Read Maasai Bible – Biblia Sinyati Isaya 6 Bible Online

Isaya 6 - Maasai Bible – Biblia Sinyati bible

Isaya 6

¹Ore teilo ari apa otuayie olaiguanani oji Usia, nadol nanu Olaitoriani etonita to lorika le nkitoo. Neilepieki ninye oleng. Ore olkila lenye neiput enkaji e Nkai.

²Ore te shumata ninye neitashe iserafi[1]. Neeta ake obo inaipuko ile. Ore inaipuko are neimulumulie enkomom enye, ore are neimulumulie inkejek enyena, ore are nelotie tiaai.

³Eipoto ake maate ejo: “Sinyati, Sinyati, Sinyati Olaitoriani loo lororani; eiputa enkop pooki enkitoo enye.”

⁴Neikirikira olkitamanyunoto le Nkaji e Nkai te nkaraki ina buakunoto, neiput ina aji empuruo.

⁵Najo nanu: “Woi kewan ai! Amu aimina nanu; amu kara nanu oltung'ani loo nkirorot torrok; naton tiatua iltung'ana loo nkirorot torrok; amu etoduaa inkonyek aainei Olaiguanani, ilo Aitoriani loo lororani!”

⁶Nelotu obo le lelo serafi enatii, neibung'ita te nkaina enye enkukuo naishu, nayawua to lperere lo lasar.

⁷Neiseyie enkutuk ai, nejo, “Ng'ura ajo eiseyie ena enkutuk ino; eiwuang'ieki entorroni ino, nikitapalakaki ing'ok inono.”

⁸Naning nanu oltoilo lo Laitoriani ejo, “Kaing'ae nanu airriwaa, naa kaing'ae olo te nkaraki iyiook?” Najo nanu, “Nele nanu! Irriwayioki.”

⁹Ejo ninye, “Shomo, tiaaki ele orere: ‘Ining'ining'i, kake miyiolouu; Idolidolo kake mimususu.’

¹⁰Iroishiyie iltauja le kulo tung'ana, nintiming'ana inkiyiaa enye, ninkeno inkonyek enye; pee medolisho too nkonyek enye, nemening'isho too nkiyiaa enye, neyiolou too ltauja lenye, neibelekenya pee eishiunyeki.”

¹¹Naitoki nanu ajo, “Oi anu, Olaitoriani?” Nejo ninye: “O metaba anaa nemijoonu nkanas memanya toki o nkajijik metii iltung'ana, ore enkop neliyioyu tukul.

¹²Neiwuang'ie Olaitoriani iltung'ana aitalamaa oleng, neaku ilmuaateni kumok te mpolos e nkop.

¹³Ore hoo duoo ninye te neleku ematua nabo e tomon, keitokini aapejoo, ketiu ninye anaa enkobei o lchani onyaanyukie olng'aboli naing'uari eitashe, eidipaki aatuuroi.” Ilo antererai sinyati ninye ina obei.