Read Maasai Bible – Biblia Sinyati Isaya 56 Bible Online

Isaya 56 - Maasai Bible – Biblia Sinyati bible

Isaya 56

¹Nji ejo Olaitoriani: “Embung'a esipata niasiasa nena sidain, amu kelotu enjeunoto ai asieku, ore enkordunoto ai neibalunyeki.

²Kemayiana ilo tung'ani oas ena nemayiana ilo oibung akurraki Sabato, nemeisarkionie, neibooyo kewan pee meas entorroni ake pooki.”

³Mincho ake ilo leeiking'a oewuo aibung'are Olaitoriani ejo, “Kesipa kaakepu nanu Olaitoriani too ltung'ana lenyena.” Naa mincho ake ilo sunash ejo, “Kara olchani otoyio.”

⁴Amu nji ejo Olaitoriani: “Ore lelo sunashi oogelema ooibung Sabato ai, lelo oogelu mbaa naaitiship nanu neibung aakurraki olning'o lai lo sotua,

⁵naa kalo nanu aisho tiatua enkaji ai o tiatua isunta e nkaji ai, entoki nadamunyeki sidai nalang ilayiok o ntoyie; kaisho nanu ninche enkarna oo ntarasi nemeiwuang'ieki aekata.

⁶“Ore lelo tung'ana leeiking'a oopuonu aaibung'are Olaitoriani pee eisiaai ninye, pee enyorru enkarna o Laitoriani, pee eaku isinkan lenyena, ore pooki ng'ae ooibung Sabato, nemeisarkionie ninye, neibung olning'o lai lo sotua akurraki

⁷kariku nanu kulo Sion, ilo doinyio lai sinyati, naisho nanu ninche meting'idata tiatua ina aji ai e nkomono; ore lelo asarri lenye oopejori o nkishorunot enye, naa kepuoi aang'amaa te nchumata ilo perere lai lo lasar; amu kepuoi aajo enkaji ai enkaji enkomono too loreren pooki.”

⁸Nji ejo Olaitoriani Enkai, ilo oiturrur lelo apa ooiturrayioki le Israel, kaigil nanu aiturrur kulikae te nebo lelo ooidipaki aaiturruro.”

⁹Na ng'uesi kuna pooki e ong'ata wootu enosa - kuna ng'uesi e ntim pooki.

¹⁰Aimodook ilarripok lenyena naa ilmoda pooki; ildiein oomoda ninche pooki, meidim aatabuak, ooidetidet eirrag oonyor aaimugo.

¹¹Keeta lelo diein enkului kitok, meraposho aekata ninche. Ore sii lelo shekuti naa kemoda; eibelekenyakinote pooki nkoitoi enye maate, oltung'ani enkoitoi enye nadupore, neijia eikuna pooki.

¹²Nejo ninche, “Wootu”, “Matook enaisho, maitaraposho ate te naisho napi; ore taaisere naa ketiuu anaa ena olong, keaku kitok alus.”