Read Maasai Bible – Biblia Sinyati Isaya 30 Bible Online

Isaya 30 - Maasai Bible – Biblia Sinyati bible

Isaya 30

¹“Woi ninche nena kera naagolong'u,” Olaitoriani ojo, “Lelo ooitobir enkitobirata neme enaai; lelo ooitayu mbaa enye nemetii oltau lai, pee etum ninche aatoponai eng'oki te shumata eng'oki;

²lelo oonapa pee edoyio aapuo Misiri nemaaikilikuanishore ninche, pee epuo aasaru emitunoto e Farao, nepuo aaing'oru eneigara to loip le Misiri!

³Ore te nkaraki ina, keibelekenya ina mitunoto e Farao aaku enkurruna, ore ine ningarara to loip le Misiri, neibelekenya aaku osina linyi.

⁴Amu ore hoo netii ilkituaak lenyena Soan nepuo ilbalusuni lenyena aabaiki Hanes,

⁵kepuonu ake aakurru pooki tialo ilo orere lemeidim aataret ninche, nemeyau eretoto aashu dupoto, kake enkurruna ake o esulare.”

⁶Ele olkilikuai oipirta ing'uesi naatii Negeb: ina kop pooki natii enyamali o sina, ine nepukunye elipong o lng'atuny o lng'atuny, entara o enturbubua, nenap ninche karsisisho enye too nkoriong'i nenap ilchumat lenye too ntamesin aayaki ilo orere lemeret ninche.

⁷Ore eretoto e Misiri naa pesho, ina pee atejo nanu ninye, “Rahab ina naton aitirring'a.”

⁸Ore naa taata, shomo ngero ina te dukuya ninche too soito dapashi oogueta nintoki asiraki ninye embuku, pee etum ataa te nkata nalotu shakenisho ntarasi.

⁹Amu olorere kiseruti ninche, inkera naalejisho, inkera nemening ninche enkiteng'enare o Laitoriani;

¹⁰lelo oojoki iladuaak, “Emidolisho” nejoki iloibonok, “Emimbonoki iyiook esipata; entoliki iyiook mbaa nemeitureisho, embonu mbaa o lng'am,

¹¹tung'uai enkoitoi, mbelekenyayu tapaasha orrekie. Mincho kintoki iyiook aaning mbaa e Ilo Osinya le Israel.”

¹²Ore naa, nji ejo Ilo Osinya le Israel, “Ore te nkaraki nitemenaitie intae ele rorei, nisiligigi olwuasa o enkiseroto, ningarakino ninche,

¹³ore te nkaraki ina, kelo ena ng'oki atiu te ntae anaa olbaata le suntai naado netaa kejo pee eurori, naa ore euroroto enye naa nabo kata;

¹⁴ore embelata nalo abela netiu anaa emoti oo nkulupuok naitiaaki aaotiki ore mbelat enyena nemeitoki asotunoyu, meitokini ninye aatum embelati nayayieki enkima aashu naokunyeki enkare to lchorro.”

¹⁵Amu nji ejo Olaitoriani Enkai, Ilo Osinya le Israel, “Ti nishukunye ayeng'iyeng'a nikintajeuni; te nkitirring'ata o te nkisiligata elotu engolon ino.” Nimiyieuu intae.

¹⁶Kake itejo, “A'a! Eikiikuet iyiook too mbartan,” ore te nkaraki ina, ikuetikuete aapuo, “Ore iyiook nikikuetie mbartan aakuet oleng,” neaku keten oleng lelo oosuj intae.

¹⁷Keisik aailanyisho ilkulinyi oora enkalifu te nebuak oltung'ani obo, ore te mbuakunoto oo ltung'ana imiet nikuet ailanyisho o mikitung'uari, nitiu anaa enchata naunieki enanka te nchumata oldoinyo.

¹⁸Ore naa kiaanyita iyie Olaitoriani pee king'urrie; neaku keisisi ninye, pee etum aing'urrie intae. Amu ore Olaitoriani naa Enkai oo sipat. Kemayiana lelo pooki ooanyu ninye.

¹⁹Lo tung'ana le Sion, kulo oomanya Yerusalem; mingiligili aekata aaishir. Kesipa keing'urrie ninye intae teina kishirakinoto inyi; te nening ninye ilo kiyioi linyi, naa kewaliki intae.

²⁰Naa ore hoo neisho intae Olaitoriani endaa e nyamali o enkare o sina, meigil Olaiteng'enani linyi aisudoo kewan, kake kedol inkonyek inyi Olaiteng'enani linyi.

²¹Ore nkiyiaa inyi te siadi intae, nening oltoilo ojo, “Nena enkoitoi, eima intae ine,” ti nimbelekenyanya intae aapuo enkalo e tatene aashu enkalo e kedianye.

²²Nipikipiki intae olduruk nena kitanyaanyukot naapising'a te nkosholai o nena naasholuno e saabu. Nindapashaa intae ninche anaa ntokitin nemesinya; nijokiki intae ninche, “Enchom nimiitutu!”

²³Naa keirriwaki intae Olaitoriani enchan te nkaraki lelo anterera lituuno o ina kurma nabulu te nkop, nalo aisho te nkumoi. Ore kenya teina olong naa kepuo nchoo inyi aadaa too ndaat naalala.

²⁴Ore ilmong'i o sirkon ooturisho nenya olkujita otudung'oki oisukutieki.

²⁵Ore te pooki doinyo oado o pooki doinyo naikarere, naa kejing inkonyek oo nkariak ina olong kenya eyiang'are kitok te neurori iltaleta.

²⁶Ore ake sii naa kelo ewang'an o lapa atiu anaa ewang'an e nkolong. Ore ewang'an e nkolong neaku katitin naapishana, anaa ewang'an oo nkolong'i naapishana, teina olong kenya nalo Olaitoriani aen olbae too ltung'ana lenyena, neishiunye lelo baa apa le oshoto enye.

²⁷Ng'ura ajo kelotu enkarna o Laitoriani eing'uaa enelakua, neyupuyup engoro enye netii empuruo kitok; ore enkutuk enye nebore engoro, ore olng'ejep lenye neikununo anaa enkima nanyaisho.

²⁸Ore enkiyang'et enye neikununo anaa enchorro naruko adooyo neilepu enkare o metaa keitabaiki oltung'ani olgos; pee esil ina are lelo oshon te silet e nkidaata entorroni, nepiki nkutukie oo loreren nkeenta naaitapong'orieki.

²⁹Ipuopuo intae aatiu anaa ilooata osirua osinya kewarie iranyishosho. Nitumutumu eng'ida o ltau nitiuu anaa te neoshi enkinanta pee epuoi oldoinyo lo Laitoriani, ina dapidapoi e Israel.

³⁰Naa keisho Olaitoriani ilo toilo lenye le nkitoo metoning'o pooki ng'ae, ore ina oshoto e nkaina enye nedou metodoli te ngoro napi o te nkima namutisho, te nebo olkutati o enchan oo soito.

³¹Ore lelo le Asiria naa keiput enkiputukuny o lkirutoto te nening ilo toilo lo Laitoriani, ina kata eoshisho ninye te ng'udi enye.

³²Ore eosh Olaitoriani ninche aigil, netoni iltung'ana lenyena aaranyisho too lwululi o too nkai oo sinkolioitin. Enkai makewan naarare ile Asiria.

³³Eidipaki apa aaitobira ewueji neyupuyup; ee te nkaraki ilo aiguanani, eitobiraki endapasho o enguton, netii ilkeek kumok o enkima kitok. Naa Enkiyang'et o Laitoriani naikununo anaa enkima nakutu isoito.