Read Maasai Bible – Biblia Sinyati Isaya 44 Bible Online

Isaya 44 - Maasai Bible – Biblia Sinyati bible

Isaya 44

¹“Toning'o iyie Yakobo lo sinka lai, Israel laa iyie ategelua!

²Nji ejo Olaitoriani ilo likintobira, ilo likintobirua te nkoshoke e ng'utunyi naa ninye likilo aret. Miureishoyu iyie, Yakobo lo sinka lai, Yeshurun laa iyie ategelua.

³Amu kabukoki nanu enkare ina kop e nkure, napik inkonyek oo nkariak ina kop natoyio. Kabukoki nanu Enkiyang'et ai shumata eishoi inyi, nabukoki imayianat aainei eishoi inyi.

⁴Kebulu ninche anaa nkujit naatii atua enkare, anaa iseyia oobulu too reyieta naaruko

⁵Nejo ake oltung'ani, ‘Kara nanu olo Laitoriani,’ ore olikae neipotie kewan enkarna e Yakobo, ore olikae neiger te nkaina enye ajo, ‘Olo Laitoriani,’ nedung'oki kewan enkarna metaa keji Israel.”

⁶Nji ejo Olaitoriani, ilo aiguanani le Israel naa ninye Olakordunoni lenye, Olaitoriani loo lororani: “Kara nanu ole dukuya nara ole nkiting'oto, meetae ae Ai neme nanu.

⁷Kalo otiu anaa nanu? Nchoo ninye elimu aibalunye, nchoo ninye meibalunye neitodolu te dukuya nanu. Kaing'ae apa otolimuo aibalunye mbaa naapuonu? Nchoo ninche eliki iyiook mbaa naayooki aapuonu.

⁸Miureishoyu nimimputukuny; keitu apa nanu aliki intae aibalakinye? Nirara intae ilchakenini laainei! Keetae ae Ai neme nanu? Meetae likae ora endapidapoi; mayiolo nanu likae.”

⁹Pesho lelo pooki apa ooitobira nkitanyaanyukot, ore nena tokitin naang'idare ninche nemeret ninche. Ore ilchakenini lenye nemedolisho nemeyiolo, pee etumi aaitukurru ninche.

¹⁰Aing'ae oitobiru nkaitin oo nkitanyaanyukot nemeret hoo toki?

¹¹Ore lelo tung'ana lenyena pooki naa keitukurruni. Ore lelo aguetak arriyiak naa iltung'ana ake; nchoo ninche pooki esoto, nchoo ninche eitashe, kepuo ninche pooki aairut, kepuoi aaitukurru ninche te nebo.

¹²Keidong'u olkunoni ninye, neitobiru te nchumata oo nkuk, neitobiru too sekenke ooidong'ishoreki, neidong'u ninye teina aina enye nagol; netir ninye esumash neishunye engolon enye, naa te nelau enkare naok neiterre.

¹³Keitorioo olaguetani olkereri, nesir te nkalamu; neitobiru ina naguetu too ntokitin naaguetishoreki, nesir te ntoki natemishoreki neitobiru entoki naikununo anaa oltung'ani, nepik enkishiaa e tung'ani, pee etum atipika enkaji enye.

¹⁴Nedung ninye iltarakua; anaa egelu ilkulikae keek, neisho ninche metubulu tiatua ilkeek le ntim, neun ninye iltarakua neitubulu enchan.

¹⁵Neitoki aaku ilkeek le nkima, neya oltung'ani embata nelo aij, neinok ninye ina kima nepej emukate, neitoki sii aitobiru enkai te ilo shata neserem ninye. Neitobiru ninye enkitanyaanyukoto e nkai neserem ninye, neitobiru ninye enkitanyaanyukoto e nkai nagueta neirugokino ninye.

¹⁶Ore olpisiai lenye nepejoo ninye te nkima, ore to likae pisiai neinosie ninche inkiri. Nepej inkiri nenya neraposho; neij sii enkima neitoki ajo, “Ee, airowuaja nanu, atoduaa nanu enkima!”

¹⁷Ore enkae rubata pooki neitobirunye ninye enkae ai, ina kitanyaanyukoto enye, neirugokino ninye ina kitanyaanyukoto aserem. Neomon ninye ina kitanyaanyukoto ejo, “Tokorduaki nanu, amu ira iyie enkai ai!”

¹⁸Meyiolo ninche nememuso; amu eikeno Olaitoriani nkonyek enye, pee medolisho ninche o ndamunot enye pee meyiolou ninche.

¹⁹Meetae hoo obo oshilaa, aashu olojurru ayiolou nemusu ajo, “Etapejoki olpisiai lenye te nkima, atapejo sii imukateni too nkuk enyena, natapejie nanu nkiri nainosa ninche. Paa amaa lelo ootelekutua, kaitaa nanu entoki olminong? Kairugokino nanu osototi loo lkeek?”

²⁰Nkuruon enya ninye; ore ina ng'eno enye nemelulung'a neitapong'oyie ninye, nemeidim ninye aitayu kewan anaa atejo, “Ae metii elejare enkaina ai e tatene?”

²¹Tadamu kuna tokitin, iyie Israel, ira iyie osinka lai; aaitobira iyie, ira iyie osinka lai Oo Israel, maarikino aikata nanu iyie.

²²Atikinyayie nanu nkitarruorot inono anaa enkatampoi, aishie ing'ok inono anaa enkinuku; torrinyunye wou enatii nanu, amu aatokordua nanu iyie.

²³Taranyisho, iyie shumata, amu etaasa Olaitoriani ina; Entabuaku intae ineegut e nkop; entang'amai entaranyisho intae ildoinyo, o iyie natim o pooki shani otii atua! Amu etokordua Olaitoriani Yakobo, naa kepuoi aaitaa ninye kitok te Israel.

²⁴Nji ejo Olaitoriani, ilo likikordu iyie, laa ninye apa likintobirua te nkoshoke e yieyioo lino: “Ara nanu Olaitoriani, ilo oitobira ntokitin pooki, ilo apa oisalaasha keper openy, ilo oisalaasha enkop - Kaing'ae apa otii te nebo nanu? -

²⁵Ilo oibooyo enaibon oo laimonkok, neitaa pesho iloibonok le lejare; ilo oibelekenyu ilang'eni arrinyu, neitaa ina ng'eno enye emodai;

²⁶ilo oun ororei lo sinka lenye, neitabaya enkiguana oo lkipaareta lenyena; ilo ojo tialo Yerusalem, ‘Kepuoi aamany ninye,’ nejo tialo nkanas e Yuda, ‘Kepuoi aashet ninche, naitasheyie nanu ineeturori apa,’

²⁷ilo ojoki ewueji negut, ‘Toyio, kaitoi nanu ilkejek linono’;

²⁸ilo ojoki Sairas, ‘Olchekut lai ninye, naa keitabaya ninye eyieunoto ai’; ejo tialo Yerusalem, ‘Kepuoi aashet,’ ore tialo ina aji e Nkai, nejo, ‘Kepuoi aaitamanyu olkitamanyunoto lino.’ ”