Read Maasai Bible – Biblia Sinyati Isaya 64 Bible Online

Isaya 64 - Maasai Bible – Biblia Sinyati bible

Isaya 64

¹Oi naaji tenaa ipolos oloing'ang'e alotu enkop, pee etum ildoinyo aaikirikirata te dukuya iyie -

²neikirikira anaa emoti naitokitok pee eibalieki enkarna ino too lmang'ati linono, netum iloreren aikirikirata te dukuya iyie!

³Ore apa pee ias iyie mbaa naaitureisho neitu iyiook king'oru, nidou alotu enkop, neikirikira ildoinyo te dukuya iyie.

⁴Ore ebaiki apa moitie meetae oltung'ani otoning'o, aashu olotumusuo te nkiok, nemeetae olotoduaa te nkong'u Enkai nikinyaanyukie iyie, naasisho te nkaraki lelo ooisilig ninye.

⁵Intoomon iyie ilo oshipakino easata oo supati, lelo likidamu ninche too nkoitoi inono. Ng'ura, itagore apa iyie, nikitaasa iyiook eng'oki; kitobiko iyiook tiatua ng'ok ang te nkata naado, naa amaa, keitajeuni iyiook?

⁶Kitotiutuo iyiook pooki anaa oltung'ani oiduruk, ore esupatisho ang pooki netotiwuo anaa olkila loo lkereu. Kitoito pooki anaa embeneyio netiu entorroni ang anaa osiwuo, nekutaa iyiook aya enelakua.

⁷Ore te nkaraki ina meetae hoo obo oipot enkarna ino, meetae oliking'oru aibung'are, amu isudoyie iyie enkomom ino te iyiook, nitanapua iyie iyiook apik enkaina oo nkitarruorot ang.

⁸Kake ore ake eyia, Olaitoriani ira iyie Papa lang, kira iyiook nkulupuok, nira iyie olaitobirani loo nkulupuok; kira iyiook pooki esiaai oo nkaik inono.

⁹Migorokino iyie iyiook oleng, Olaitoriani, nimidamu nkitarruorot ang ntarasi. Ng'ura, tadamu nchere kira iyiook pooki iltung'ana linono.

¹⁰Etotiutuo nena anas inono sinyat anaa ong'ata, etotiwuo Sion anaa ong'ata, etaa Yerusalem olmuaate.

¹¹Ore ina aji ang sinyati naa sidai, naa atua ninye apa kisisie loo papa, netapejoyioki te nkima, ore nene wuejitin ang pooki sidain neidaaitie.

¹²Imbooyo iyie kewan te kuna baa, Olaitoriani? Eigira iyie nintame iyiook aitulus?