Read Maasai Bible – Biblia Sinyati Isaya 49 Bible Online

Isaya 49 - Maasai Bible – Biblia Sinyati bible

Isaya 49

¹Entoning'oki nanu, intae ilmanien le naiposha, nining'ining'i intae iloreren oolakua. Aaipotuo apa nanu Olaitoriani atii enkoshoke, ore atii enkoshoke e yieyio neipot ninye enkarna ai.

²Eitaa ninye enkutuk ai anaa olalem opi, naarrip ninye nanu te nkaina enye; aaitaa ninye nanu embae nayopiroki[5], naapik atua emootian enye aisudoo.

³Naajoki ninye nanu, “ira iyie osinka lai, Israel, laa te ninye aitaae nanu kitok.”

⁴Kake atejo nanu, “Aisiaaishe pesho, ataasishore nanu engolon ai te pesho o to lng'am; kake ore ake eyia, etii esipata ai te nebo o Laitoriani, ore ole koisiayio lai neeta Enkai ai.

⁵Ore taata nejo Olaitoriani, ilo apa laaitobirua nanu te nkoshoke pee aaku osinka lenye, pee ayau nkera oo Siraeli arrinyoki ninye, netumi sii aaiturrurroki Israel ninye, amu aayanyitaki nanu too nkonyek o Laitoriani, netaa Enkai ai engolon ai.”

⁶Ejo ninye, “Entoki nalelek oleng ena nchere iaku iyie osinka lai, pee idumu iloshon le Yakobo nirrinyu lelo ootelekutua le Israel; kaaisho nanu iyie taa ewang'an too loreren, pee etum enjeunoto ai atabaiki ineeiting'ie enkop.”

⁷Nji ejo Olaitoriani, ilo okordu Israel naa Ilo Sinyati, ajoki ilo otemenayioki oleng too ltung'ana, ilo oiba oleng iloshon, ilo sinka loo laitoriak: “Eikidol ilaiguanak nedumunye; ore ilarikok nikirugokino, te nkaraki Olaitoriani oisiligayu ninye, Ilo Sinyati obo le Israel, laa ninye likitegelua iyie.”

⁸Nji ejo Olaitoriani: “Ore te nkata naishiaa aatang'amayie nanu iyie, ore te nkolong e njeunoto aatareto nanu iyie; aatorripo nanu iyie naaishooyo aaitaa olning'o too ltung'ana, pee idumu ena kop, pee ioriki enjung'ore lelo ooliyio;

⁹nijoki lelo ooena, ‘Entupuku,’ nijoki lelo ootii enaimin, ‘Entaliooto.’ Nepuo ninche aadaa too mbat oo nkoitoi, ore nkisiashat pooki naaika neaku endaata enye.

¹⁰Mepuo ninche aatum esumash o enkure, nemeitoki olkutati anaa enkolong napi aar ninche, amu ore ilo oing'urrie ninche naa ninye olo arikoo ninche, naa too nchorroi oo nkariak erikoo ninche.

¹¹Naitaa nanu ildoinyo laainei pooki enkoitoi, ore nena oitoi aainei kituaak naa keilepieki shumata.

¹²Ng'ura ajo kepuonu kulo eing'uaa enelakua, nepuonu kulie eing'uaa moikuape, neing'uaa oloo ntoluo, neing'uaa kulie enkop e Sinim.”

¹³Taranyisho te ng'ida, iyie shumata, nishipayu na kop; entaranyisho intae lo doinyo! Amu eitagolo Olaitoriani iltung'ana lenyena, naa kelo aing'urrie lelo apa ooisilisiloki.

¹⁴Kake etejo Sion, “Aaiturrayie nanu Olaitoriani, meekure aadamu Olaitoriani lai.”

¹⁵“Keidim atorikinoyu enkitok enkerai enye nanakita, eji metaa meitoki aing'urrie ina kerai e nataoiwuo openy?” Ee keidim atorikinoyu, kake maarikino nanu iyie.

¹⁶Ng'ura ajo aatisira nanu too ndapi oo nkaik aainei, etii isunta inono anaake dukuya nkonyek aainei.

¹⁷Etumuruto ilashetak linono lelo apa likitigila, ore apa lelo likintomijoon nikipuo aaing'uaa iyie.

¹⁸Tushumu nkonyek inono ntamanai ing'orisho; eiturrurrote pooki, nepuonu ninche enitii. Ore anaa enaishu nanu, Olaitoriani ojo, ilo iyie aishop ninche pooki anaa emasaai, nienikino ninche anaa enaenikino esiankiki narikori imasaa enyena.

¹⁹“Kesipa ore ilmuateni linyi o wuejitin apa neetomijono o ina kop inyi apa nainyalaki - naa kepuo aapiriku te lelo oomany; ore apa lelo ootoijoitie intae naa kelamari oleng.

²⁰Ore nena kera apa naatoiwuoki te nkata o sina, nepuo sii ninche aajo ining'itoto, ‘Kepirik ene wueji te nanu; ing'urakaki ewueji namany.’

²¹Nilo ajo to ltau lino: ‘Kaing'ae laatoikio nanu kuna? Aatung'uayioki apa aa nanu ake nara olupi, nashomo eyararoto naayae enelakua, kake aing'ae naitubulua kuna? Aatung'uayioki apa aa nanu ake; Kaji naa eimutua kuna?’ ”

²²Nji ejo Olaitoriani Enkai: “Kailepakinye nanu iloshon enkaina ai, naisho olmonekie lai iloreren; neyau ninche ilayiok linyi too lgooitie lenye, ore intoyie inyi nepuoi aanap too loilila lenye.

²³Kepuo ilaiguanak aaku loo papaai linyi ooitubulu intae, ore nkaiguanak enye neaku ninche naaing'or intae aaitoti. Neitabaiki ninche nkomomi enye enkop eirrugokino intae, nemej ina terit oo nkejek inyi. Nilo taa ayiolou nchere kara nanu Olaitoriani; ore lelo laanyu nanu nemeitukurruni.”

²⁴Keidimi aawaita entoki naibung'ita ilo ogol, anaa keidimi aawaita ilo oibung'aki otii nkaik e ilo torrono?

²⁵Kesipa, Olaitoriani ojo: “Ekeidimi ninye aawaita lelo ooena le ilo ogol, neidimi aatokordu ina naibung'ita ologol, amu kagilunore nanu lelo oogilunore intae; naa kaitajeu nanu nkera inyi.

²⁶Kaisho nanu lelo ooitorogony intae metumutakinoto maate aara, nemera eok isargeta lenye anaa ilootooko enaisho oo sabibu. Netum taa pooki toki naishu atayiolo nchere kara nanu Olaitoriani, Olaitajeunoni linyi, nara ilo Okordu intae, Ilo Magilani le Israel.”