Read Maasai Bible – Biblia Sinyati Isaya 52 Bible Online

Isaya 52 - Maasai Bible – Biblia Sinyati bible

Isaya 52

¹Tuputunye, tuputunye, ntagoluoyu iyie Yerusalem; nchopo lelo kilani linono sidain, iyie Sion, na anasa sinyati, amu meigil aekata alotu enitii ilo lememurata o ilo oiduruk.

²Mpiripiroi ina terit natii osesen lino, tuputunye; iyie ena naena, Yerusalem; ntololong'a nena keenta naatii emurt ino, iyie Yerusalem.

³Amu nji ejo Olaitoriani: “Etimiraki apa intae pesho, naa kepuoi sii aakordu intae metii enkinyang'a.

⁴Amu nji ejo Olaitoriani Enkai: Etang'asa apa iltung'ana laainei aadoyio aapuo Misiri aamany ine, neisomit lelo le Asiria ninche pesho.

⁵Amaa naa taata kainyoo nanu aata teine, Olaitoriani ojo, idolita ajo ewaki iltung'ana laainei pesho? Kedar lelo aitoriak lenye, Olaitoriani ojo, ore endama pooki anaake nemenaa ninche enkarna ai.

⁶Ore te nkaraki ina kepuo iltung'ana laainei aayiolou enkarna ai; neaku ore teina olong naapuo ninche aayiolou nanu ilo oirorita; nele nanu.”

⁷Kebaa esidano tenidol ilelo ooyau ilomon supati too nchumat oo ldoinyo, lelo oolimu aaibalunye eseriani, lelo ooyau ilomon supati le seriani, lelo oolimu aaibalunye enjeunoto, lelo oojoki Sion, “Enkai ino naitoreisho.”

⁸Entoning ilarripok linyi eilepie iltoiloishi lenye, eranyisho ninche te nebo te ng'ida; amu etoduaa ninche too nkonyek ina rrinyunoto o Laitoriani elotu Sion.

⁹Entijing pooki osinkolio te nebo, intae iwuejitin apa neeinyalaki e Yerusalem; amu eitagolo Olaitoriani iltung'ana lenyena, etokordua ninye Yerusalem.

¹⁰Etudumua Olaitoriani engolon sinyati te dukuya nkonyek oo loshon pooki; naa kedol ineeiting'ie enkop pooki enjeunoto e Nkai ang.

¹¹Enchom, enchom, empang'a enchom idie, eminyikaki ake entoki nemesinya; empang'a entung'uai ninye, entisinya ate, intae lelo oonapita imasaa o Laitoriani.

¹²Amu mipuopuo intae te nkisarrisar, nimipuopuo te nkisikata, amu Olaitoriani olo te dukuya intae, naa Enkai e Israel naing'or intae te siadi.

¹³Ng'ura ajo kelo osinka lai adupoyu, keitaae ninye kitok neilepieki, naa kelo ninye shumata oleng.

¹⁴Ore anaa enaing'asiate ilkumok te nkaraki ninye - ore emua enye, neibelekenya, aaku menyaanyukie enkomom o ltung'ani, ore empukunoto enye neibelekenya arruoyo alang ene tung'ani.

¹⁵Neaku keing'asiayie ninye iloshon kumok; nenuka ilaiguanak nkutukie te nkaraki ninye; amu ore ina neitu elikini ninche naa kepuo aadol, ore ina neitu aekata ening nepuo aayiolou.