo loo menye, pee mebul ake neibung enkop, neiput oriong enkop nkanas.”

²²“Kadumunye nanu aitayunye ninche olarrabal,” Olaitoriani loo lororani ojo, “naa kaiwuang'ie nanu te Babilon enkarna o lpisiai, olmarei, Olaitoriani ojo.

²³Naa kaitaa nanu ina kop emanyisho oo lkirrumun, naitaa ilturot le nkare, naa kaor nanu te oret e nkidaata, Olaitoriani loo lororani ojo.”

²⁴Einosa Olaitoriani loo lororani olmumai: “Ore anaa enaitobira nanu, neijia elo atiu, naa ore anaa enatudung'o, neijia etiu keunoyu,

²⁵nchere kalo nanu agil ilo le Asiria tiatua enkop ai, ore te shumata lelo doinyo laainei naitunyoki nanu ninye enkop too nkejek; ore ina shata enye oo murto neiwuang'a te ninche, o ilo ola lenye otii oloililai.”

²⁶Ena ninye ina yieunoto natuutuaki eipirta enkop pooki; naa ena ninye ina aina naitorioyioki te shumata iloshon pooki.

²⁷Amu etuutua Olaitoriani loo lororani, naa aing'ae oiwuang'ie ina? Eitorioyioki enkaina enye, naa aing'ae oshuk?

²⁸Ore apa te ilo ari otanang'a olaiguanani Ahas, nelotu ele kilikuai ojo,

²⁹“Ming'ida iyie Filistia, o intae pooki, eji nchere, etigile ina ng'udi apa natoosho intae; amu te eishoi o lasurai epuku olasurai torrono aisul, ore olng'anayioi lenye naa olasurai olo tiaai.

³⁰Ore ilo kikau lo laisinani nedaa, ore ilo oata osina neirrag te seriani; kake kamut nanu entonai eishoi ino to lameyu, ore ilo pisiai lino naar nanu to lalem.

³¹Teyietu, na kishomi; nchira, na anasa; talepori to lkirutoto, iyie Filistia, intae pooki! Amu kelotu empuruo eimu moikuape, nemeetae oloisiadu to ltim lenye.”

³²Kainyoo ewaliki oltung'ani olkilikuai loo loshon? “Olaitoriani oitobirua Sion, naa ore tiatua ninye netum lelo tung'ana lenyena apa ooisilisiloki esarunoto.”