Read Maasai Bible – Biblia Sinyati Isaya 43 Bible Online

Isaya 43 - Maasai Bible – Biblia Sinyati bible

Isaya 43

¹Kake ore taata, nji ejo Olaitoriani, ilo likintayio iyie Yakobo, ilo likintobirua Israel: “Miureishoyu amu aatokordua nanu iyie, Aaipotuo nanu iyie te nkarna ai, ira iyie olalai.

²Tinilo iyie aim atua nkariak, naaku nanu te nebo iyie; naa ti nilang ilkejek nimikiya ninche; naa ti nilo iyie aim atua enkima nimikipej iyie, nimikinya iyie olng'ejep le nkima

³Amu kara nanu Olaitoriani Enkai ino, Ilo Sinyati le Israel, Olaitajeunoni lino. Aishorua nanu Misiri pee kitajeu iyie, naishooyo Etiopia o Seba pee aawalunye iyie.

⁴Ore te nkaraki nira iyie kirotet too nkonyek aainei, nikiyanyitaki, naatonyorra nanu, aishooyie nanu iloreren pee aawalunye iyie, aishooyie iloreren awalu enkishui ino.

⁵Miureishoyu, amu atii nanu te nebo iyie; kayau nanu eishoi ino aitung'uaa enkilepunoto e nkolong, nalo aiturrur intae te nkalo o loo ntoluo.

⁶Kalo nanu ajoki ina kop e moikuape, nchoru, najoki kopikop, mimbooyo iyie; ilayiok laainei ooing'uaa enelakua o nena toyie aainei naaing'uaa ineeiting'ie enkop,

⁷Ore pooki ng'ae ake ninye oipotieki enkarna ai, ilo oitayioki te nkaraki enkitoo ai, ilo laitobirua nanu naitaa.”

⁸Iyau lelo tung'ana modook hoo neeta nkonyek, lelo ming'anta hoo neeta nkiyiaa!

⁹Nchoo loreren pooki eiturrurro te nebo, ntutumo loshon pooki. Kalo tiatua ninche oidim aibalunye ena, neitodol iyiook mbaa e apa? Nchoo ninche eyau shakenisho enye pee eitisip kuna, naa nchoo ninche ening nejo, Ee ekesipa.

¹⁰“Irara intae ilchakenini laainei,” Olaitoriani ojo, “Nirara ilo sinka lai lategelua nanu, pee kitumutumu aatayiolo nikirukuruku nanu, niyiolouu nchere nanu ilo. Ore apa te dukuya nanu meetae ae ai naitobiruaki, nemeetae enaitokini aata te siadi nanu.

¹¹Kara nanu Olaitoriani, nemeetae likae Aitajeunoni leme nanu.

¹²Aibalie apa nanu, naitajeu, nalimu, ina kata metii enkai omoni atua intae, nirara intae ilchakenini laainei,” Olaitoriani ojo.

¹³“Kara nanu Enkai, naa neijia atiu o kenya; Meetae oloidim atokordu te nkaina ai; kaasisho nanu, naa kaing'ae oidim aibooi ina siaai?”

¹⁴Nji ejo Olaitoriani, ilo okordu intae, ilo Sinyati le Israel, “Ore te nkaraki intae, kairriwaa nanu olkilikuai Babilon, meshomo agil inchomito pooki, ore ina buakunoto oo Lkaldayo, neibelekenyi aaitaa enkishirata.

¹⁵Kara nanu Olaitoriani, ilo Sinyati linyi, ilo Aitobirani le Israel, Aiguanani linyi.”

¹⁶Nji ejo Olaitoriani, ilo oitobir enkoitoi tiatua enaiposha, nepik enkoitoi atua nkariak kumok,

¹⁷ilo oyau ngarrin o mbartan o lakedok o enjore; neirragie te nkop, nemeitoki aadumunye, neiliilaa ninche anaa oltaa:

¹⁸“Mintoki adamu mbaa e apa, niminguanare mbaa musan.

¹⁹Ng'ura ajo aasita nanu embae ng'ejuk, egira taata ninye ailepu, aimimusu iyie? Kaitobir nanu enkoitoi ti ong'ata, napik ilkejek olpurkel.

²⁰Ore ng'uesi e ntim naayanyitu ninche nanu, mbariak o sidan; te nkaraki naisho nanu ninche enkare ti ong'ata, napik ilkejek olpurkel, pee aisho nanu lelo gelunot laainei eneokishore,

²¹lelo tung'ana apa laitobiraka kewan, pee etum ninche aaibalunye enkisisa ai.

²²“Ore ake eyia, eitu iyie kimpot nanu Yakobo; kake inaure iyie tialo nanu, Israel!

²³Eitu iyie kiyaki inkerra inono o lasar opejori, neitu kiyanyitu nanu too lasarri linono. Eitu nanu aaek too lasarri, anaa aaitanaur te nkorropil.

²⁴Eitu iyie kinyiang'aki nanu enkorropil too mpisai, neitu kintaraposh eilata oo lasarri linono. Kake kiteeka iyie too ng'ok inono, kintanaura iyie nanu te nkarruoisho ino.

²⁵“Nanu ilo ojutoo nkitarruorot inono, te nkaraki kewan ai, nemaitoki nanu adamu ing'ok inono.

²⁶Tipikaki nanu ndamunot, maishankarrata iyiook te nebo; iyau enkiguana ino, pee kitumi aaitisipa nchere iata esipata.

²⁷Etaasa apa papaai lino le dukuya eng'oki, ore lelo aitutumok linono naatapaashare nanu.

²⁸Ore te nkaraki ina, aisarkionie nanu lelo kituaak le wueji sinyati, nayaki Yakobo enkidaata naitaa Israel oldeket.