Read Maasai Bible – Biblia Sinyati Isaya 36 Bible Online

Isaya 36 - Maasai Bible – Biblia Sinyati bible

Isaya 36

¹Ore to lari le tomon oong'uan le nkitoria e Hesekia, nelotu Senakerib ilo aiguanani le Asiria nena anas pooki naasheta e Yuda, neibung ninche.

²Ore ilo aiguanani le Asiria neirriwaa olkitok obo le nkitoria enye te Lakish meshomo enetii olaiguanani Hesekia te Yerusalem eeta enjore kitok. Nelo ninye aitashe te mbata olchorro le shumata, teina oitoi natii olaisujani loo nkilani.

³Nelotu Eliakim olayioni le Hilkia enetii ninye laa ninye apa oitaisheiki ina aji e nkitoo. Nelotu sii Shebna ilo aigeroni, o Yoa olayioni le Asafu laa ninye oikenisho.

⁴Nejoki ilo kitok le njore ninche, “Entiaaki Hesekia, ‘Nji ejo ilo aiguanani kitok, ilo aiguanani le Asiria: Kainyoo iyie ing'idare?

⁵Ijo iyie keaku irorei ake duoo enkoitoi nagol napuoyieki olarrabal? Kaing'ae taata iyie ingarakino, eji peyie kimpirakinore nanu?

⁶Ng'ura ajo Misiri iyie ingarakino, naikununo anaa eng'udi o ltiyani natigile, nerem enkaina e pooki ng'ae otirman ninye.

⁷Kake tinikijoki iyie: Olaitoriani Enkai ang iyiook kingarakino: mme ilo otii ilpereren lenyena loo lasarri shumata, eiwuangie Hesekia lelo pereren nejoki Yuda o Yerusalem; Ipuopuo intae aaserem te dukuya ele perere lo lasar?

⁸Wou naa taata, toning'ore olkitok lai, ilo aiguanani le Asiria, amu kaaisho nanu mbartan nkalifuni are, tenaa indim iyie te nkalo ino anoto ilakedok pee eked ninche.

⁹Kaji naa iyie inko pee intukurru ilo arikoni obo le njore tiatua lelo kulikae aisiaayiak ti abori, eji isiligita Misiri, mikirriwaki mbartan oo ngarrin o lakedok lenye.

¹⁰Amaa, ijo kaewuo nanu ena kop metii Olaitoriani aidaikie nainyal? Aatiaaka nanu Olaitoriani, Shomo taarare ena kop, ninyal ninye.’ ”

¹¹Neitoki Eliakim o Shebna o Yoa aajoki ilo kitok le njore, “Kitoomono iyie, irorie isinkan linono te nkutuk e Aramea, mirorie iyiook te nkutuk e Yuda metoning'o iltung'ana ootii esuntai.”

¹²Kake etejo ilo kitok le njore, “Kaairriwua nanu olkitok lai maeu airorie olkitok linyi, o intae, nemairorie lelo ootoni te suntai, laa ore ninche te nebo nipuopuo aanya inkik inyi niokioko nkulak inyi?”

¹³Neitoki ilo kitok le njore aitashe nebuaku to ltoilo kitok te nkutuk oo ltung'ana le Yuda, ajo, “Entoning irorei lo laiguanani kitok, ilo aiguanani le Asiria!

¹⁴Nji ejo olaiguanani, ‘Emincho Hesekia meteleja intae, amu meidim ninye atokordu intae.

¹⁵Emincho Hesekia ejoki intae eji maigarakinoto Olaitoriani, eji ejo; Kelo Olaitoriani akordu iyiook: ore ena anasa nemelo ninye ajing inkaik o laiguanani le Asiria.

¹⁶Emining intae Hesekia, amu nji ejo olaiguanani le Asiria. Entobira intae osotua o nanu nipuonunu enatii nanu, pee etum pooki ng'ae te intae ainosa isabibu lenyena o lng'abolo lenyena, neok pooki ng'ae te intae enkare o lchorro lenye;

¹⁷o metaba anaa nalotu nanu aya intae ina kop nanyaanyukie enkop inyi, ina kop e ntapa o sabibu, ina kop natii endaa o lng'anayio.

¹⁸Enteng'enuoto melej ake intae Hesekia ejo: Kelo Olaitoriani akordu iyiook. Keetae aekata enkai oo loshon natokordua enkop aitung'uaa enkaina o laiguanani le Asiria?

¹⁹Koree nena aitin e Hamat o Arpadi? Koree nena aitin e Serfarfaim? Ketokordutua ninche Samaria aaitayu te nkaina ai?

²⁰Kaa too nkaitin pooki e kuna kuapi natokordua enkop enye aitayu te nkaina ai, eji metaa kelo Olaitoriani akordu Yerusalem te nkaina ai?’ ”

²¹Kake etigirate apa ninche neitu ewaliki olomoni hoo obo, amu ore apa enkitanapata o laiguanani naa, “Eming'amaa intae ninye.”

²²Neitoki Eliakim olayioni le Hilkia laa ninye olaitasheikinoni le nkaji e nkitoo o Shebna, laa ninye olaigeroni o Yoa olayioni le Asafu, ilo aikenani, aapuonu enetii Hesekia etopolosa ilkilani lenye. Neinosaki ninye irorei le ilo kitok le njore.