Read Maasai Bible – Biblia Sinyati Ilawi 1 Bible Online

Ilawi 1 - Maasai Bible – Biblia Sinyati bible

Ilawi 1

¹Neipotu Olaitoriani Musa, neirorie ninye teilo ng'obor le ntumo, nejoki,

²“Irorie iltung'ana loo Siraeli nijoki ninche, teneishoru ake oltung'ani te ntae olasar aisho Olaitoriani, niyauu ilasarri linyi loo nkishu aashu iloo ntare.

³“Tenaa ore olasar lenye naa olasar opejori oing'uaa eluaata oo nkishu, neyau ninye olbung'ae lemeeta entioto, neishooyo ilo bung'ae te kutuk aji o lng'obor le ntumo, pee etum ninye ataa keng'amaroyu te dukuya Olaitoriani,

⁴neiteleiki ninye enkaina enye endukuya eilo asar opejori, naa keng'amari te nkaraki ninye pee eitobir olning'o lo sotua te nkaraki ninye.

⁵Neyieng ninye oloing'oni te dukuya Olaitoriani, ore ilayiok le Aaron, lelo apolosak neyau osarge, neisuaaya ilo sarge aaitaman ilo perere lo lasar ootii kutuk aji eilo ng'obor le ntumo.

⁶Neyieng ninye ilo tung'ani ilo asar opejori nedung'udung aitaa irubat,

⁷ore ilayiok le Aron ilo apolosani neinok enkima te nchumata olperere lo lasar

⁸nepik ilkeek aaitobiraki enkima, ore lelo ayiok le Aron apolosak nepik nena rubat enkima, elukunya o eilata aaitobiraki te nchumata lelo keek ootii enkima te nchumata olperere lo lasar,

⁹kake ore isorri e nkoshoke o loilelek lenyena neituku ninye te nkare. Nepejoo olapolosani pooki te nchumata olperere lo lasar, anaa olasar opejori, olasar le mpejoroto te nkima, esong'ouna narropil to Laitoriani.

¹⁰“Tenaa ore enkishorunoto enye o lasar opejori naa eluaata oo ntare aa inkerra aashu inkineji, naa keishoru ninye ositima lemeeta entioto.

¹¹Neyieng ninye te nkalo e moikuape o lperere lo lasar te dukuya Olaitoriani, ore ilayiok le Aaron lelo apolosak neisuaaya osarge leilo sitima aaitaman ilo perere lo lasar.

¹²Nedung'udung aaitaa rubat tenebo endukuya enye o eilata, neirragie olapolosani ninche aitobiraki aiteleiki lelo keek ootii enkima te nchumata olperere lo lasar;

¹³kake ore isorri e nkoshoke o o loilelek neituku ilo tung'ani te nkare. Ore ilo apolosani neitayu olasar pooki, nepejoo ninye to lperere lo lasar, olasar ninye opejori, olasar le mpejoroto te nkima, esong'ouna narropil to Laitoriani.

¹⁴“Tenaa ore olasar lo ltung'ani to Laitoriani naa olasar opejori loo motonyi, neyau ninye olasar lenye loo nturkuluoni aashu nturkuluoni kutiti.

¹⁵Neyau olapolosani olperere lo lasar, ore osarge lenye neibukori te mbata olperere lo lasar;

¹⁶naa keitayu ninye enkoshoke enye tenebo o nkopir nenang'aki embata olperere lo lasar te nkalo o loosaen ewueji oo nkuruon.

¹⁷Nepolos ninye ina motonyi too naipuko enyena kake meor aitaa are. Nepejoo olapolosani te nchumata olperere lo lasar, te nchumata e lelo keek ootii enkima, olasar opejori ninye, olasar le nkima esong'ouna narropil to Laitoriani.