Read Maasai Bible – Biblia Sinyati Isaya 17 Bible Online

Isaya 17 - Maasai Bible – Biblia Sinyati bible

Isaya 17

¹Olkilikuai oipirta Dameski. Meitoki Dameski aaku enkanasa, naa keaku ninye osototi loo suut.

²Kepuoi aaing'uaa nkanas enyena o kenya; neaku ninche ndaat oo nkerrai, neirragie ninche ine nemeetae entoki naiture.

³Keiwuang'a ina ang nagol aitung'uaa Efraim, neiwuang'a enkitoo aitung'uaa Dameski; ore ilo pisiai oleku le Siria netiu anaa enkitoo oo nkera e Israel, Olaitoriani loo lororani ojo.

⁴Ore kenya teina olong neitadouni enkitoo e Israel aaitabaiki enkop, ore ina karsisisho enye neitaae emenai.

⁵Naa ketiu ninye anaa te neikesisho olaunoni, negilu ilng'osil le nkurma, netiu anaa ina kurma naitashe te nesuli ilng'osil lenyena netiu anaa oerata le Refaim.

⁶Ina natung'uayie olaikesani ake naleku, anaa te neikes olaunoni ilng'anayio neing'uaa oaare anaa okuni ootii shumata oleng, aashu oong'uan anaa imiet too lng'osil lo lchani loo lng'anayio, Olaitoriani Enkai e Israel ojo.

⁷Ore kenya teina olong neaku keshilaa iltung'ana Ilo oitobira ninche, ore too nkonyek enye neing'or Ilo Sinyati le Israel;

⁸meitoki ninche aaisilig ilpereren loo lasarri, ina siaai oo nkaik enye, nemeitoki ninche aaing'or ina naitobira ilkimojik lenye, aa Asherim aashu ilpereren le nkorropil.

⁹Ore kenya teina olong nena anas enye naagol, nepuo aatiu anaa nene wuejitin neeisikieki oo le Hafi o le Amori, nenen apa neeisikie ninche te nkaraki nkera oo Siraeli. Nepuo aaku ilmuaateni.

¹⁰Te nkaraki nikitorikine iyie Enkai e njeunoto ino, neitu iyie idamu ina dapidapoi e sarunoto ino; te nkaraki ina pee ituno iyie inkaitubulu sidain, nipik iyie ntokitin oo nkaitin omon.

¹¹Ore hoo nintubulu iyie ninche ina olong ake nituuno ninche, nincho ninche meitapuka pee ekenyu ake, ore ake eyia, kelo aimin enkikesare, teina olong o sina o ina mion nemeishiuni.

¹²Kening'o oltoilo loo ltung'ana kumok, eikurrukur ninche anaa enkikurrukur e naiposha! Kuaak! Enkikurrukur oo loreren, eikurrukur ninche anaa enkikurrukur oo nkariak kumok!

¹³Keikurrukur iloshon anaa enkikurrukur oo nkariak kumok, kake kelo Enkai aisikong ninche, neilanyisho ninche aaisik, nepuo ninche anaa suut too ldoinyio netiu anaa enterit nakutita olkutati.

¹⁴Ore teipa, nelotu olkirutoto! Ore eitu eaku tadekenya meekure eetae ninche! Ena ninye erubata e lelo ooibung iyiook aaraya, elaakinoto e lelo ooisim iyiook.