Read Maasai Bible – Biblia Sinyati Isaya 19 Bible Online

Isaya 19 - Maasai Bible – Biblia Sinyati bible

Isaya 19

¹Olkilikuai oipirta Misiri. Ng'ura, ekedito Olaitoriani enkatampoi nakuet, naa Misiri elotu; naa keikirikira nena kitanyaanyukot e Misiri oo nkaitin te dukuya ninye, nelepori iltauja loo ltung'ana le Misiri tiatua ninche.

²Naa kaputu nanu ile Misiri metudumakinoto maate, nearare ninche oltung'ani ake olalashe lenye, nearare oltung'ani olayioni le latia enye, nearare enkanasa enkanasa, nearare enkitoo enkitoo.

³Ore olokiyo loo le Misiri tiatua ninche, neishieki katukul, nainyal nanu nkitobirat enye; naa kepuo ninche aaikilikuanishore nena kitanyaanyukot oo laitumusumusok o loosh nkidong'i o lasakutok;

⁴naa kaishooyo nanu ile Misiri apik inkaik o laitasheikinoni ogogong, naa olaiguanani otolo olo aitore ninche, Olaitoriani loo Lororani ojo.

⁵Ore nkariak e ilo keju le Nail neitoi, ore ilo keju netoyu.

⁶Ore nena nong'ot neing'usilu, ore ilkejek ooibung'are ilo keju le Nail le Misiri nemitari aatoyu, ore oseyiai o lkujita netoyu.

⁷Keaku iorro mbat o lkeju le Nail, ore nena tokitin apa naatuunoki te mbata o lkeju netoyu, nekutaa osiwuo.

⁸Ore lelo arreshok loo sinkir neishir te mion o sina, lelo pooki oonang'aki irresheta lenye olkeju le Nail, neyietu ninche aaishir, lelo pooki ooisalaashaki irresheta lenye shumata enkare.

⁹Ore lelo aitobirak loo nkilani naapuyiapui nepalari, o lelo ooitobir nkilani naaibor.

¹⁰Ore lelo laa ninche ing'apeta enkop nerratanyi, ore lelo oas esiaai oo ropiyiani netum osina.

¹¹Ore ilkituaak le Soan naa ilmoda; ore lelo ang'eni aikook le Farao neishooyo enkikoo e modai. Kaji iyie inko pee ijoki Farao, “Kara nanu olayioni lo lang'eni, olayioni lo laiguanani li apa moitie?”

¹²Koree naa lelo ang'eni linono? Nchoo ninche mikitoliki neisho metayiolouni, ina naiguanua Olaitoriani loo lororani pee egilunore Misiri.

¹³Ore lelo kituaak le Soan netaa ilmoda, ore lelo kituaak le Memfis neteleja ate; ore lelo apa laa ninche eitasheyie iloshon lenye, neitapong'oitie Misiri.

¹⁴Eishoo Olaitoriani ninche olmilo; neisho Ilmisiri meyukuyukori too nkiaasin enyena pooki, anaa enayukuyukori olamerani elopisho.

¹⁵Meetae oltung'ani otii misiri, karsis ashu olaisinani yioloti anaa mme yioloti ooidim aaitayu eretoto.

¹⁶Ore kenya teina olong, naa ketiu ile Misiri anaa ng'oroyiok, neikirikira te dukuya ina aina naikirikirie Olaitoriani loo lororani ninche.

¹⁷Ore ina kop e Yuda naa keaku entoki naiture ile Misiri; ore pooki tung'ani oba anaa ololikini neureishoyu, te nkaraki ina naiguanua Olaitoriani pee egilunore ninche.

¹⁸Ore kenya teina olong naa keaku keetae inkanas imiet tiatua enkop e Misiri, naairo enkutuk e Kanaan. Nenya olmumai pee eiruk Olaitoriani loo lororani. Ore nabo e kuna naa kepuoi aajo Enkanasa e Nkolong.

¹⁹Ore kenya teina olong naa keaku keetae olperere lo lasar lo Laitoriani te mpolos e nkop e Misiri o eng'ape o Laitoriani to lpolosie lenye.

²⁰Naa keaku ina olmonekie o shakenisho o Laitoriani loo lororani tiatua enkop e Misiri; ina kata te neishiraki ninche Olaitoriani te nkaraki lelo ooibooki ninche enkop, neirriwaki Olaitoriani ninche olaitajeunoni. Nemitu, nekordu ninye ninche.

²¹Neisho Olaitoriani metayiolouni ninye too le Misiri. Neyiolou lelo le Misiri Olaitoriani teina olong, neserem ninye to lasar o too nkishoorot o lasar opejori. Nenya ninche olmumai te nkaraki Olaitoriani, neitabaya.

²²Naa kelo Olaitoriani aosh Misiri, neosh neitoki ashukunye, naa kerrinyokino ninche Olaitoriani, nening ninye esayiata enye neishiunye ninche.

²³Ore kenya teina olong naa keaku keetae enkoitoi kitok nadumunye te Misiri alo Asiria. Nepuonunye ile Misiri Asiria, nepuo ile Misiri aaseremisho te nebo ile Asiria.

²⁴Ore kenya teina olong naa keaku Israel ene uni te nebo Misiri o Asiria, neaku ninche emayianata te mpolos e nkop.

²⁵Naa ninche emayian Olaitoriani loo Lororani ejo, “Metamayiani Misiri, olorere lai o Asiria ina siaai oo nkaik aainei, o Israel enjung'ore ai.”