Read Maasai Bible – Biblia Sinyati Isaya 33 Bible Online

Isaya 33 - Maasai Bible – Biblia Sinyati bible

Isaya 33

¹Woi iyie ora olainyalani neitu kinyali iyie, niaata enkeleekisho, neitu iyie kintaasi embae e nkeleekisho! Ore ake pee indip ainyalisho nikinyali sii ninye iyie; ore pee indip mbaa inono e nkeleekisho nikintaasi iyie ine nkeleekisho.

²Olaitoriani ing'urrie iyiook, iyie iyiook kiaanyita. Taa engolon ang anaake tadekenya, niaku enjeunoto ang te nkata e nyamali.

³Ore to ltoilo le ndarata neisik iltung'ana, ore ti nidumunye iyie neidapasha loreren.

⁴Naa kearari intokitin inono neishunye anaa enaishu ilmaat enkop; ore anaa enaitiam olmaati te nkop, neitiam iltung'ana te nkop.

⁵Keisisi Olaitoriani, amu etii ninye shumata oleng; keiput ninye Sion esipata o esupatisho.

⁶Naa ninye olo aaku enkitashoto too nkatitin inyi, neaku kitok enjeunoto o eng'eno o eyiolounoto; naa euriata o Laitoriani ninye olchumati lenye.

⁷Ng'ura lelo oing'ok, eishirita ninche ti auluo; ore lelo balusuni le seriani, neishirita te mion.

⁸Etoliyiote inkoitoi sapuki meekure eetae olalotoni. Etigile olning'o, netemenayioki ilchakenini, meetae oltung'ani oshilaa olikae.

⁹Eishirita enkop netalepori to sina; etumute Lebanon netoyio; etotiwuo Sharon anaa olpurkel, ore Bashan o Karmel neipiripiroitie mbenek enye.

¹⁰“Kadumunye nanu taata,” Olaitoriani ojo, “Ore taata kaitashe nanu; naa kaayiolouni nanu taata.

¹¹Intobiribiri intae mbaa naaijo suut, nipuopuo aayau mbaa e pesho; ore enkiyang'et inyi naa enkima namut intae.

¹²Netiu olorere anaa ilootapejoyioki aaitaa enkuruoni, netiu anaa ilkiku ootudung'oki nepejori te nkima.”

¹³Entoning intae lelo oolakua, ina nataasa nanu; ore intae kulo oolakua, entayiolo enkidimata ai.

¹⁴Ore lelo aing'okok ootii Sion neiruto; eibung'a olokirikiri lelo lemeyiolo Enkai: “Kalo tiatua iyiook oidim atotona te nkima nanyaisho? Kalo tiatua iyiook oidim atobiko te nkima oo ntarasi?”

¹⁵Ore ilo olo too nkoitoi naaitoriori neiro sipat, ilo omenaa tumoto e nkitorogonyare, ilo oipirripir inkaik enyena meibung ntokitin e ropare, ilo oiken inkiyiaa enyena pee mening enkibukoroto o sarge; neiken inkonyek enyena pee meing'or entorroni.

¹⁶Ilo ninye olo aton too wuejitin e shumata; ore ewueji e nkirrita naa isempewueti too soito; nepuoi aaisho ninye endaa o enkare.

¹⁷Keyooki inkonyek inono aaing'or olaiguanani te nkishiaa enye; neing'or ninche ina kop dapash oleng.

¹⁸Nepuo indamunot inyi aaing'asia te ilo kirutoto, nijojo, “Koree ninye ilo apa oikenisho, Koree ninye ilo apa oineneng atem kodi? Koree ninye ilo apa oiken iltaleta?”

¹⁹Mingiligili aekata aadol lelo tung'ana leeiking'a, lelo tung'ana limiyiololo intae enkutuk enye nimindimidimi aatoning'u ooiramiram te nkutuk nimining'ung'u.

²⁰Eng'ura Sion, ina anasa gelunoti nikipolosishore iyiook! Kepuo inkonyek inono aadol Yerusalem, ina manyisho naitirring'a, ilo ng'obor lemeigusugus, lemedotunye aekata nena sheito naaunore, nemedung'o nena keenta naaenare.

²¹Ore teine nelo Olaitoriani te nkitoo aaku te nebo iyiook ewueji ine netii ilkejek dapashi o erat, nemeim ine imelin e nkitoo.

²²Olaitoriani ninye olarishani lang, Olaitoriani ninye olo aitore iyiook, Olaitoriani ninye olaiguanani lang; keitajeu ninye iyiook.

²³Eitololong'ita nkeenta e meli; meitirrishayu ninche. Ore nena masaa kumok neori, keyae o mewaita ilmaiman.

²⁴Nemeetae obo omanya ina kop ojo, “Kamuoi nanu”; ore lelo tung'ana oomanya ine naa kepalakini ing'ok enye.