Read Maasai Bible – Biblia Sinyati Isaya 34 Bible Online

Isaya 34 - Maasai Bible – Biblia Sinyati bible

Isaya 34

¹Entinyiku intae lo oreren, pee ining'ining'i, entuun nkiyiaa intae lo tung'ana! Nchoo metoning'o enkop o nena pooki naatii atua. Nchoo metoning'o enkop o nena pooki naapuku tiatua enkop.

²Etagorokine Olaitoriani iloshon pooki netagorokine ilmang'ati lenye, eiturrayie ninye ninche, eishooyie ninche aisho lelo oomut ninche.

³Kenang'ari mpopoki ong'ata, nerupa mpopoki enye eidapashakino enkop, neruko osarge lenye aim nchumat oo ldoinyo.

⁴Ore olorora le keper nerrarra aaku enterit. Ore oloing'ang'e pooki nepiyaya anaa endapana ore ilo orora pooki nerrarrunye anaa enasulunye mbenek o lng'aboli, anaa enasulunye ilng'abolo ooto to lchani.

⁵Etudumunye olalem lai netaraposhe te shumata; ng'ura ajo kesulakino ninye Edom te nkiguana, lelo tung'ana latudung'oko nanu enkiguana.

⁶Keeta Olaitoriani olalem oiputa osarge, neimulumulita eilata, te nebo osarge loo lkerra o lkineji, te nebo enkurriny oo lairakuj oo lkerra, amu kelo Olaitoriani aibung olasar te Bosara, kelo ninye aitayu esesekuanare kitok te Edom.

⁷Naa kedoiki ilosokuani ninche te nebo ilmong'i o loing'ok magil. Ore ina kop enye neiput osarge, ore ina kop enye nenyilu te ilata.

⁸Amu keeta Olaitoriani enkolong e lap, ina olong nalo aitalaku elap te nkaraki Sion.

⁹Ore ilkejek le Edom neibelekenya aatiu anaa enkoronko, neaku enkulupuoni enye enkima nakutu isoito neaku ina kop enkoronko nayupuyup.

¹⁰Ore dama o kewarie nemeye ina kima; neilep empuruo enye alo shumata ntarasi. Ore too ishoritin pooki neaku ina kop mijooni; nemeitoki oltung'ani aim ntarasi o ntarasi.

¹¹Kake kelo aaku lenkalem o iyai ootii ina kop, ore emotonyi oo nkiyiaa o lkurruk nemany ine. Neitorioki Olaitoriani olmilo ina kop nedoiki enyamali lelo kituaak lenyena.

¹²Neipoti ine aajo, “Enemetii enkitoria”, ore lelo kituaak lenyena pooki neaku pesho.

¹³Nebulaki ilkiku lelo sempewueti lenyena, nebulaki olkurushashi o suut lelo sempewueti lenyena o nkang'itie enyena naagol. Nelo ine aaku emanyisho oo mbariak ewueji nemany isidan.

¹⁴Nepuo mbariak aashulare ilng'ojiniaa, neipotu oloirirua le ntim olikae, nejokino, ee, eisidai enkewarie tene, neing'uraki kewan ewueji neyeng'iyeng'are.

¹⁵Teine elo emotonyi aitobir enkaji enye, nepik inkiyioitin enyena abori oloip lenye; ee teine epuo aaiturrurro ilkurragoso epuo maare.

¹⁶Ing'oru isuma te mbuku o Laitoriani; meetae hoo nabo e kuna nemetii; nemeetae ake enemelotu eboitare enkae. Amu enkutuk o Laitoriani naitanapishe, naa Enkiyang'et enye naiturrurro pooki.

¹⁷Etooshoko ninye ninche enkukuo, enkaina enye natoorikia ninche rubat enye too lkererin; kepuo ninche aaya ina kop ntarasi. Ore too ishoritin naa kepuo ninche aamany ina kop.