Read Maasai Bible – Biblia Sinyati Isaya 40 Bible Online

Isaya 40 - Maasai Bible – Biblia Sinyati bible

Isaya 40

¹Ntagolo iltung'ana laainei, ntagolo iltung'ana laainei, Olaitoriani ojo.

²Irorie Yerusalem te mborron, ninchiraki ninye tiaaki eishunye olarrabal lenye, netapalakaki ninye ing'ok enyena, amu etang'amua apa ninye te nkaina o Laitoriani enkitalakunoto oo ng'ok enyena katitin are.

³ Ening'o oltoilo oishirita: “Ore ti ong'ata ntobira enkoitoi o Laitoriani, Ntorioi to lpurkel enkoitoi te nkaraki Enkai ang.

⁴Ore pooki nong'oto nagum neilepunyeki, ore pooki doinyo o ewueji nerupa neitadouni; ore ewueji nemeitoriori neitoriori, ore ewueji nemeisiasha neisiashayieki.

⁵Amu kepuoi aaibalunye enkitoo o Laitoriani, nedol iltung'ana pooki te nebo, amu enkutuk o Laitoriani nairoro kuna.”

⁶Ejo ilo toilo, “Nchira!” Najo nanu, “Kaishir ajo aa?” Ore pooki naata osesen netiu anaa nkujit, ore ina kishiaa enye pooki netiu anaa entapukai e ong'ata.

⁷Ketoyu nkujit, nerrarrarri ntapuka, te nekut Enkiyang'et o Laitoriani ninye; kesipa ketiu iltung'ana anaa nkujit.

⁸Ketoyu nkujit nerrarrarri intapuka; kake ore ororei lo Laitoriani Enkai ang neuno intarasi.

⁹Ilepa iyie shomo enchumata o ldoinyo oado, Iyie Sion, ntadarai lelo omon supati; ilepunye oltoilo lino te ngolon, Oo Yerusalem, ntadarai lelo omon supati, ilepie oleng, miureshoyu; tiaaki nena anas e Yuda, “Eng'ura Enkai inyi!”

¹⁰Kelotu Olaitoriani Enkai te ngolon, naa enkaina enye nalotu aitoreisho; ng'ura etii enkishooroto enye te nebo ninye, netii nchuneti enyena dukuya ninye.

¹¹Keirrita ninye eluaata enye anaa olchekut, neibung ninye ilkuoo too nkaik enyena, nenap ninche to lgoo lenye, nerikoo maakutiti nena oijoo.

¹²Kalo otetema enkare te ndap e nkaina enye netem shumata te nkitorioroto e nkaina enye, neishaki enterit e nkop pooki te ntemet neineneng ildoinyo o ndoinyo to rratili.

¹³Kalo otuutayie Enkiyang'et o Laitoriani, aashu kalo otaa olaikooni lenye neiteng'en ninye?

¹⁴Kaing'ae eikilikuanishore ninye pee etum ataarriyiana, naa aing'ae oiteng'ena ninye teina neitodol ninye enkoitoi e yiolounoto?

¹⁵Kesipa etiu iloshon anaa olkitong'ati le enkare naitong to ltoo, eikununo nkuapi anaa enkinyi terit napuyiapui; ng'ura ajo kedumu ninye lemankale pooki anaa enkinyi terit napuyiapui.

¹⁶Meidip ilkeek le Lebanon enkima, nemeidip ing'uesi enyena pooki olasar opejori.

¹⁷Etiu iloshon pooki anaa pesho te dukuya ninye, eikenayie ninye ninche anaa pesho, aashu olng'am.

¹⁸Kaing'ae naa kintanyaanyukie Enkai, aashu kainyoo narisiore ninye?

¹⁹Ke nkitanyaanyukoto e Nkai Ina naitobirua oltung'ani? Ina namur olkunoni te saabu, nepik ninye ilpisia le nkosholai.

²⁰Ore ilo omena lemeidim ainyiang'u olasar, negelu olchata lemeitiapurus; neing'uraki kewan olaguetani arriyia, ounoki enkitanyaanyukoto nemeigusugus.

²¹Keitu iyie iyiolou? Keitu iyie ining? Keitu apa kilikini iyie te nkiterunoto? Keitu apa iyiolou iyie ebaiki olkitamanyunoto le nkop?

²²Ninye ilo oton te shumata enkop, ore lelo oomanya enkop neikununo anaa ilmaat; kaing'ae ilo oisalaash shumata anaa olkarasha, nelak anaa olng'obor olo amany.

²³Ninye ilo oitadou ilkituaak, aitaa pesho ore lelo aitoriak le nkop neitaa pesho.

²⁴Penyo netuunoki ninche, penyo neibung'a ntona enkop, te nekut Olaitoriani ninche to siwuo netoyu, neya osiwuo ninche anaa suut.

²⁵Kaing'ae naa intae kintanyaanyukiekie nanu? Eji pee atiu nanu anaa ninye? Ilo Sinyati Obo ojo.

²⁶Tushumu nkonyek inono toduaa shumata; kaing'ae oitobirua kuna pooki? Ilo oyau ilo orora lenye te nkumoi, neipotu ninche pooki too nkarn enye, teina kitoo e nkidimata enye, naa ore te nkaraki nagol ninye oleng meimin ninye nabo.

²⁷Kainyoo pee ijo iyie Yakobo, niro iyie Israel ajo, “Eisudoyie Olaitoriani enkoitoi ai, ore esipata ai neitu eshilaa Enkai ai?”

²⁸Keitu iyie iyiolou? Keitu iyie ining? Ore Olaitoriani naa Enkai oo ntarasi, ninye oitobira ineeiting'ie enkop. Menauru ninye nemelepori, ore eyiolounoto enye nemejurrunoyu.

²⁹Keisho ninye engolon ilo oiterria, ore ilo lemeeta enkidimata neponiki engolon.

³⁰Keiterre doi ninye elelero nenauru nebatata iltung'ana ooti te nauri;

³¹kake ore lelo oanyu Olaitoriani naa keitang'ejuki engolon enye, keilep ninche too naipuko anaa lkurragoso, nepuo aakuet nemenauru, nepuo ninche kake meiterre te nauri.