Read Maasai Bible – Biblia Sinyati Isaya 62 Bible Online

Isaya 62 - Maasai Bible – Biblia Sinyati bible

Isaya 62

¹Ore te nkaraki Sion magira nanu, naa ore te nkaraki Yerusalem mayeng'iyeng'a nanu, o metaba anaa neibalayu esipata enye anaa ewang'an, netiu enjeunoto enye anaa oltaa oilang'isho oleng.

²Kepuo iloshon aadol ina kilepunoto e sipata, nedol ilaiguanak pooki enkitoo ino, naa eikipuoi aaisho iyie ina arna ng'ejuk, naa enkutuk o Laitoriani naishoru.

³Ilo iyie aaku enkopiyia e nkishiaa te nkaina o Laitoriani, niaku enkishili e nkitoo te nkaina e Nkai ino.

⁴Mikingili aekata aajo “Enaiturrayioki”, nemeigili aekata aajo enkop ino “Olmuaate”; kake keaku eikiji iyi “Enatii eng'ida ai atua ninye”, naa keji enkop inyi “Enayamaki”; te nkaraki nashipakino Olaitoriani intae, ore enkop inyi neaku keyama.

⁵Ore anaa enaayam olmurrani eselenkei, neijia eiko ilayiok linyi keyam intae, ore anaa enang'idakino oloyamisho esiankiki enye, neijia eiko Olaitoriani eng'idakino intae.

⁶Shumata isunta inono iyie Yerusalem, atipika nanu ilarripok; endama pooki o enkewarie pooki, nemegira aekata ninche. Ore intae lelo oodamu Olaitoriani nemiyeng'iyeng'ang'a,

⁷neminchosho ninye enkiyagata o metaba anaa neitasheyie Yerusalem, neitaa ninye enkisisa te nkop.

⁸Einosa Olaitoriani olmumai te nkaina enye e tatene o te nkaina enye magilani, nejo, “Maaigil nanu aishooyo entapa inyi metaa endaa oo lmang'ati linyi, nemeok iltung'ana leeiking'a ina aisho inyi oo sabibu naa ninye itanaurikitia;

⁹kake ore lelo ooikesu ina tapa ninche oonya neisis Olaitoriani, ore lelo oosotu ilng'anayio ninche ook tiatua ilgorien le nkaji ai.”

¹⁰Shomo iima, shomo iima nchomito, ntobiraki iltung'ana enkoitoi; ntobira, ntobira enkoitoi kitok, iwuang'ie isoito, tudumu olmonekie metoduaa iloreren.

¹¹Eibalunye Olaitoriani aitabaiki ineeiting'ie enkop: Tiaaki Yerusalem, “Ng'ura ajo eewuo enjeunoto ino; neeta ninye olerrinyore lenye te nebo ninye neeta olekoisiayio lenye te dukuya ninye.”

¹²Naa keipoti ninche aajo “Iltung'ana sinyat”, “Ilookorduno lo Laitoriani”; naa kepuoi aajo intae “Ilooing'oruaki” enkanasa neitu “Eing'uari”.