Read Maasai Bible – Biblia Sinyati Isaya 18 Bible Online

Isaya 18 - Maasai Bible – Biblia Sinyati bible

Isaya 18

¹Etii enkop natii lido kekun loo ilkejek le Etiopia naning'o enkikurrukur oo naipuko;

²ina nairriwaa ilbalusuni lenyena aimie olkeju le Nail, too mpeuti naaitobiraki te narau oo nkujit naapor inkariak! Enchom intae, intae olkilikuai oneneng ina kop e lelo adoru oosipa seseni, enetii ilo orere ourei te netaana o te nelakua, ilo osho magilani otimirishe, odung ilkejek enkop enye.

³Ore intae kulo ootii enkop pooki, intae lelo oomanya enkop, te nedumuni olmonekie too ldoinyo, entodol! Te neoshi emowuo, entoning!

⁴Amu nji nanu aatiaaka Olaitoriani: “Kaitirring'a nanu aing'orisho te manyisho ai, kaing'or asipu anaa te ndama eirowuaja, anaa enkatampoi e nkolielio te nkata e nkikesare eirowuaju.”

⁵Amu ore eng'or enkikesare, eidipa enkurma aitapuka, neibelekenya ntapuka aaku ilng'anayio, nedung'oo ninye lelo ng'osil to lalem odung'ishoreki, ore lelo ng'osil ooluaari nedung'oo.

⁶Neing'uari ninche pooki, meinosa nena motonyi e ong'ata naatoni too ldoinyo, neing'ueikini ing'uesi e ntim. Neked ilmotonyi shumata ninche te nkata e nkirowuaj, netonie ing'uesi e ntim ninche te nkata e nkirobi.

⁷Ore kenya teina kata neyauni nkishoorot aaisho Olaitoriani loo lororani, naaing'uaa lelo tung'ana adoru nesipa seseni, lelo tung'ana oourei te netaana o te nelakua, ilo osho magilani omirisho, odung ilkejek enkop enye, o metabaiki oldoinyo le Sion, ine wueji e nkarna o Laitoriani loo lororani.