Read Maasai Bible – Biblia Sinyati Isaya 29 Bible Online

Isaya 29 - Maasai Bible – Biblia Sinyati bible

Isaya 29

¹Woi ninye Ariel, Ariel, ina anasa apa natamanya Daudi, Toponai ake to lari o to lari; nchoo siruai emanikino.

²Kapik nanu Ariel osina, nelo aaku olkiyioi o enkishirata, nelo ninye atiu te nanu anaa Ariel.

³Naa kaalo nanu aman ang'adu too nkaloli pooki, naang'adu nanu too ltaleta naaitaman nanu iyie enkang.

⁴Neaku te negut te nkop ilo iyie airo, abori enterit eimu irorei linono; enkop eimu oltoilo lino anaa oltoilo, neing'oming'om oltoilo lino eimu enterit.

⁵Nebayu ilmang'ati linono anaa enterit napuyiapui, ore olorora loo larruok nebayu anaa suut. Naa keluamisho ninche too nkaitin,

⁶ekibaiki iyie Olaitoriani loo lororani te ndarata o te nkikirikirata e nkop o to ltoilo kitok o to siwuo o to lkutati o te nkima nanyaisho.

⁷Ore ilo orora loo loshon pooki, oitayunye Ariel olarrabal, lelo pooki oarare ninye o wuejitin enyena neesheta, nepik ninye osina, nepuo aatiu anaa enkidetidet, enduaata e kewarie.

⁸Ore anaa te neidetidetu oltung'ani oata esumash einosita endaa, neinyototo te sumash enye eitu eraposho, aashu anaa te neidetidetu oltung'ani oata enkure eokito enkare neinyototo ninye te nkure enye eitu eok enkare, neaku neijia epuo aatiu ilororani loo loshon, lelo oarare oldoinyo le Sion.

⁹Entaa ate ilmoda, ninyanya kutukie, entaa ate ilemedolisho nimodokuku! Entaa lamerak, neme te naisho; eyukuyukori neme enaisho napi itooko!

¹⁰Amu etubukoko intae Olaitoriani oltau loo njio naairoishi, neikeno ninye nkonyek inyi intae iloibonok, neikeno lukuny inyi lelo aduaak.

¹¹Ore enduaata ena pooki netotiwuo te iyie anaa irorei le mbuku natimishiraki aaiken neishooyo oltung'ani meisuma ilo oyiolo aisuma, ejo, “Isuma ena,” nejo ninye, “Maidim nanu, amu etimishiraki aaiken.”

¹²Naa te neisho ninche embuku oltung'ani lemeyiolo aisuma nejo, “Isuma ena,” nejo ninye, “Mayiolo aisumayu.”

¹³Neitoki Olaitoriani ajo, “Ore te nkaraki naanyikaki naanyor nanu kulo tung'ana too nkutukie naayanyit ninche nanu too nkutukie, kaalamita iltauja lenye, ore euriata enye te nanu naa enkitanapata oo ltung'ana nayiolo ake too lukuny;

¹⁴Ore te nkaraki ina, kaigil nanu aitaas mbaa e nking'asia kulo tung'ana, mbaa e nking'asia sapuki; ore ina ng'eno oo lang'eni lenye neish, ore ina musunoto e lelo amusumusok lenye neishieki.”

¹⁵Woi ninche lelo ooturoki enkop aaisudoriyie Olaitoriani mbaa enye, lelo ootii mbaa enye enaimin, lelo oojo, “Kaing'ae nadol iyiook? Kaing'ae nayiolo iyiook?”

¹⁶Imbelekenyenye intae mbaa e atua aayau oriong! Amaa olaitobirani loo motioo oo nkulupuok, keitanyaanyukieki nkulupuok; eji metaa kejoki entoki naitayioki ilo oitayio, “Eitu ninye kintayu nanu,” aashu ejoki entoki naitobiraki ilo oitobira, “Meeta iyie entoki niyiolo”?

¹⁷Aime enkiti rishata nang'or pee eitaa Lebanon enkurma naleng, ore ina kurma naleng neibelekenyi aaitaa entim?

¹⁸Ore kenya teina olong naa kelo ilo ming'ani aning irorei le mbuku, ore te misimisi o enaimin nedolishoyu nkonyek e ilo modooni.

¹⁹Ore ilo obor neng'amu ninye eng'ida ng'ejuk naing'uaa Olaitoriani, ore olaisinani aisul iltung'ana nelo ashipakino Ilo Sinyati le Israel.

²⁰Ore ilo lemeeta olng'ur naa keishieki neiting'ieki ilo oitokoos, ore lelo pooki ooing'or pee eas entorroni nedung'ori aaiwuang'ie,

²¹lelo ooitapong'oo iltung'ana too rorei aaitasur, nepikaki orreshet ilo oisikong'isho te kishomi, ore to sayia le pesho neibelekeny arriny ilo asipani.

²²Ore naa, nji ejo Olaitoriani laa ninye apa otokordua Abraham tialo enkaji e Yakobo: “Meigil aekata Yakobo adol enkurruna, nemeigil aekata enkomom enye aipusu.

²³Amu te neing'or ninye inkera enyena, ina siaai oo nkaik aainei tiatua ninye, neitisiny ninche enkarna ai; neitisiny ninche ilo Osinya le Israel.

²⁴Ore lelo oopong'ori too ltauja nepuonu aayiolou, ore lelo ooing'unyung'uny neng'amaa nkitanapat.”