Read Maasai Bible – Biblia Sinyati Isaya 66 Bible Online

Isaya 66 - Maasai Bible – Biblia Sinyati bible

Isaya 66

¹ Nji ejo Olaitoriani: “Olorika lai le nkitoo keper naa ewueji oo nkejek aainei enkop. Kaji eikununo enkaji nikindim ateshetaki nanu? Kaji eikununo ewueji ai nayeng'iyeng'are?

²Ore kuna tokitin pooki naa enkaina ai naitobira, metaa inaainei kuna tokitin pooki, Olaitoriani ojo. Kake ele tung'ani nanu aing'oru, ilo obor neirridu to ltau lenye, neikirikira eure ororei lai.

³“Ore ilo oyieng olkiteng nenyaanyukie ilo osesekuan oltung'ani; ore ilo opolos olkuoo le ker nenyaanyukie ilo ogil oldia emurt; ore ilo oitarasu olasar le ntapa, nenyaanyukie ilo oitarasu osarge le mbitir; ore ilo oitobir olasar le ndamunoto le nkorropil, nenyaanyukie ilo omayian enkitanyaanyukoto oo nkaitin. Etegelutua kulo nkoitoi enye maate, ore iltauja lenye neshipakino nena baa o lminong.

⁴Kagelaki sii nanu ninche enkitamioto metadoiki ninche, nayau enkuretisho shumata ninche; amu ore apa pee aipotisho, nemeetae hoo obo oirukishe, ore pee airo nanu nemeetae hoo obo laainining'o, kake etaasa ninche ina torrono too nkonyek aainei, negelu ninche nena nemaaitiship nanu.”

⁵Entoning ororei lo Laitoriani, intae lelo ooikirikira te nening ororei lenye: “Etejo lelo alashera linyi ooiba intae, nenang'aki intae auluo te nkaraki enkarna ai, ‘Enchoo meisisi Olaitoriani pee kitum iyiook aatodol eng'ida ino’; kake ninche epuoi aaitukurru.

⁶“Toning'o ina kilepilep te nkanasa! Ilo toilo oing'uaa enkaji e Nkai! Ilo toilo lo Laitoriani, eitalaku elap too lmang'ati lenyena!

⁷“Etiu enkanasa ai sinyati anaa entomononi natoishe eitu ang'as asayusayu?

⁸Kaing'ae aekata otoning'o entoki naikununo nji? Kaing'ae aekata otoduaa ntokitin naikununo nji? Keidimi aatoiu olosho te nkolong nabo? Keidim olosho ataa te nkata nabo? Amu etasaisayia ake Sion nabo kata neiu ilayiok lenyena.

⁹Kaisho nanu ninche metoini nemaretu? Olaitoriani ojo, Amaa, nanu ilo oretu kaiken enguset? Enkai ino najo.

¹⁰“Ting'idayu te nebo Yerusalem, nishipa te nkaraki ninye, intae pooki oonyor ninye; tishipayu te nebo ninye te ng'ida, intae lelo pooki ooishiraki ninye;

¹¹pee itumutumu aatanak niraposhosho, lelo ki lenyena ooitigirisho; pee itumutumu aatook ishipakinono ina kumoi e nkitoo enye.”

¹²Amu nji ejo Olaitoriani: “Kaiputaki nanu ninye enkarsisisho anaa olkeju, naiputaki enkarsisisho oo loshon anaa olkeju odooyo enkare; nipuopuo intae aanak, nenapi intae te nkoriong enye, neipoipoi intae too nkejek enyena.

¹³Ore anaa enkerai nailejilej ng'otonye, kaailejilej nanu iyie aiko neijia; eikipuoi aaitigir iyie te Yerusalem.

¹⁴Ipuopuo intae aadol neng'idayu iltauja linyi; nebulu iloik linyi anaa nkujit; naa kepuoi aayiolou nchere etii enkaina o Laitoriani te nebo isinkan lenyena, ore engoro enye negilunore ilmang'ati lenyena.

¹⁵“Ng'ura ajo kelotu Olaitoriani te nkima, ore ngarrin enyena nepuonu anaa olkutati, pee eitalaku engoro enye te mpijan, neisikong'isho too lng'ejepa le nkima.

¹⁶Amu te nkima edung Olaitoriani enkiguana, naa to lalem edung'oki enkiguana pooki tung'ani; ore lelo ooar Olaitoriani to lalem naa keaku kumok.

¹⁷“Ore lelo ooitukuo neitisiny ate pee etum aashom atua enkurma esujaa ilo otii empolos enye, nenya inkiri oo lbitiro, nenya olminong, nenya ilkirrumun, kelotu enkiting'oto enye nabo kata, Olaitoriani ojo.

¹⁸“Amu kayiolo nanu isiaaitin enye o ndamunot enye, naa kalotu nanu aiturrur iloshon pooki o lng'ejepa; naa kepuonu ninche nedol enkitoo ai,

¹⁹naa kapik nanu olmonekie atua ninche. Naa ore te ninche naa kairriwaa nanu ilo pisiai oleku meshomo iloreren, meshomo Tarshishi o Puti o Ludi, lelo tung'ana oyietu nkai, nepuo Tubal o Yafan, nepuo iloomanaa le naiposha oolakua, lelo leitu ening enkisisa ai o enkitoo ai tiatua iloshon.

²⁰Naa kepuo ninche aayau lelo alashera linyi pooki ooing'uaa iloshon pee eaku olasar lo Laitoriani, nepuonu too mbartan o too ngarrin oo mbartan o too ngarrin naaimulumula o nyumpui o ntamesin ilo doinyo lai sinyati, Yerusalem, Olaitoriani ojo, aaikununye anaa ake duoo Israeli te neyau olasar lenye le ntapa too ngirran nemeiduruk atua enkaji o Laitoriani.

²¹Ore sii ilkulikae lenye, naya aitaa ilapolosak o Lawi, Olaitoriani ojo.

²²“Amu ore anaa enabikoo ina keper ng'ejuk o enkop ng'ejuk nalo nanu aitobiru, Olaitoriani ojo, neijia elo atiu iishoritin inono o enkarna ino, kepuo aabikoo.

²³Ore ebaiki olapa ng'ejuk o metabaiki olikae apa o ebaiki Sabato o metabaiki enkae Sabato, kaapuonu iltung'ana pooki aaserem, Olaitoriani ojo.

²⁴“Naa kepuo ninche aadol impopoki oo ltung'ana apa laatogolong'akita, amu meye aekata olkurto onya ninche, nemeyagaa enkima enye, naa keaku ninche entoki naitureisho too ltung'ana pooki.