Read Maasai Bible – Biblia Sinyati Isaya 47 Bible Online

Isaya 47 - Maasai Bible – Biblia Sinyati bible

Isaya 47

¹Tadou iyie totona te nterit na anasa e Babilon; totona te nkop metii olorika le nkitoo, Amu meekure aekata kingili aajo, enasipa osesen naisikarra

²Iwa lelo soito ooiutuutishoreki, ndong'u entapa, iwuang'ie ilo karasha limulumulare, intayu ilo kila lino, ting'ishai too nkejek inono, iima atua lkejek talang'a.

³Kepuoi aaibalunye ina masipaisho ino, nepuoi aadol enkurruna ino. Kaitalaku nanu elap, nemaleku oltung'ani.

⁴Ore Ilo okordu iyiook - naa Olaitoriani loo lororani, ninye enkarna enye - ninye Ilo Osinya le Israel.

⁵Totona ntirring'ayu, nilo atua enaimin, natito oo Lkaldayo; amu mikingili aekata aajo enkaiguanani oo nkitoriat

⁶Atagorokine apa nanu iltung'ana laainei, aisarkionie nanu enjung'ore ai; aaishorua nanu apik atua nkaik inono, neitu iyie ing'urrie ninche; ore lelo payiani nintanapa iyie olola oiroishi oleng.

⁷Itejo apa iyie, “Kaaku nanu enkaiguanani ntarasi,” ore te nkaraki ina eitu iyie ipik kuna baa atua oltau lino, aashu idamu nkiting'ot enye.

⁸Ore naa taata toning'o ena, iyie ena aisikarrani, ena naton eidipakine, ina najo to ltau lino, “Atii nanu, nemetii ae naaijo nanu; maton nanu anaa enkoliai nemeye nkera aainei.”

⁹Eikitum iyie kuna baa pokira, te nkata nabo, te nkolong nabo; ore keeya oo nkera inono o enkoliasho naa eikitum iyie te nkiputakinoto hoo niata iloibonok kumok o engolon kitok oo lasakutok.

¹⁰Indipakine apa iyie tiatua entorroni ino, nijo, “Maadolita nanu oltung'ani;” ore eng'eno ino o enkarriyiano ino nikintapong'oyie, nijo iyie to ltau lino, “Atii nanu, nemetii likae.”

¹¹Kake kelotu entorroni shumata iyie, nemindim iyie aibooi; kelotu enkidaata shumata iyie, nimindim iyie aitukuoi; nelotu enkidaata enitii nabo kata, neitu aekata idamu.

¹²Ntasho tuunoyu tiatua esakutore ino o lelo oibonok linono kumok, laa ninche itanyamalikia ebaiki kitisho ino; keidimayu pee imirisho, keidimayu pee intureisho.

¹³Inaure iyie te nena kiguanat inyi kumok, nchoo naa ninche eitashe pee kintajeu, lelo oor shumata, ootoni aing'or ilakir, laa ore te nedoli olapa neibonu ina nayooki alotu.

¹⁴Kesipa eikununo ninche anaa suut, nenya enkima ninche; meidim ninche aaitajeu ate teina golon o lng'ejep le nkima. Mme inoshi kuk kuna naaiji, neme enkima nanyikakinoyu!

¹⁵Neijia etiu te iyie tialo nena baa apa nitanyamalikia, naa ninche apa iyie imbung'are tiatua enkishui ino pooki; kelo ake oltung'ani aim enkoitoi enye; meetae hoo obo likilo aitajeu iyie.