Read Maasai Bible – Biblia Sinyati Isaya 2 Bible Online

Isaya 2 - Maasai Bible – Biblia Sinyati bible

Isaya 2

¹Ele rorei etoduaa Isaya olayioni le Amos eipirta Yuda o Yerusalem.

²Keyooki alotu too nkolong'i e siadi, paa ore ilo doinyo le nkaji o Laitoriani neitasheyieki aaitoodor too ldoinyo, neilepieki aaitogiroo too ldoinyo, ore iloshon pooki nerukokino ninye,

³naa kepuonu iltung'ana kumok aajo: “Wootu, maape oldoinyo lo Laitoriani, maape enkaji e Nkai e Yakobo; pee etum ninye aiteng'ena iyiook inkoitoi enyena, nikitum iyiook aashom too nkoitoi enyena.” Amu Sion ninye epukunye enkitanapata, nelotu ororei lo Laitoriani eing'uaa Yerusalem.

⁴Kelo ninye aiguanare iloreren, naa kemut ninye nabo tialo iloshon kumok, naa keitaa ninche ilalema lenye inchempei, neitaa iremeta enye ilalema le nkikesare, nemeitoki olosho adumakino olikae osho to lalem, nemeitoki aekata ninche aata olarrabal.

⁵Wou iyie na aji e Yakobo, maape iyiook tiatua ewang'an o Laitoriani.

⁶Amu itung'uayie iyie iltung'ana linono, ina aji e Yakobo, te nkaraki nabore ninche ilaitumusumusok ooing'uaa oloosaen, o lelo aitumusumusok anaa iltung'ana loo Filistia, neoshore ninche inkaik iltung'ana leeiking'a.

⁷Eiputa enkop enye enkosholai o saabu, nemeeta ilchumat lenye eneiting'ie; neiputa enkop enye imbartan, nemeeta eneiting'ie ngarrin enye oo mbartan te nkumoi.

⁸Eiputa enkop enye inkitanyaanyukot oo nkaitin, neirrugokino ninche ina siaai oo nkaik enye, ina naitobira inkaik lenye.

⁹Keitoborri iltung'ana, neitadouni iltung'ana - mipalaki ninche!

¹⁰Tijing'a atua endapidapoi, nilo aisudori tiatua enterit ailany ina kituriata o Laitoriani, nilany ina kitoo e nkisisa enye.

¹¹Ore ina kitokoos oo ltung'ana naa keitadouni, ore ilo wuasa loo ltung'ana naa keitoborri; neaku Olaitoriani ake eitaae kitok teina olong.

¹²Keeta Olaitoriani loo lororani enkolong nagilunore ilo pooki owuasa neitokoos, agilunore ina pooki nailepieki aadumu;

¹³agilunore lelo tarakua pooki le Lebanon, lelo adoru ooilepieki shumata, negilunore lelo keek oogol le Bashan;

¹⁴negilunore lelo doinyo adoru pooki, negilunore nena doinyo naaitokoos pooki;

¹⁵negilunore pooki wueji neika o pooki suntai nasheta;

¹⁶negilunore imelin pooki e Tarshishi, negilunore pooki toki e nkarriyiano.

¹⁷Ore enkitokoos oo ltung'ana neitadouni, ore ilo wuasa loo ltung'ana neitadouni abori; neaku Olaitoriani ake eitaae kitok teina olong.

¹⁸Ore nena aitin naaguetuno neishieki tukul.

¹⁹Nejing iltung'ana inkapuniaa oo ndapidapo o ngumot e nkop, aailany ina kituriata o Laitoriani, neilany ina kitoo e nkisisa enye, te nedumunye aiture enkop.

²⁰Ore kenya teina olong nenang'aa iltung'ana aaiturraa nena kitanyaanyukot enye e nkosholai o nena kitanyaanyukot enye oo nkaitin e saabu, apa naaitobirakita ate pee eserem, nenang'aki ilkirrumun o sarampalani,

²¹pee etum aatijing ilbaat loo ndapidapo o nkapuniaa oo soito sapuki aailany ina kituriata o Laitoriani o ina kitoo e nkisisa enye, te nedumunye ninye aiture enkop.

²²Mintoki aisilig tung'ani laa ore nkumeishin enyena netii enkiyang'et, Amaa kaa tipat eeta ninye?