Read Maasai Bible – Biblia Sinyati Isaya 37 Bible Online

Isaya 37 - Maasai Bible – Biblia Sinyati bible

Isaya 37

¹Ore ake pee ening olaiguanani Hesekia ina, nepolos ilkilani lenyena, neimulumul kewan too lkuniyiani, nelo ajing atua enkaji o Laitoriani.

²Neirriwaa Eliakim laa ninye apa oitasheiki ina aji e nkitoo o Shebna ilo aigeroni o lelo apolosak kituaak, eishopito ilkuniyiani meshomo enetii oloiboni le Nkai Isaya, olayioni le Amos.

³Nejoki ninche ninye, “Nji etejo Hesekia, ‘Ore ena olong naa enkolong o sina, enkolong e moroto o esulare; etaa keini inkera nemeetae engolon naiunyeki.

⁴Ebaiki netoning'o Olaitoriani Enkai ino irorei le ilo kitok le njore, oirriwua olkitok lenye, ilo aiguanani le Asiria meeu asukeny Enkai naishu, nesurdaanyisho te lelo rorei ootoning'o Olaitoriani Enkai ino. Ore te nkaraki ina intirrisha enkomono ino te nkaraki ilo pisiai otelekua.’ ”

⁵Ore ake pee epuonu ilaisiaayiak lo laiguanani Hesekia enetii Isaya,

⁶nejoki Isaya ninche, “Entiaaki olkitok linyi, ‘Nji ejo Olaitoriani: Emiureishoyu te nkaraki lelo rorei litoning'o, laa ninche aaisikong'ie osinka lo laiguanani le Asiria.

⁷Kapik nanu ninye enkiyang'et nelo aning olmarenke, nerrinyokino ninye enkop enye makewan, naa kaisho nanu ninye metua to lalem oibung'ita ninye te nkaina enye makewan.’ ”

⁸Nerrinyo ilo kitok le njore, nelo ainepu olaiguanani le Asiria earare Libna; amu etoning'o apa ninche aajo eshomo olaiguanani aing'uaa Lakish.

⁹Nening ilo aiguanani mbaa naaipirta Tihaka olaiguanani le Etiopia nchere, “Kirriwaka ninye olkilikuai pee kilotu aarare.” Ore ake pee ening ninye ina neirriwaki ilkiliku Hesekia, ejo,

¹⁰“Nji enchom entiaaki Hesekia ilo aiguanani le Yuda, ‘Mincho kilej ina Ai ino naa ninye isiligita, ejo esiligie olorere ajo meishoori Yerusalem aapik atua nkaik o laiguanani le Asiria.

¹¹Itoning'o enaitaasa ilaiguanak le Asiria nkuapi pooki, neinyal ninche aaidaikie katukul. Eikipuoi doi aakordu iyie?

¹²Ketokordutua nena aitin oo loshon ninche, lelo oshon apa ooidaikie loo papa, Gosan o Haran o Resef o lelo tung'ana le Eden apa ootii Telasar?

¹³Koree taata olaiguanani le Hamat, o laiguanani le Arpad o laiguanani le nkanasa naji Sefarfaim o laiguanani le Hena aashu olaiguanani le Efaa?’ ”

¹⁴Neng'amaa olaiguanani Hesekia ina palai te lelo ooirriwuaki, neisum ninye, Neilep Hesekia alo enkaji o Laitoriani, nelo aisalaash ina palai te dukuya Olaitoriani.

¹⁵Neomon Hesekia Olaitoriani, nejo,

¹⁶“Olaitoriani loo lororani, na Ai e Israel, itonita to lorika lino le nkitoo te shumata ilkerubi, naa iyie Enkai, iyie ake, ore too nkitoriat pooki e nkop nintobira iyie shumata o enkop.

¹⁷Irrugu enkiok ino, Olaitoriani, toning'o, nibol inkonyek inono Olaitoriani aing'or; nining kulo rorei pooki le Senakerib, ooirriua ninye pee emor Enkai naishu.

¹⁸Ore te sipata Olaitoriani, eitomijoono laiguanak le Asiria iloshon pooki o nkuapi pooki.

¹⁹Netanang'akita nkaitin enye atua enkima; amu mme nkaitin apa ninche, kake esiaai oo nkaik e tung'ana, nkeek o soito; neaku eidaikieki apa ninche.

²⁰Ore naa taata Olaitoriani Enkai ang, ntajeu iyiook te nkaina enye, pee etum nkitoriat pooki enkop aatayiolo nchere iyie ake Olaitoriani.”

²¹Neitoki Isaya olayioni le Amos airriwaki Hesekia olkilikuai ejo, “Nji ejo Olaitoriani Enkai e Israel: Ore te nkaraki nikitoomono iyie nanu te nkaraki Senakerib olaiguanani le Asiria,

²²ele ninye ilo rorei oiroro Olaitoriani eipirta ninye: ‘Eikimen ninye iyie, eikisukeny ninye iyie - Yerusalem; neipirripir endukuya enye te siadi iyie - na tito e Yerusalem.

²³Kaing'ae doi ilo litamoro nisurdaany? Kaing'ae ilo litabuaka nishumaki nkonyek inono to lmena? Aime Ilo Osinya le Israel!

²⁴Ore tialo isinkan linono nitamoro Olaitoriani, nitejo iyie, ore too ngarrin aainei kumok oo mbartan, nashomo nanu ailep enchumata oo ldoinyo, o atua Lebanon; naturoyie nanu ltarakua lenyena adoru, lelo keek lenyena sidain; ashomo nanu abaya shumata aisul, ina tim enye nasur.

²⁵Atuturuo nanu ilchorroi naok nena ariak, natunuka too ndapi oo nkejek aainei nena onyek oo nkariak pooki e Misiri.

²⁶Keitu iyie ining nchere aterretena apa nanu moitie? Ina taata nalotu aas, eji nipuopuo intae aaitaa nkanas naasheta osototi loo mauti.

²⁷Ore apa meeta lelo oomanya ine engolon, neiruto neiputukuny, netiu ninche anaa nkaitubulu e ong'ata, netiu anaa nkujit naanana netiu anaa nkujit naatii shumata e nkaji, naaidaikieki eitu ebulu.

²⁸‘Ayiolo nanu emanyisho ino o eninkunari te nimpang o ti nijing'u, o ina nikigorokino nanu.

²⁹Ore te nkaraki nikitagorokine iyie nanu neewuo ilo wuasa lino abau inkiyiaa aainei, kapik nanu olororoi lai nkumeishin inono, napik esekenkei enkutuk ino, naaibelekeny iyie aipirie ewueji duoo ning'uaa.’

³⁰“Naa kelo ena aaku olmonekie te iyie: ore tele ari inosa pooki toki nabulu openy. Ore to lari li are inosa ina nabulu aikununye neijia; ore to lari liokuni tuunisho, ninkesisho, niun isabibu, ninya ilng'anayio lenye.

³¹Ore ilo pisiai oleku le nkaji e Yuda, neitoki aaibung ntona ti abori, neiu ilng'anayio te shumata.

³²Amu te Yerusalem eipang'u ilo pisiai naa oldoinyo le Sion eimu ina tukus e lelo ooleku. Amu Olaitoriani loo lororani olo aitabaya ena.

³³“Ore te nkaraki ina, nji ejo Olaitoriani tialo ilo aiguanani le Asiria. Melotu ninye ajing'u atua ena anasa, anaa eng'oroo embae teine, aashu elotu anyikaki eeta elong'o aashu eng'adu ninye.

³⁴Ina oitoi naimu ninye eigil aim errinyo, nemelotu ninye ajing'u atua ena anasa, Olaitoriani ojo.

³⁵Amu kamitu nanu ena anasa aitajeu, te nkaraki kewan ai o te nkaraki osinka lai Daudi.”

³⁶Nelo olmalaika lo Laitoriani, nelo aar metuata iltung'ana inkalifuni iip o ntomoni isiet o imiet te lelo ng'oborri loo ltung'ana le Asiria. Ore ake pee einyototo iltung'ana tadekenya ng'ura, etaa duoo kulo pooki mpopoki.

³⁷Neitoki Senakerib ilo aiguanani le Asiria arrinyo nelo aton te nkang enye te Ninawi.

³⁸Ore eseremisho ninye te nkaji e Nisrok, ina ai enye, nepuonu Adramalek o Shereser, lelo ayiok lenyena aasesekuan ninye to lalem, neisik aapuo oldoinyo le Ararat. Neitoreisho olayioni Esar-hadon te rishata enye.