Read Maasai Bible – Biblia Sinyati Ilawi 10 Bible Online

Ilawi 10 - Maasai Bible – Biblia Sinyati bible

Ilawi 10

¹Ore apa Nadab o Abihu, lelo ayiok le Aron, meetae ake oleitu eyau emoti enye e nkima, nepik enkima atua, nepik enkorropil atua, neishooyo ninche enkima nemesinya te dukuya Olaitoriani, amu eitu eitanap Olaitoriani ninche meishooi.

²Nelotu enkima eing'uaa dukuya Olaitoriani nemut ninche, neye ninche te dukuya Olaitoriani.

³Nejoki Musa Aron, “Ena bae etejo Olaitoriani, ‘Kaitoduaaya nanu kewan nchere kara sinyati tiatua lekua laataaniki nanu, ore te dukuya iltung'ana pooki naaisisi nanu.’ ” Negira Aron.

⁴Neipotu Musa Mishael o Elisafan, ilayiok le Usiel olenkapu le Aron, nejoki ninche, “Entinyiku, entanap ilalashera linyi ewuang'ie tiatua ewueji sinyati ewaita auluo ilng'oborri.”

⁵Nenyiku ninche, nenap ninche too lkilani lenye aaya auluo ilng'oborri anaa enatejo Musa.

⁶Neitoki Musa ajoki Aron o Eliesa o Itamar, lelo ayiok lenyena, “Emincho ake olpapita loo lukuny inyi eisiong'a, nimipolososo ilkilani linyi, pee miyeye ake, pee melotu engoro shumata ele turrur pooki, kake ore lelo alashera linyi, ina aji pooki oo Siraeli naa keidim ninche aaishiraki lelo ooinosa enkima o Laitoriani.

⁷Nimipuopuo intae boo aaipang te kutukaji ele ng'obor le ntumo, pee miyeye ake, amu ore eilata o Laitoriani naputishoreki naa ketii shumata intae.” Neas ninche te risioroto o rorei le Musa.

⁸Neitoki Olaitoriani airorie Aron, ajoki,

⁹“Miok ake enaisho aashu ae toki naoki napi, iyie aashu lelo ayiok linono ootii tenebo iyie, tenilo atua ilo ng'obor le ntumo, pee miyeye ake, keaku ena enkitanapata ntarasi tiatua iishoritin inyi pooki.

¹⁰Keishiaa te ntae pee indimidimi aatirishu enasinya o enemesinya, enemeiduruk o enaiduruk,

¹¹ninteng'ening'ene intae iltung'ana le Israel nena kitanapat pooki naairoro Olaitoriani aimunye Musa.”

¹²Nejoki Musa Aron o Eliesa o Itamar, lelo ayiok lenyena ootelekutua, “Entayu ilo asar le ntapa otelekua te lelo asarri oopejokini te nkima Olaitoriani, ninyanya meisuisho te mbata olperere lo lasar, amu eisinyati oleng.

¹³Enosa intae te wueji sinyati, amu erubata ino o erubata oo layiok linono te nena kishoorot naapejokini te nkima Olaitoriani, amu ina nanu aaitanapaki.

¹⁴Kake ore ilo oikulu oyukoki o ina muro naishoruaki indimidimi aainosa te pooki wueji nemeiduruk, iyie o layiok linono o ntoyie inono tenebo iyie, amu eishoruaki ninche anaa erubata ino o erubata oo layiok linono te lelo asarri le seriani loo ltung'ana loo Siraeli.

¹⁵Ore ina muro naishoruaki oilo oikulu oyuki keyauni ninche tenebo o lelo asarri te nkima o ina kurriny, pee eyuki anaa olasar oyuki te dukuya Olaitoriani, naa olino o loo layiok linono tenebo iyie anaa erubata inyi ntarasi, anaa enaitanapishe Olaitoriani.”

¹⁶Neikilikuanua apa Musa ajurru ina kine o lasar le ng'oki, neyiolou ajo etapejoyioki! Negorokino Musa Eliesa o Itamar, lelo ayiok le Aron apa ootelekutua, nejo

¹⁷“Kainyoo intae pee eitu inyanya olasar le ng'oki tiatua ewueji sinyati naa entoki nasinya ninye oleng neishooki apa ntae pee itumutumu aatanap entorroni ele turrur pee intobiriri olning'o lo sotua te nkaraki ninche te dukuya Olaitoriani?

¹⁸Ore amu eitu eyauni osarge lenye atua ewueji sinyati kesipa keishiaakino ninosa ntae tiatua ewueji sinyati, anaa enaitanapishe nanu.”

¹⁹Nejoki Aron Musa, “Ng'ura, eishooitie taata ninche olasar lenye le ng'oki o lasar lenye opejori te dukuya Olaitoriani, ore ake eyia aatadoikitio nanu mbaa naaikununo nji! Amaa naaji tenaa kainosa nanu olasar le ng'oki taata, kenaata eaku keng'amaroyu te dukuya Olaitoriani?”

²⁰Ore ake pee ening Musa ina neshipa.