Read Maasai Bible – Biblia Sinyati Isaya 16 Bible Online

Isaya 16 - Maasai Bible – Biblia Sinyati bible

Isaya 16

¹Eirriwakita ninche ilkuoo le kerra ilo oitore enkop, eing'uaa Sela eimunye ina oitoi o lpurkel, aayau ilo doinyo le Yerusalem.

²Etotiutuo nena toyie e Moab anaa motonyi naaidapashari tiaai, anaa nkajijik oo motonyi naaidapasha too mpoorri o lkeju le Arnon.

³“Nchoru eutaroto, tudung'o enkiguana te sipata; ntotiwuo oloip lino anaa enkewarie te nkata e nkipirata e nkolong; isudoi lelo ootarayioki aaipang'ie, mincho meibung'i lelo aisikak.

⁴Nchoo lelo le Moab ootaarayioki aaisikie metamanyisho te nebo iyie, taa enkisudoroto te ninche te lelo ooidaikie ninche. Te neishieki kenya ilo aitorogonyani neish enkidaata, ore te neiwuang'ieki ilo oibooki ninche enkop teina kop,

⁵netumi taa aaitotona olorika le nkitoo te nyorrata nauno, ore te shumata e ilo orika neton ninye te sipata tiatua ilo ng'obor le Daudi, ilo obo oiguana te sipata amu keneneng ninye pee eas esipata.”

⁶Kitoning'oitie iyiook ilo wuasa le Moab, enetiu apa olwuasa lenye; ore enkilashilash enye o lwuasa lenye o ina goro enye - ore enkitokoos enye naa elejare.

⁷Ore te nkaraki ina nchoo Moab eyietu aishir, nchoo pooki ng'ae eyietu aishiraki Moab. Enchira to sina kitok te nkaraki nena mukateni oo sabibu e Kir-Hareseti.

⁸Amu etoito nena ong'at e Heshbon o lelo sabibu le Sibma; ore lelo kituaak loo loshon netudung'o ilng'osil lenyena, lelo apa oopuo aabaiki Yaser, neidapashaki olpurkel; ore lelo ng'osil lenyena nepuo aaidapashari nelang enaiposha.

⁹Ore te nkaraki ina, kaishir nanu te nkishirata e Yaser te nkaraki ilo sabibu le Sibma; kaaitashaiki nanu ilkiyio laainei, iyie Heshbon o Eleale; amu ore shumata ilng'anayio linono o nkikesare ino netadoikio embuaakinoto o larrabal.

¹⁰Neiwuang'ieki eng'ida o enchipai teina kop sidai; ore te nkurma oo sabibu nemetii osinkolio oranyi, meetae mbuakunot naabuakuni; meetae olaironyani oirony isabibu te nkironyet; eitigiraki ina buakunoto e nkikesare.

¹¹Ore te nkaraki ina keishir oltau lai anaa olwulul loo usin aishiraki Moab, neishiraki oltau lai Kir-heres.

¹²Naa te nelotu Moab aibalunye kewan, naa te neitanaur kewan too wuejitin neeika, te nelotu ninye atua ine wueji enye sinyati pee eomon, meret ninye ina.

¹³Ororei ele oing'uaa Olaitoriani oipirta Moab too nkolong'i naatulusoitie.

¹⁴Kake ore taata ejo Olaitoriani, “Too larin okuni, anaa larin le nkigeroto o ltung'ani, keitaae ina kitoo e Moab pesho, hoo duoo naa olorora kitok ninche. Ore lelo ooleku naa lkuti oleng leme toki.”