Read Maasai Bible – Biblia Sinyati Isaya 35 Bible Online

Isaya 35 - Maasai Bible – Biblia Sinyati bible

Isaya 35

¹Keng'idayu olpurkel o enkop natoyio, neng'idayu ilo purkel neleng'u oleng; neiput ntapuka.

²Keleng'u ninye oleng, neranyisho te ng'ida. Ore ina kitoo e Lebanon neishori ninye, ore ina kitoo o enkishiaa e Karmel o Sharon nedol enkitoo o Laitoriani, ina kitoo e Nkai ang.

³Ntagolo nena aik naatalepori, ntasheyie ilo oikirikira te nkuretisho.

⁴Tiaaki lelo ootureishote, “Entagoluoto, emiureishoyu! Eng'ura Enkai inyi elotu te lap, kelotu ninye amut ilmang'ati linyi, Kelotu ninye aitajeu intae.”

⁵Ore ilo modooni neboli inkonyek enyena, neitoning'ishoi ilo ming'ani;

⁶neipid olmaima anaa enkolii, neranyisho olng'ejep lo lemeyiolo airoro te ng'ida. Amu keijirrijirru inkariak to lpurkel, neiput inkonyek oo nkariak enkop natoyio.

⁷Ore ilo sinyai oirowua naa kelo aaku olchorro, ore ina kop oo lbaat neijirrijirru enkare, ore ina manyisho oo mbariak nelo aaku engilata naleng, netiu nena kujit anaa oseyiai o enarau.

⁸Nejing enkoitoi kitok ine, naji Enkoitoi Sinyati; nemepuo aaim ine iltung'ana lemesinya, ore ilmoda nemepong'okino ine.

⁹Nemejing olng'atuny ine, nemelotu ae ng'ues ake ninye torrono; metumi ninche teine, kake lelo ootokorduaki ake oopuo aaim ine.

¹⁰Naa lelo ooinyiang'ua Olaitoriani ake oopuo aarrinyunye, nepuonu Sion eranyisho; nejing eng'ida oo ntarasi shumata ninche; nepuo ninche aatum enchipai o eng'ida, nemeitoki aatum emion o sina.